Rangvamual leh Serchhip
Aizawl khaw daia awm, veng hmingha lo ber zinga mi chu Rangvamual hi a ni a, zu leh ruihhlo tamna a nih vangin a hmingchhia a ni. Serchhip khawpui hi chu Mizoram hmun laili taka khawpui ding a ni a, hming ṭhatna kawng tam tak sawi tur neiin hming chhiatna leh hming hliauna a nei hranpa lova. Rangvamual leh Serchhip hian inzawmna a nei lo.
Rangvamual leh Serchhip inzawm tir tu chu MNF President Pu Zoramthanga chiah hi a la ni awm e.
Serchhip bial hian duh takin Pu Lalduhoma chu MLA atan an thlang tling a, rei tak MLA ni tawh Pu Lalthanhawla a hneh a, chumi a hneh theihna tur chuan ZPM hmingin a campaign a, ZPM Manifesto hmangin a inzuar a ni. Pu Duhoma khan kum 2018 inthlan dawn khan, "Independent candidate ka ni," vawi khat mah a ti lovang a, "ZPM Candidate ka ni," tiin ZPM Flag nen a campaign a, ZPM Symbol lukhum chu a hmang bawk a, Pu Duhoma kha Serchhip bial mipui in an duh takin an thlang tling a ni.
Pu Duhoma chu MLA a lo ni ta ngei a, Assembly House chhung ah a thiam na a han show ta a, thil a hre si a, thil dik lo a sawi chhuak hreh si lova, sorkar lai (MNF) tana mualpho thlak tak tak thil a sawi chhuak ta nual mai MLA a nih miau avangin Assembly House ah thu a sawi thei tlat a ni. Chu tah chuan MNF Presidernt tana zahthlak turte pawh a lo sawi fuh ṭhin ni ngei tur a ni, MNF MLA te chuan Pu Duhawma chu, "Independent-a thlan tlin ni si ZPM Party Office ah thu a sawi a, ZPM ah mi a lawm lut," tih vel chhuanlam ho tham tak hmangin an hek a. An hekna thu chu MNF MLA tho Speaker-a an dah tak chuan a ngaihtuah a, Pu Duhawma chu Serchhip mipuiin an duh taka an thlan a ni chungin Serchhip mipui rawn miah lovin an ban ta a ni.
Serchhip-ah chuan bye election neih a lo ṭul ta a, Michael Chhakchhuak chuan MNF ticket a din ngei tumin a bial chhung fangin sum tam tak a seng a, MNF ticket-a dinga Pu Duhoma hneh lotu Pu Ramzauva zawk chu MNF in an din tir leh ngei rin a ni bawk a, mahse an zam deuh a nih hmel Aizawl lama tla tawh MNF Vice President Pu Vanlalzawma an rawn thur chhuak ta a ni.
MNF chu Serchhip khawpuiah an campaign ta a, Pu Zoramthanga chuan, 'Pu Zawma in thlan tlin loh chuan Rangvamual pawhin an nuihzat ang che u,' ti lam hawi zawngin Serchhip mipui a ṭawng khum ta a, hei hi Serchhip bial mipui tan chaun thu lawmawm tak a ni kher lovang.
Lalmuanpuia