BJP-in India bum a tum - Khawvel a bum thei lo
February 26 zing tho chu chanchinthar ngaihven mi te chu kan ka hauva, India-in Pakistan a kap tih an hria a, keini ang inti Indian ṭha duh vak lo te pawh Pakistan kah a nih avang chuan India lamah kan ṭang nghal ve mai a, mahse khawvel media lamin kha inkahna kha India media leh India sorkar tuipui ang a nih loh thu an hai lang chho mek. BJP-in Lok Sabha inthlan lo awm tura mipui ṭan hlawh a tumna niin mi tam takin an ngai.
BJP hian Indian media te chu a thunun hnehin kha thilah khan mi 300 chuang an thi niin an report a, Jaish-e Mohammad hel pawl awm hmun an bomb chhe vek niin an sawi a, mahse a hnu lawkah India sipai hotupa chuan thi zat sawi theih a ni lo a ti leh si a, BJP President Amit Shah lahin mi 250 chuang an thih thu a lo sawi ve hmanhmawh bawk si - thu dik hriat theih a ni tawh lo.
India tel ve lohna, BJP leh Congress lamin sawi theih an neih ve lohna, khawvel media lamin he thil thleng hi engtin nge an bawhzui i han thlir dawn teh ang hmiang:
The New York Times chuan India sipaiten an tihchhiat kha eng nge a nih a hriat loh thu leh, kha laiah khan JeM hel camp kha a awm leh awm loh pawh finfiah a nih loh thu an chhuah mauh mai a, inthlan lo awm tur atana boruak siamna mai mai a nih theih thu an ziak hmiah mai.
The Guardian chanchinbu lamin a ziah dan chuan kha India thlawhtheihnain a beih kha eng chiah nge tih a hriat loh a, thil tihchhiat a neih dan sawi theih a ni lo tiin February 14-a thihchilh bomb hmanga sipai tam tak thah an nih avanga mipui thinrimin sorkar an beih lohna tura thiam channa tura bei a nih theih thu an ziak.
The Washington Post chuan a tihchhiat lam an sawi lova, inthlan lo awm tur nen an ziah pawlh a, chutihlaiin US lamin India chet dan a dem loh an rin thute an ziak.
Al Jazeera chuan he thil thleng hi rin lawk theih thil, inthlan a hnaih tawh avanga India sokar tana tihmakmawh ang zawngin a ziak. Huffington Post report danin helai vela Pakistan mipui chengte chuan JeM awmna tak an bei fuh lova, an bomb thlakna hmun aṭanga kilometre 1 velah hian JeM ho hi an cheng ṭhin zawk niin an sawi.
BBC lam chuan India sipaite chetna vanga hliam tuar leh thihna thleng hi finfiahna a awm loh thu an ziak a, ‘No Evidence was Immediately Provided to Back up the Claims of Militant Casualties’ an ti a, India lamin hahipa an sawi JeM lam kah hlum hi BBC hian a hre ve lo a ni ngei ang.
Engpawhnise BJP-in inthlan awm tura boruak siamna atana an thil kalpui nia lang hi Mizoram kil aṭang hian India media-te thu chiah hriain kan lo tuipui a. Vai khuang ben rualin kan lo au ve vak vak ang tih a hlauhawm a nia! BJP hian Lok Sabha inthlan atana boruak siam an tumna hmanrua niin mi tam takin an puh der tawh a ni.
Lalrammawia, MZU