Kan ram hruaitute leh Vision!

Tunlai hian kan ram hruaitupa ber Chief Minister Pu Zoramthanga hian a bikin mau leh kawng chhawng leh traffic tihbo dan tur scheme thar hi a buaipui hle niin a lang a. Hetiang ram hruaitu kan nei ta hi a lawmawm a, tun hma kum tam tak Mizoram an hruai chhung zawng te khan vision chu an nei fo tawh tho ang a, mahse vawiin ni hi Mizote min thlen pui theih chu a ni phawt mai.

Tunah erawh khaw­vel a changkang tawh ang bawkin kan ram hruaitute pawh an khawhawi a zauin an rilru sukthlek pawh a fing tawh zawk turah ngai ila. Tuna kan ministry tharin scheme thar a tlangau pui te pawh hi Mizoram tana scheme chhenfakawm ni turin a duhawm hle. Amaherawhchu, kan hotupa hian a sawi tam ang aiin a hote, kan Minister dangte hian an sawi lang zing lo a. Ka lo duhthawh deuh nge ni, Chief Minister berin heti taka a tuipui thil hi chu kan a hote pawh hian khawi lo an kalna leh function chi hrang hranga an thusawinaah te pawh hian an sawi lang ve ṭhin turah niin ka hria.

Kan chief minister hian vision hi a nei thei viau mai. Term hmasa lamah pawh MNF ministry lai te khan vision chi hrang hrang a lo nei tawh ṭhin a, a sawi pawh a sawi thiam hle ṭhin.

Mizo mipui tam takin kan hotupa thu­sawi hi innghah nana hmangin an eizawnna te pawh an lo thlak tawh hlawm a, mahse thil vanduai thlak deuh pakhat a awm - vawiin ni thlenga hian kan hotupa thu sawi bawh zuia eizawnna kawng dap ho hi mi awhawm tak an awm awm ka la hre miah lo!

Inlarna (vision) a awm loh chuan phurna a awm thei lova, chu chuan beidawnna leh inthlahdahnaah min hnuklut ṭhin. Kan hotuten vision ṭha, innghahna tlak an neih loh chuan mipuite chu beidawnna khurpuiah min hnuk lut mai dawn tihna a ni a, chuvangin beiseina min siam sak theihnan vision ṭha tak an neih theih erawh a pawimawh hle. A dik tak chuan kan tun hunah ngei pawh hian, eizawnna a lo vang a, sorkar hna in min daih seng tawh si lo a, mi tam tak chu beidawnna-in min nang vel a ni ber mai. Chu chuan hnam thatchhia angah min inngaihtir phah a, minister inah contract tenau leh therhlo eng eng emaw beiseiin kan vak lut a, mi hmuhsitawm tam tak kan in siam tlat a ni.

Kut hnathawktute lahin block leh unit hruaitu che fuh thei deuh deuh an hmuh vang ni maw, politics ringawt an atchilh a, therhlo beiseiin kan rilru a piang sual ta tlat mai, phur takin hna an thawk thei tawh lo. Hetianga kan rilru a lo dik loh chhan chu kan thar chhuah ang ang market-ah a buai ṭhin vang a ni.

Kan sorkar chak tak hian vision a tam ram thleng thei lo tur buaipui hmasa chiam chiam loin kut hnathawktuten thawh hah man an tel ngei theih nan, an thawh chhuah ang chhun chhun te a hralhna tur lam hi buaipui hmasa se. Chumi hnuah an vision neih ang te hi chu a tak rama chang thei turin bawhzuiin mipuiin hmaah sawi chauh se aw...

Ramhmangaiha