MR. HINDUSTAN: Soledad! (The Great Indian Turmoil)

India ram ropui tak nihna hi a mi chengte 'The Great Indian' ho hian kan hre nual awm e. Zanin chu rilru ah a awm deuh tlat mai. Duhsaktu leh hmangaihtu Central hian a khua leh tuite hi min tiduhdah ka ti fo.

Citizenship Amendment Bill avanga ṭapa kan rumna chu min hnawlsak a, CAA-ah a lo chang a. Duh lohna lantira awmte kutthlakte hmun tam takah a thleng a, nunna chan tam tak an awm phah a, hna chan leh nihna chan an tam phah hle. Modi-a'n eng nge a tih? JNU, Delhi-a tun hnai maia thil thlengte kha, India vrs India. Hum saab bhai hai? Hei hi chu The Great Indian Turmoil a ni chiang alawm.

American Civil War-ah khan Abraham Lincoln chuan a ram pumpuia remna muanna leh inpumkhatna a awm theih nan mi 40,000 vel a thawh a, a ruai a nia. Mao Zedong khan China-a economic lama hmasawnna a awm theih nan ṭhalai rual sang tel a ruai a, a ṭanpui a! Keini Economic - Kawihsapir ve te hi! Modi ka paisa kaha hai?

Winston Churchill khan British sang tam tak a ram venghim tur leh Nazi thlipui tidai turin a thuam chak a. Pu Gandhi ve thung kha chuan thawm ropui tak 'Non-violence ' hmangin Hindu leh Muslim-te a ṭhen hrang ta thung a. Hindu historian chuan ziak duh hek lo, heng hi a ri tam lo ang. Harijan 'Children of God' te phei chu!!!

Iron Man of India an tih VB Patel te khan 'Culcutta Killing' an tih maite kha a hmu lo nge, a hre lo lui tlat a ni awm a; hming ropui tak chu Hindu lalram chuan a khumtir ta tho a! Sawi tur a tam, kan hril seng lo! Kan Krismas ni ber khera Lucknow khawpuia Vajpayee lim (statue?) an han hawng te, Good Governance Day-a an puang te, etc. ka helh ṭhin kei zawng! Zo chhang leh kurtai ei an titui lo.

India ram Ek India: One Nation, etc. hian 'Divide and Rule' policy hmangin hnam leh sakhaw tlem zawkte hi min ching phar vel mai mai dawn niin ka hmu. Zirna in hrang hrang an din mek a, BJP, RSS, Hindutwa, etc. tum thuhmun, chhul khat chhuak vek an ni.

Nepal Hindu lalram mah democracy rama an siam lai a, keini Indian democracy-te hi fascism-ah an leh teh daih! Kan India kawng zawh hi a fuh ṭan riau nge, a fuh lo tulh tulh? Khawvel hruaitu dangte leh keini hruaitu ṭhenkhatte kar hi a hla ka ti ṭhin. Chuvangin, keini (Mizoram tal hi chu) kan ram zimte tal hi chu Hindu hmanrua atan i phal ngai lo ang u. Chuti a nih loh chuan Mr. Hindustan-te khuan rairah min ṭahtir palh ang e!

- Malsawma Pa