Serchhip Bial By- Election hi Kan Boycott ngam ang em le?
Inrinni (Saturday) leh Chawlhni (Sunday) hi Kristiante ni serh pawimawh a nih hre rengin Election Commission of India chuan Serchhip biala by-election neih ni atan leh vote chhiar ni atan an rawn ruat a ni.
A hun leh ni hre rengin Mizo People Forum (MPF), Zoram kohhran hrang hrang intel khawm chuan phur takin, inthlan dang ang thoin an lo phurpui a. Tu tu ten emaw heng ni te hi kan sakhaw ni serh leh pawimawh a nih hriain Chief Election Commissioner hnenah sawn turin an dil a. Mahse, vawiin ni thlengin Election Commission lam chu an la ngawi ta a ni.
Kan political party leh sawrkar che vel thlirin, sawn tur nge sawn loh tur tih hi an thlir mek a nih a rinawm ngawt mai. Kan Kristian ni pawimawh ber bera hetiang an rawn nghat/ rawt ngam hi mak ka tiin ka rilru a tina takzet. Ni dang a tam tehlul vei nen kan sakhua, Kristianna engamaha an ngaih lohzia, Mizo mipuite pawh eng thama min ngaih lohzia an pholang chiang hlein a lang.
Chuvangin, he nia inthlan leh vote chhiar nan hman an tum tak tak nia a lan takah chuan Mizote hian kan Kristianna hi kan la thu-tak hle a, palzut mai mai chi kan ni lo tih Election Commission hian an hriat fiah leh zual a, an pawm ngei na turin, political party tin, candidate nei party zawng hian Inthlan boycott hial pawh kan ngam a ni tih hi kan tarlan a hun tawh lawm ni?
Party mal hian boycott lo hreh deuhin, tute party emawin an boycott ve si lo vang a, awlsam tein an tling bik ang tih an hlau a nih pawhin, ruling party tal hian a boycott ngam em? Tu emaw MLA a rawn nih ve khan ruling party a nghing miah lo; a pangngai reng a ni.
Kan sakhuana vawng him a, vawng zahawm tur hian tu party nge rawn pen chhuak ang? A nih loh vék pawhin MPF tal hian party tinte hi, kan Kristianna humhim nan inthlan boycott tur hian an ngen ngam lawm ni?
Kan sakhaw ni pawimawha inthlan te, vote chhiar te hi chu a tlawm thlakin a mualpho thlak. Tun hnu zelah pawh hnam dang leh sakhaw dangte chuan min nuihzat ngawt ang le.
R Laldanglova, Armed Veng, Aizawl