Ngaimawh tham

Kan ramah hian ngaimawh tur a tam mai. Chung zinga ngaihmawh tham chu Mizorama vai cement mistiri-te hian certificate hi nei ve tawh se tih hi. Pa pakhat chuan "Ka insak a helper a bang a, Mission veng lamah mistiri in a lo va thawk daih mai" a ti nia. Hetiang mai mai hi an lo ni deuh vek mai a ni awm e.

Skilled worker te chuan an thawh tur an thiam ngei tih entirna certificate an nei tur ni awm tak a ni. Kan khawpui hi risk-mualah kan chhuah a ni ta ber em tih a ngaihtuah theih rum rum ta mai. Ngaihtuah a ngai ta khawp mai. Vêng lehlama helper hi vêng lehlamah mistiri an ni daih thei.

Hei hi a ni hman ata tawh ka lo buaipui ve ṭhin. Kan mikhual, kan hnathawk tura kan chhawr, kan labour te hi mumal taka kan enkawl a ngai ka tih ve ṭhin a ni.

Skills Certificate, mistiri putlingin an thiam ngei tur kha an thiam ngei em tih kha en ngei ngei a ngai. DC office lamah pawh hian an certificate neih dan milin an ILP fee hi lo bituk sak se la. Mistiri leh helper ILP fee hi a in ang vek lo se revenue kan siam tam lehzual ang.

Ngaihtuahna pakhatah chuan Mizoramah hian assessing centre siam nise, LESDE kaihhruaina hnuaiah third party PWD-in kan vai mistiri te skills hi assess se, an ni'n certificate lo issue mai se.

Mipuiin chu certificate hmang chuan kan lo ruai ang.

Mistiri grade I
Rs. 850/- per day
Mistiri grade II
Rs. 750/- per day
Mistiri grade III
Rs. 650/- per day
Helper Rs. 450/- per day.

Chutia kan tih chuan kan vai mikhualte hi record kan nei thei ang. Work permit pawh mumal takin kan pe thei ang.

Hei hian hrin chhuah tur a ngah hle dawn a. Mi tam takin mistiri thiam vaklo kan chhawr fuh palh a, vuak ṭhiah leh ngai tih vel min pumpelhtir ang. Kan ram hi risk-mual aṭangin professionalism mualah kan chhuah ang. Work permit kan lak hunah pawh skilled worker grade milin fee kan la ang. Chumai ala ni lo, kan ṭhenawm vai mikhualte dinhmun chiang takin kan hriat phah ang.

2018 chho khan Planning Dept te nen ESDP on Construction Supervisor Course kan siam a. Chumi tuma kan course, zir tura kan ruahman, supervisor in a hriat ngei ngai tura kan siam chu Govt of India PMKVY milin kan duang a, kan siamṭha a. Er. R. Lalpeka IIT Kharagpur khan min endiksak vek a. A ṭha an ti hle. Chumi zulzui chuan mistiri assessment chu a siam theih a. A tehfung pawh awmsa a awm reng tihna a nih chu.

Thuneituten a rang lamin hma han la teh ule.

Joseph L Ralte