CAB 16 HI ZOFATE KAN RALNA MEIPUI TUR A NI (BJP leh a sangáwizawnpuite hian Lok Sabha term tharah pharh leh an tum?)

CAB 16 boruak alh zualpui a rèm lai tak hian khawnge kan tharthawh teh ang. India khua leh tui nih theihna kawng hrang hrang, ramdang mite India rama an lo kal leh khawsak hlen theihna tur hian India hian dan a nei ṭha takzet a, The Passport Act, (Entry to India) Act, 1920, The Foreigner Act, 1946, Indian Citizenship Act, 1955 leh Part-II of Indian Constitution (Article 5-11) ah te chiang taka tarlan a ni. USA leh ram changkànga kal tura Visa leh passport buaipui a hautakzia kan hre ṭheuh ang. Foreigner tan India khua leh tui nihna nei tur phei chuan a harsa takzet a ni.

India khua leh tui nih theihnate: Indian Citizenship Act, 1955-ah hian India khua leh tui nih theihna chi hrang hrang a awm. Chungte chu:- Citizen by birth - India rama piangte’n an neih theihna; Citizen by decent - thlahtute India rama piang; Citizenship by registration - India origin ni si, ramdanga khawsa te, India mi pasala nei te, etc; Citizenship by naturalization - ramdang mi te, hna vang emaw, thil dang pawimawh vanga India rama kum 12 aia tlém lo khawsa tawhten citizenship hi an dîl thei. Citizenship by incorporation of territory - ramdang, India rama in chhung lut an nihin a mi chêngten citizenship an nih theihna angte a ni. A chipchhiarin tarlang lo mai ila, heti hian a tlángpui chu kan hrethiam turah ngai ang.

Tuna kan buaina ber Citizenship Amendmend Bill-ah erawh hi chuan Hindu, Jain, Christian, Sikh, Buddhist leh Parsis-ten Bangladesh, Pakistan leh Afghanistan rama sakhua vanga tihduhdahna an tawrh vanga India rama an lo luh chuan document an nei emaw, nei lo pawh ni se kum 6 an awm tlin tawh chuan India khua leh tui an ni thei dawn tihna a ni. Tuna kan dan hman mékah hi chuan foreinger-te hi dan ang thlap, Passport nena lo lut thlap pawh nise kum 12 aia tlém lo India rama an awm tlin chauhin Indian Citizenship hi an dîl thei chauh a ni. Chuvangin, CAB hian kan Citizenship Act, 1955 hi a sâwi danglam dawrh dawn a ni.

BJP hian ramdang mite tan hian kawng hawn hi a tum riau niin a lang. Kum 2015 khan Passport (Entry into India) Amendmend Rules 2015 leh Foreigners (Amendment) Order te an lo pass tawh bawk a, Citizenship Amendment Bill, 2016 an lo introduce chhunzawm nghal bawk. Tuna CAB hi Parliament-ah a tlang palh hlauh a nih chuan foreigner tan kawng a inhawng zau sawt dawn tih a lang chiang ta êm êm a ni. Hindu lal ram din an tumna kawngah hian dan siam ṭhat phawt a ngai si a, dan hmanga kawng hawn sak hi an tum ber a ni ta a ni.

Supreme Court-ah Public Interest Litigation (PIL) thehluh a ni: CAB leh a kaihhawih dang te vàng hian organization pakhat “Nagarikatwa Aain Songsudhan Birodhi Mancha” (Forum Against Citizenship Act Amendment Bill) te chuan Supreme Court-ah PIL an thehlut a. Hetah hian CAB an dodal chhan ber chu Indian citizenship neihna tura sakhuana a pawimawh ta ber chuan Indian Constitution-a Secularism a kalh tlatna te, Assam Accord 1985-in condition a lo siam tawh 24th March, 1971 hnu lama Bangladesh aṭanga Assam state-a lo lut te dan lova lo pêm lût ‘Illegal Migrants’ an nihna chu awmze nei loa a chhuah tur thu te, National Register of Citzens (NRC), Assam state-a an kalpui méka hming lang ve lo te tan citizen nih theihna kawng a inhawn nghal vang te a ni.

He PIL-ah hian Passport (Entry into India) Amendmend Rules 2015 leh Foreigners (Amendment) Orderte hi nuai bo turin Supreme Court hi an ngèn nghal bawk a ni. Hetihlai hian Central sorkar chu National Immigration Commission din tur emaw, National Immigration Policy leh National Refugee Policy te duang nghal turin an ngèn nghal bawk. Amaherawhchu, he PIL hi ngaituah theih a la ni lo a, a chhan chu CAB hi Lok Shaba-ah chauh pass a la ni a, RajyaSabha-ah a la pending mék vangin leh Pass a la nih loh vangin Supreme Court chuan thuthlûkna a la siam thei lo a, a la pending mék a ni.

Mizoram tan a hlauhawmna: Mizo­ram hian chhim lamah Bangladesh a rî a, chhak lamah Myanmar kan rî; International Boundary kan nih vangin kan dinhmun a him lo takzet. Tunah ngêi pawh Bangladesh aṭanga lo lût Chakmate vangin buaina kan hmachhawn malh malh reng a, mihring inthlah chhawn dan ang aiin an pung chak tih pawh hai rual a ni lo. Tunah hian nuaih 1 an chuang ngèia rin a ni a, nasa taka inthlahpuna an hnampuite lak luh belh zel a, he ram sahthlak hi an tum ber a ni.

CAB pass a nih ngat phei chuan kan véng séng hauh lo ang. Tunah ngêi pawh thuneitu ten chêt lâk an tum miau lo a, kan Chief Minister fam ta Brig T.Sailoa’n hma a lak bâk kha chu Chakma foreigner hnawhchhuah leh thawn kir chungchangah kum 30 chuang zet hian kan sorkar hrawn tawh leh hrawn mékte hian hma pakhat mah an la la lo chu a nih hi.

Kan ṭhenawm Assam state-ah chuan thuneitu sorkar berin hma a la a. Foreigner Tribunal te dinin foreigner dap chhuahna kawngah leh thawn kir chungchangah nasa takin hma a la mék a. Dated 31st March, 2016 thleng khan mi 75,489 te chu foreigner-ah an puang a, tunah NRC an kalpui leh mup mup bawk. Hetihlai hian ṭhenawm state Arunachal Pradesh-ah chuan Permanent Residential Certifcate (PRC) Non-Tribal te hnena pek chhuah tum a nih vangin buaina namén lo a chhuak bawk a, mi ṭhenkhatin nunna an chán hial a ni. Hetiang khawp hian kan ṭhenawm state te an thîkthu a chhiatlai hian thuneitu ber, kan sorkar chu hemi kawngah hian thehmeh ang maiin a reh vang vang thung.

BJP hian CAB hi an pharh leh ang em?: North East state mipuiten CAB nasa taka kan dodal laiin dated 17th Feb, 2019 khan BJP National President Amit Shah chuan Lakhimpur hmuna a thusawinaah BJP-in kum 2019 Lok Sabha inthlana hnehna an chan chuan CAB an pharh (re-introduce) leh tur thu a sawi lang leh mauh mai a! Tun MP Election 2019-ah hian CAB hi an Manifesto-ah an telh tur thu a sawi bawk. President berin a sawi chuan BJP hian thuneihna an chan leh phawt chuan CAB hi kaltlang pui ngèi an tum dawn tih hi haider a har khawp ang. Tun dinhmunah pawh hian CAB hi lapse angin lang tawh mahse, Lok Sabha term tharah pharh leh theih a ni tih hi BJP hian an hre chiang hle tih Amit Shah thusawi hian a nemnghet bawk. Term tharah pharh theih a nih tawh loh thu hi kan danpuiah a in ziak miah lo bawk.

Eng pawhnise, Zofa hnam tlémtè te hian ‘Kan ram’ tih tur kan la nei hi kan vannei takzet a, kan ṭhenawm lawkah hnam vâkvâi, an lo chawr chhuahna hmun Bangladesh pawhin ram an pêk duh loh vânga helna chawk chhuaktute chuan kan pi leh pute lo sah zau sa ralmuanna ramah hian bû an lo khuar nghet tawh takzet a, khawvel ram zauvah anmahnia ro an inrèl theihna awmchhun a nih vangin Mizoram, an Jerusalem hi an lo pan ruih ruih dawn tih hai rual a ni lo.

CAB pass a nih ngat phei chuan Buddhist sakhaw zuitute hi an lo luh belh zel ang a, dan rual lohin India khua leh tui an nih piah lamah kan ram hi sat thla turin thapui an lo thawh zel ang. Chuvangin, CAB hi Parliament-ah a tlang hlauh ang tih hi Zofate tan hian a hlauhawm takzet a, râl pui phiara phiar chî a ni a, kan ral theihna tur meipui hi Parliament rorelna dawhkanah hian an chhep ang tih a hlauhawm takzet e.

Lalnunmawia Pachuau