OVER TO SERCHHIP
Chhei chhei chhei! Election Commission of India chuan Tlumtea thlir taka kan lo thlir, Serchhip MLA bial by-election chu April 17, 2021 a neih turin a rawn puang ta rup mai a. Election Model Code of Conduct pawh hman nghal turin a puang tel bawk a ni. Tunah chuan kan political party te pawh ruling leh opposition danglamna awm lovin an intluk tlang ta vek mai le! An party candidate te tan an campaign rusum pawh an thlak leh ṭan ta.
Bial pakhat by-election mai e ti lo chuan he inthlan hian danglamna leh makna riau a nei - Chu chu he bial pawn lama mi Mizo mipuite’n kan lo ngaihven ve em em mai hi a ni. Mizorama inthlanna awm tawh zingah Mizoram mipuite ngaihven hlawh nasa ber tia chhal ngam a ni hial mai awm e.
Mizoram chhung chhim leh hmar , chhak leh thlanga awm te, India ram khawpui hrang hranga awm Mizote bakah ram pawn Myanmar, Bangladesh leh Saprama cheng Mizote pawhin an rawn ngaihven a ni.
Heti taka he inthlanna by-election mai leh nghal Mizo mipuite thinlunga a tla na viau mai hi a chhan eng nge ni ang? Kan tunlai zawlneite’n Zoram thar lo piang hnai tawha an puan leh he inthlanna hian inzawmna nei thei dawna kan hriat vang a ni thei ang em? Inthlan neihna hmun lah hi chhim leh hmar chhak leh thlanga Mizo awmte tana a hlat lam inang (equidistance) ram laiah ( in the heart of Mizoram) tak a lo ni leh zel bawk si!
Mizote thinlunga thawktu a awm hi chuan tun hma lamah pawh an sakhming leh hmel pawh kan hriat ngai loh W.Phaileng tlangval Vanlalsailova zai huhang leh Churachanpur nula Lalroutmawi zai zunzamah pawh a ram pum nghinin kan lo nghing luai luai tawh mai a nih kha. Tunah pawh hian Mizote thinlunga thawktu thlarau engemaw taka a awm a nih hmel khawp mai.
Tuna by-election lo awm tur hi, a bik takin, Mizoram People’s Forum (MPF) tan remchanna leina hun remchang tak niin a lang. Kan hriat tlan ṭheuh angin MPF hi Mizorama inthlanna thianghlim leh felfai a awm theih nana hmalatu bulpui ber an ni a. Hun hmasa lamah te kha chuan a ruala bial tam tak inthlan tir ṭhin a ni a. Thawktu lam indaih loh avangin hneh taka hma lak MPF tan a harsa a. Tunah erawh hi chuan he inthlanna chuh tum political party candidate leh an campaigner zawng zawngte chu bial pakhatah an rawn fuan khawm dawn a, MPF tan hlawhtling ngei tura len den a awlsam dawn a ni.
He inthlan hi MPF hian nakin zela entawn tur inthlanna thianghlim leh felfai (examplery election) chher chhuah nan hmang bawk ngei se kan va ti em!
Tin, kan political party te pawh sual leh bawlhhlawh dotu bera insawi ṭhin an nih avangin tun inthlan hi inthlanna thianghlim leh felfai an duhna lan chhuahtir nana hmang ngei turah ngai ila. An campaigner te zingah dawt leh sum hmanga mite vote leisak tuma lo hmanhlel an awm erawh chuan an zahpuiawm khawp ang.
Hmun hrang hrang aṭanga mipuiin dingdihlipa kan thlir rawn mek, Serchhip bial by-election hi MPF leh Election Commission te duh dan anga sawiselboa hlen chhuah theih a nih hlauh chuan Serchhip bial mipuite tan ava hmingṭhat thlak dawn em!
Khaw fai sawi a Biate khua kan hre tel nghal ṭhin ang hian inthlanna thianghlim leh Serchhip hming pawh hi an la inkawp tlat lovang tih tunge sawi thei? Chu hming ṭha, Bible pawhin sum tam tak aia thlan zawk tur a lo tih chu an hlawh chhuah ngei theih nan Serchhip bial mipuite leh MPF Worker-te 'ṭang fan fan' Zoram mipuiin kil tin aṭangin kan lo thlir reng a che u.
C.Hermana