Mizoram sawrkar hnuaia hna lak dan

Mizoram mipui hi sawrkar hnaah hian kan innghat nasa a, khawlaia kan sum leng vak tam zawk hi sawrkar hnathawk hlawh aṭanga lo chhuak a ni tih kan Aizawl khawlai hian chiang takin a lantir.

Thla tawp lam Inrinni leh thla tir Inrinni-ah hian bazarah mi an intam hleih hle tih tih thil chik mi ni lem lo tan pawh a hmuh theih awm e. Sawrkar hnathawkin hlawh an lak theih loh chuan khawlaiah pawisa leng vak a tlem a, Kohhrana thawhlawm lut thlengin a tlem phah. Kan ramah hian bul tanna tur nei lo tan chuan han thawh mai tur a vang a, Sawrkar hnathawh a hlu. A hniam ber Group D hlawh hi kuthnathawk hlawhtling ti-a kan han chhal

ṭhenkhat sum lakluh aiin a tam awm asin! Heti taka sawrkara inghat kan nih vang hian sawrkar hnalak chung chang pawh hi kan bengkhawn tlang a, a awm viau a ni.

MPSC-in eng chin nge a lak? India Constitution Article 320 in a phal angin Sawrkarin MPSC lak tur chin a bithliah thei a. MPSC lak loh zawng chu Department lak tur tihna a ni. Hna hniam lam Department lak tura dah hi “fair lo takin ti ila, kan duhsak zawng kan thun dawn nia” tih vang a nih hmel loh a, MPSC chhawk zangkhai tumna vang zawk a niin a rinawm.

Tun dinhmunah chuan Level 6 leh a chunglam hi MPSC lak tur a ni a, Level 6 a awm te chu UDC te, Social Welfare hnuaia Circle Officer te, School Education Department hnuaia Trained Undergraduate Teacher, etc te an ni. Kan dan hman lai ang chuan contract pawh ni se Level 6 leh a chunglam hi chu MPSC lak tur a ni. Amaherawhchu, Sawrkarin a duh angin ṭul bik thilah chuan MPSC khawih lai reng pawh a laksak thei. Tun hnaiah MIMER hnuaia thawk tur an lak pawhin MPSC kal tlang lo-in hna lian tak tak Department-in an la tih kan hre awm e.

Sawrkar hna hi eng ti anga lak tur nge? Hnaruak hnawh khah tur chu a neitu Department-in DP&AR (Department of Personnel and Administrative Reforms) ah dilna a thlen ang a, an ni’n an lo remtih chuan Finance Department-ah an dil leh ang, Finance Department-in an lo remtih ve bawk chuan hna ruak kha a hnawh khah theih ta tihna a ni a. Level 6 leh a chunglam a nih chuan MPSC ah thawn mai tur a ni a, MPSC-in a ṭul angin hma a la ang a, an lak felah Department-ah “heng mite hi kan lak (recommend) te chu an ni” tiin Department-ah a thawn let ang. Tichuan, Department chuan a tling te chu hna zawm turin a ko ang. MPSC rawtna hi sawrkarin a duh chuan a pawm lo ve thei tho tih erawh chu hria ila.

Hna lak tur kha Level 5 leh a hnuai lam (LDC, Peon, Constable, etc) a nih chuan Department-in a la tur a ni a, Department-in hna an lak dan, a tlangpui han sawi ila- Hnaruak hriattirna chanchinbuah an chhuah ang. Employment office-ah hriattir bawk tur a ni. Employment Exchanges (Compulsory Notification of Vacancies) Act, 1959 ang chuan hna reng reng thla thum aia rei thawh tur a nih chuan hriattirna chhuah (notify) ngei ngei tur a ni.

Written exam tih ngei ngei tur. Kan dan hman laiah chuan eng hna pawh, Peon hna pawh ni se written examination tih ngei ngei tur a ni. Amaherawhchu, hna diltu kha an tlem viau chuan written exam a ngai lo thung. Hna diltu kha personal interview atan thlitfim an ngai a, a thlitfim nan written exam buatsaih chu tih makmawh a ni. Central sawrkar leh state ṭhenkatah chuan hna hniam lam thawk tur lak dawnin interview an ti tawh ngai lo tih kan hre awm e. Written exam-a ti ṭha apiang te kha an ko mai a ni.

Exam Syllabus: Recruit­ment Rules-ah syllabus a awm loh chuan common syllabus hman tur a ni. English, GK, Arithmetic te exam tur a ni a, Group C leh a chunglam chinah chuan basic computer knowledge a tel thung.

Personal Interview: Hna ruak tam dan azirin personal interview nei tura koh zat fel taka bithliah a ni. Hetiangin post 1 ah 3, 2=7, 3=9, 4=11, 5=13, 6=15, 7=17, 8=18, 9=19 leh post 10 leh a aia tamah chuan hnaruak let zel a ni. Hetiang zat aia tlem hi diltu an nih chuan written exam buatsaih kher a ngai lo.

Supreme Court thuchhuak angin interview hian written exam mark 12.5% aia tam a pu tur a ni lo. Interview-ah hian interview mark put zat 80% aia tam emaw 40% aia tlem pek loh tur a ni. Entirnan, written exam kha mark 200 pu ni ta se, interview khan mark 25 a pu ang. Interview-ah chuan mark 20 aia tam leh mark 10 aia tlem a hmuh theih loh tihna a ni a. Written exam-ah khan miin mark 11 emaw, a aia tam emaw-a hma a hruai chuan a leh pelh theih tawh loh tihna a ni. Interview Board kan tih Departmental Promotion Committee hi Department Secretary chair-na hnuaiah siam vek a ni.

MR leh Contract-a thawk turin inthun mai theih a ni em? A chhanna chu “a theih loh” tih hi a ni tawp mai. Mizoram sawrkar hian a tihdan phungah chuan “hna ruak hi regular-a hnawhkhah a nih loh rau rau chuan Group A leh B contract-in, Group C leh D Muster Roll in hnawhkah tur a ni” tih a ni.

Level 6 leh a chunglam chu contract pawh ni se MPSC kaltlanga lak tur kan tih tawh kha. Chuti a nih chuan contract chuan a inthun ngawt theih loh tihna a ni. A nih leh MR tal pawhin… A theih chuang loh. Tun hma deuh chuan Department-in MR hnathawk a lak dawnin DP&AR leh Finance Department phalna a neih tawh chuan officer ho-in an duh sak zawng an la mai ṭhin a. Kum 2014 khan sawrkarin thu thar a nei a, Department-in MR hnathawk a lak dawn reng rengin a ngheta thawk tur lak dan ang chiahin tih vek tawh tur tih a ni ta bur mai a ni. Chu chu a hmalama kan sawi tawh ang chiah kha a ni.

MR te hi chi hrang hranga thliar an ni a, a hniam ber chu thiam thil nei lo (unskilled labourer) tih a ni. Tunah chuan a chunglam chu sawi loh, unskilled labourer-a lut tur pawhin exam hautak tak leh personal interview paltlang a ngai ta vek mai. (hautak kan han tih chhan chu syllabus hi a huam a zau a, English, Indian history & culture, geography, current events, Arithmetic-ah ratio & proportion, simple interest, permutation, etc te a tel nuai vang a ni) MR thiam nei lo ni tur pawhin Director aia sang Secretary chair-na hnuaiah interview paltlang vek a ngai. Thiamthil nei lo (unskilled labourer) ni tur pawhin thiam ve tawk tak (skillful labourer) nih a ngai tawh an ti fiamthu ṭhin reng a ni.

Department hnalak hi a fair em? Kan dan neih anga tih a nih chuan a fair lo thei lo tih hi kan chhanna chu a ni. A chhan chu hna zawng zawngah written exam tih vek a ngai a, written exam paltlang lo chu inthun ngawt theih a ni lo. Writtten exam paltlang zingah pawh personal interview mark put hi a tam lem lo a, 80% aia tam lo, 40% aia tlem lo pek tur tih a ni leh bawk si. RTI hmangin kan answer sheet leh interview mark a dil chhuah vek theih bawk si a. Hetiang taka dan felfai hnuaiah hi chuan a thianghlim lo thei lo a ni.

Tunlai chhanah minute hnih khat chhung lekin thil kan inhrilh kual vek thei tawh si a, hmingchhiat hi tu paw’n kan hlau vek a, a tu-a mah hian fair lo deuhin an ti ngam tawh lo tih hi ring bur mai ang u.

K. Lalkroschhuanga, ATI