Zirtirtu 946 lak tur hi...

MNF kaihhruai Mizoram sorkar thar hian sorkarna an chan aṭanga thla 4 chhung vel lekah hna tam tak an thawk hman a. Aizawl lei verh an tum thu tuna kan Chief Minister Pu Zoramthanga hian opposition an nih lai aṭanga a sawi ṭhin chu sorkarna an chan tuk lawkah bawhzui a ni a, a ropui.

Khatiang taka viak tha CM leh sorkar hotu kan nei khan mipuite pawh min tiphur hle niin ka hria.

Tuna an hma­chhawp lian ber zinga mi zirtirtu 946 lakna tur pawh hi Mizoram hian kan ṭhat pui hle turah a ngaih theih. Zirtirtu indaihloh avanga kan buaina tawp hlei thei lo pawh hi kan sorkar chak tak hian a rawn ching fel thei ngei dawn niin a lang ta.

Thil pakhat kan ngaihtuah tel tur erawh chu fly over a ni emaw, lei verh a ni emaw, zirtirtu lak leh office/ institution hming thlak pawh ni rawh se, kan sorkar hmalakna reng reng hi tu party emaw huat leh er vang emaw mimal thila intaina avanga chetlakna awm lo se, ram hmasawnna tur chauha ngaihtuaha tih ni ṭhin se a duhawm ngawt mai.

Hmasawnna chu opposition party mi leh sa te pawhin kan duh a, rulling party tan a duhawm hlei hlei. Kan thil tih duh danah hian rilru dik tak kan put a ngai a. Sorkarna vawn fung chelhtute tan phei chuan ui bauh nazawng beih let zel ang deuha chet lak chu a finthlak lo hle turah a ngaih.

Chuvangin MNF sorkar thar hma­lakna chak takah pawh hian rilru puitling tak puin midang tihelna ang deuha thil tih awm lo se.

School Education minister Pu Lal­chhandama Ralte in March 15, 2019 a Mizoram Legislative Assembly session-a ‘MR zirtirtu lak tum thuah hian dan in a phut ang ngeia tlingte lak an ni ang’ tih ang deuha a lo sawi tawh chu a hnua Council of Minister meeting chuan danin a phut ang ni loa zirtirtu lak an tum nia ngaih theihin an rel leh a. Hei hi, India ram pum dan khat hnuaia zirtirtu lak dan kalphung duangtu National Council for Teacher Education dan palzutna pawh a ni hial thei.

Zirtirtu lak tur thu kan hriat tirh khan thil hriat thiam loh deuh a awm hman a, chu chu zirtirtu ni turin dan anga Mizoram Teacher Eligibility Test (MTET) paltlang ngai lo tura anga thu awm khan a bikin Mizoram zirna hmakhaw ngaitute rilru a mangang a. Zirtirtu ṭha ber ber ni loin party induhsakna avanga lak mai mai a awm an hlau a ni.

Mizoram sorkar school ten private school te an tluk tak loh viau chhan hi zirtirtu indaih loh vang nge zirtirtute quality ṭhat tawk lo tam vang leh in enkawlna mumal zawk awm loh vang tih pawh hriatthiam a har e. Zirtirtu chu eng zata tam pawh sorkar hian la mahse hna lak dan leh kan kalphung zawk hi a dik loh chuan zirna lama Mi­zo­ram buaina hi a reh phah lo maithei e.

Ramhmangaiha