Plastic nena indona

Tunlaiin Myanmar sipai leh A.A indo tum ut ut thawmin Zoram beng a verh hle a, indo thu rau rauvah plastic nena indona lam zawk hi in thlir daih teh ang!

Plastic bag (polythene), plastic bottle leh plastic chi hrim hrim hian ṭawih ral turin kum 400 aia tam mah an mamawh a. Hetiang a nih avang hian khawvelin plastic kan hman

ṭantirha ta hman nawn leh tura siamṭhat (recycle) lohho zawng kha chu khawilaiah emaw hian an la chambang reng dawn tihna a ni. Mizote pawh hian plastic bag kan hmang nasa hle mai, a awlsam phian si a le, a ziaktu ngei pawh hi a hmang ṭhin tho ka ni! Engtin hian nge kan khawvelin plastic hi a buaipui tehreng, i lo thlirho dawn teh ang u.

Hman hnu in chhek khawm: Khawvelah hian kum tinin plastic chi ho, 8 million metric ton vel hi tuifinriata paih ziah anga chhut a ni a; a paih tawhho tlingkhawm nen chuan tuipui-ah hian 150 million ton vel chu ṭawih thei tawh si lovin a then kual reng tihna a ni.

Khawmual nen phei chuan eng ang taka nasa ni ang maw! Mithiamte sawi dan chuan kum 10 a ral leh meuh chuan plastic 250 million metric ton vel hian kan tuifinriat luah tawh turah an ngai a, kum 2050 ah phei chuan khawvel tuifinriata sangha (fish) ai mah hian plastic chhia ho hi tam tawh tura ngaih a ni.

Plastic chhia hmun 6-a ṭhena hmun 1 hi plastic bottle kan tihho hian an chang a, ‘PET’ an tih mai (Polyethylene terephthalate) tih niin, khawvela plastic bottle za zela 14% bak hi recycle an ni lo.

Heng plastic chhiaho hi tuipuia nungcha (marine animals) hote’n ei theih emaw tiin an ei a, tam tak an thih phah tawh a ni. Heng zooplanktons aṭanga whale thleng mai hian sa chitin rengin an thih pui tam tawh em em a ni. Chutiang zelin khawmual lamah pawh lei a tichhe nasa a, thlai chin theih tawh miah loh turin hmun engemaw zat chu heng plastic chhe ningnawi hian a khawih chhe tawh a ni. Thilhote lei tur pawhin plastic bag (polythene) kan in pe zel a, hman a lo awlsam phian bawk si nen. Nimahsela, khawvelin a buaipui ṭan ta hle si a nih hi.

Hman nawn leh (recycling) turin: Plastic chheho hi hman nawn leh tura siam a hautak hle a, khawvela kan plastic chhia hman nawn theih tura siam ṭhat leh hi a tlem tham hle a; siam ṭhat tlemte bak zawng hi chu a leng kual ta vel mai mai a ni awm e.

India hian plastic chhia 15,000 tonnes vel kum tin a nei ṭhin a, vanneih thlak takin plastic bottle recycle lamah hian hma kan la ṭha hle. A chhan pawh kuthnathawktu leh bawlhhlawh chhar (garbage pickers) an tihho hian chhar khawmin a hmun puiah an va dah ta ṭhin a. Chu chuan kawng tam takin plastic chhia hman nawn leh kawngah India a pui a ni. India anga garbage pickers awm lohna ram, ram changkang kan tihhovah chuan chhartu tur awm ve hek lo le, an tuipuiahte a lang ta nuai nuai mai a, an kawtkai te fai viauin, an khawsak sang hle mahsela ram tam tak hi chuan an hnawmhnawk paih vang hian tuipui leh nungchate an tichereu in an tichhe ve hle tho mai. Keini lam phei chu kan khawsak dan, kawtkaia blawhhlawh thehthang dan thleng hian duh thu kan la sam chiah lo hle niin a lang.

Social entrepreneur Thato Kgatlhanye chuan plastic chhiate char khawmin process a kal hnuah sikul bag nalh takah a siam a, bag-ah hian solar power unit dah nghalin zanah naupangin lehkha zir nan a eng (light) hi an hmang thei nghal a, plastic thehthang mai mai lova hman ṭangkai dan an hre hle. India mi, Bengaluru lama lar tak, Ashwath Hegde chuan thlai aṭangin ‘organic bag’ plastic bag ang zet, plastic ni miah si lo a siam chhuak a, tunah hian plastic bag thlak nana hman ṭan tum mek a ni.

Plastic nena indona: Plas­tic chhia leh khawvel a indo mek lai hian mi thiamte chuan plastic rang taka ei zawp thei thil an ngaihtuah ve mek reng a. Fungus chi khat Aspergillustubingensis an tih mai hian hun rei lote chhungin plastic ho hi a ei ral thei tih hmuh chhuah tawh a ni awm e. Nimahsela, khawvel hmun hrang hrang hnawmhnawk leh plastic chhe tinreng paih khawm eiral tur erawh chuan hun a la duh rei hle dawn niin a lang. Kum 2016 khan Japan Scientist ṭhenkhat chuan helam hawi research an nei a; a hlawhtlinna pawh hmu zel turah an inngai.

Singapore khua hi khawvel mak tih khawpa fai a ni a, hetiang taka thianghlimna kawnga an hmalak ṭan hun hi Prime minister Lee Kuan Yew hunlai aṭang khan a ni awm e. Bawlhhlawh paih chu sawi loh khawlaia chil chhak ringawt pawh US dollar 217 zel deuhthaw chawi theihna a nih avangin dai sual luih ngam har tak tur a ni. Ram ṭhenkhat heng, Beijing, Sydney, Indonesia, Istanbul-ah te hi chuan plastic bottle ruak hmangin rel (train) leh bus-te a chuan theih tawh a ni awm e! Bus leh subway ticket atana pawisa pek aiah plastic bottle ruak an pe zawk tihna a nih chu! A awmzia berah chuan an khua chuan pawisa aiin thianghlimna, ram leilung leh ṭhangthar lehzel turte hmakhua an ngai tihna a ni.

Sawrkar chu plastic bottle lakkhawm avangin a hlawk dawn lo hle tih chu tlang hriat a ni. Plastic chhia then fai nana hetiang tih nachang an hria te, pawisa aia thianghlimna an thlang zawk leh nakin hun an thlir pha erawh khawvel thlir rawn leh mak tih a tling thung.

Han ngaihtuah teh mah, a chunga kan sawi taka tel ve lem lo heng kan toothbrush chhia leh Appy/ Frooti fawhna (straw) chhia kan paih tlingkhawm ringawt pawh hi kum khatah chuan tam tham tak tur a ni. A hman lam kan chak si a, a tihfai leh tihral lam erawh a ngaihna kan hre leh der si lo. Kan tu leh fate khawvel lo awm zel tur ngaihtuah phei hi chuan luhaithlak chang a tam hle.

Tun laiin mi ṭhahnemngai zualte’n Tlawng lui leh Chite lui an thianfai tih thu hriat te hian thla a timuangin beiseina thui tak mi a neih tir fova, chhunzawm tlak tak pawh a ni. Mipui mimir leh pawl hrang hrangte hian kan mihring puite kan buaipui piah lamah hian kan chhehvel environment thleng phak ngei turin kan huang zauh tum ta ṭhin ila, kan ram hian hma kan sawn phah ngei ang.

Anggu Khawlhring, Salem