MIMER hming thlak lul lo ang u

Mizoramin medical college kan neihchhun, kan chhuan em em - Mizoram Institute of Medical Education & Research - MIMER chu MNF party kaihhruai sorkara Cabinet meeting chuan 'Zoram Medical College' tia thlak turin thutlukna a siam a; media hrang hrangah sawi zui a hlawh hle mai. Kum khat pawh a pumhlûm hmain a hming thlak kan tum nghal mai si a leh!

A hre zawkte sawi danin, MIMER hi an din ṭan lai velin a hming tur uluk takin an ngaihtuah a, a kaihhnawih thil hrang hrang ngaihtuah chungin MIMER tih hi an phuah ta a ni awm e. A hming hi a nalh emaw, nalh lo emaw, mipui pawhin lungawi takin kan pawm tlangpuiin a hriat.

Media hrang hranga kan hmuh danin, Cabinet meeting-ah MIMER hming thlakna tura rawtna awm chu 'Mizoram Medical College' tih a ni a, an thutlukna erawh chu Zoram Medical College tih a ni thung. Cabinet meeting-a rawtna, Mizoramn Medical College tih hi a ṭhat lohna emaw, a fuh lona emaw ka hre vak lo a, a tira a hming an phuah chu ni se, kan pawm thlap tur tho a nih hmel. Mahse, MIMER tih hming a lo pu tawh si a, Mizoram Medical College tih chu eng anga nalh pawh ni se, thlâk kher erawh thil ṭul a ni lo.

Hming thlak hrim hrim hi 'loh theih loh' a nih loh chuan tih lo a ṭha, hming thlak chhen chu ze nghet lo, rilru nghet lo, mi lê-lo nihna a ni. Hming hmasa ber (original name) hi a hlu a, hnam dang pawhin an ngaihlu niin a hriat. Bombay, Calcutta, Madras, Gauhati, etc. tih hming chawiin high court leh university-te a awm a. Heng khaw hmingte hi tunah chuan - Mumbai, Kolkata, Chennai, Guwahati tih ni tawh mah se, an hming chawia high court leh university dinte erawh chu tun thlengin a hming an la thlak hlawm lo zu nia!

Pawl hrang hrangin emblem/ logo, motto, etc. kan nei ṭhin a, a siamtu leh pawmtu chu an committee sang a ni tlangpui a, thlak theitu pawh an ni nghal ṭhin. Kan emblem/ logo, motto, etc. te chu din/ phuah/ hman ṭan a nih laia ṭha tak, tun hnuah erawh chuan kan duhthusam vak lote pawh a ni mai thei. Tin, tunah chuan emblem/ logo te phei chu computer software hmangin mawi tak takin a siam theih tawh. Chutiang chu ni mah se, thlak erawh thil tih chi a ni si lo. 'A thlak theitu kan ni alawm, a aia mawi leh kimchang zawkin siam ang u,' tiin kan pawl emblem, logo, motto, etc. te hi thlak chhên mai ila, kan va buai dawn tak em.

TV news-ah MIMER hming an thlak chhan chu 'A hming lam a awlsam zawk nan,' tih a ni a. MIMER tih hming lam hi a harsa lo a, a hming lam turin harsatna nei tu nge awm? MIMER tih hi lam hnih (mai-mar) a ni mai a, lampum nei ni mah se, MIMER tih hian lâr se, hria ila, a tâwk em em; a lam/ sawi lah a awlsam narawh e.

Tin, hming lam har leh lam awlsam tih hi chhuanlam a tling lo. Supply department kan tih mai te, Labour & Employment kan tih mai ṭhin te, Forest department kan tih mai ṭhinte kha tunah chuan a hming a sei ta hle; lam dik chu sawi loh, graduate/ master degree holder tan pawh a hming dik tak hriat pawh a harsa ta. Tunah pawh hian lehkhathiam kan tih zingah an hming dik tak hre lo an awm tam ve fe ang. An hming dik tak hriat a harsat avang hian an hming thlak a ni ve dawn em? Dawn lo ang; a chhan chu - Congress sorkar kutkawih an ni ve lo. MIMER erawh chu Congress sorkar kutkawih liau liaua ngaih theih a ni tlat.

Hming (official name) thlak hi thil awlsam tak, kalpah mai mai theih a ni lo. Mimal hming thlak tur pawhin buai ve hrep a ngai. MIMER hming pawh hi thlak tak tak dawn ta se, tih tur tam tak a awm ang. Medical Council of India/ sorkar laipui lama registration/recognition buaipui hrep a ngai ngei ang a; ṭul loah thawktute an buai phah hrep dawn. Medical Council of India hian Zoram Medical College tia thlak chu a pawm kher lo ve thei bawk em?

MIMER hming thlak ni ta se, employee leh zirlaite (mi tam tham tak)-te identity card, seal zawng zawng, engkim a ni mai - thlak vek a ngai dawn. Ṭul hauh loah thawktute'n hna an neih belh ṭeuh dawn a, an buai phah dawn a, an hah phah dawn hle. Chu'ng zawng zawng aia la pawi zawk chu - thawktute leh zirlaite zawng zawng an tihnual leh an tilunghnûr hi a ni.

Sawi tawh angin, MIMER tih hming an phuah hian awmzia thûk tak a nei a; hmathlir thui tak neiin, research institute nia post graduate zir theihna a la nih hun turte thlir chungin a hming hi an phuah a ni âwm a. Thil ṭha tak a ni ngei ang.

Tuna a hming thlak an tumna - Zoram Medical College tih erawh hi zawng, thlak an awlsam ang bawkin a ril lo ve thlâwt. Tih-Mizo tumna vang a ni lo a, Central aṭanga sum hmuh a awlsam phahna tur a ni lo a, hma a sawn phahna tur a ni lo a; tuna Chief Minister leh MNF President Pu Zoramthanga hming nen a inzûl vang leh an er ber Congress sorkar kutchhuak a ni vang liau liau a ni tih hi Mizoram mipui zawng zawng rilrua a lan dan a nih hmel.

He kan ram hming hi Zoram a ni lo a, Mizoram a ni a; kan sorkar hi Govt. of Zoram a ni lo a, Govt. of Mizoram a ni. Hming thlak hrim hrim pawh ṭul lo tih tawh nâk alaiin, 'Mizoram' ti loa 'Zoram' tih a ni ngat phei hi chu hriatthiam har tak a va ni em! Titi-naah chuan kan ram sawi nan 'Zoram' tih kan lo hmang ṭhin a nih pawhin, ziaka dah thilah leh hming dik (official name) ang chi-ah chuan hman loh a ṭha zawk a, 'Mizoram' tih zel hi a dik zawk chu a ni.

Mipui vantlang hriat dan tlang­puiah chuan - MNF sawrkar hma­sak laiin Referral Hospital sak hna tak tak ṭan a ni tih te, hospital building lian tak leh staff quarters tur tam tak an sa tih te, damdawi in chu a zûzî hle a, kohhran pakhat hnenah hlan an tum tih te, staff quarters-te pawh luahlum lohin a awm a, ar vulh nan an hmang tih te, 5th. IR battalion-in awm nan an hmang, tihte a ni. Hengte hian a tihchian chu, MNF sawkar hmasa khan Referral Hospital kha an hlawhtlinpui vak lo, tih a ni. Medical college phei chu sawi rîk a awm lo hrim hrim niin a lang.

Kum 2008 aṭanga Congress party-in sawrkarna an chan hnuah, term hnih chhungin Referral Hos­pital chu ṭha takin an tipuitling a, medical college hial an din a; an champion pui tih theihte pawh a ni ang. Congress sorkar kha sawisel leh demna tur tam tak a awm rualin, State Referral Hospital leh MIMER din chungchangah hi chuan an fakawm viau mai; MNF-te pawh hian thîka er mai loin, lawmpui zawk thei se a va mawiin a va Mizo dawn em.

Tunah MNF-in sawrkarna an chang ve leh ta a. An sawrkar tirh phat aṭangin MIMER pawh an ngaihven nghal hle a ni âwm a; an ngaihven dan erawh chu, tihhmasawnna tur lam ai mahin, hna kal lai (infrastructure development work) an chhawr ṭangkai dan tur a ni mai thei.

Thawktute sawi danin, MNF an sawrkar hnu rei vak loah khan hnathawh kal lai hrang hrang tihtawp a ni a, thawktute pawh an mangang hle. Thil kal dan thlirin, MIMER chu a kal hlei thei dawn loin an hria pawh a ni mai thei, an hotute chuan an MBBS zirlai awm mekte chu medical college danga sem darh dan tur an ngaihtuah hman hial a ni âwm e. Mahse, chutiang ngai em loin, dan pangngaiin an la kal zel thei ta rih a nih hi. Ngaihtuah a tithui hle mai!

Ngenna

Pute u, MIMER-a thawk mekte leh zirlaite saw in tikhawngaihthlak lua e. Politics-a inerna vanga ṭhalai leh zirlai, politics ngaihven ve lo, rilru thianghlim tak takte rilru in hliam a ni tih lo hre ve hrâm teh u. Zirlai zingah hnam dang eng emaw zat an awm ve bawk a, hnam dang hmuhah pawh Mizo­ram in timualpho lutuk dawn. Hotu­te u, khawngaih takin inphah hniam ula, MIMER hming thlak in lo rêl tawh hi chu sût leh lul teh u.

T. Zothana Khiangte