SERCHHIP BIAL MIPUI TEN DUH KAN THLANG THO THO DAWN!

Khaileeeee…..
Bye Election hun a hnai telh telh a sawrkar lam aṭanga sawn hlat a awm a nih loh chuan ni 5 chiahin min dang tawh e.

Serchhip bialin inthlan kan neih tur hi a pawimawh tih kan hre theuh a, Zoram chhung leh pawn mit kan fu vung ni rih deuh berin alang awm e.

Mahse.., hetihlai hian hmun hrang hrang, khaw hrang aṭanga mahni party aṭanga rawn candidate te thlang tling ngei ngei tura Serchhip mipui rawn address meuha in mi ngenna te a zahawm a, ṭhahnem in ngaihpui na te a ṭhat rual rualin, Party dang sawisel/ sawichhiat/sawi mualpho etc. in rawn nei/ zep tel kher ṭhin erawh hi chu Serchhip mipuite hian kan hlut viaulo a, a ṭul em em hran lo. Ṭhenkhat te phei chuan hna takah an nei emaw tih tura regular taka party dang sawichhiatna post siam ngar ngar tepawh hmuh tur a tam e.

Theihtawp chhuahin rawn campaign pui ula mahse hei erawh chu lo hre tel teh u, campaign mawihnai leh ṭawngkam leh in sawichhiat kher tumna ṭawngkam te a inanglo tih kan hre hrang ve a, benga a luhdan pawh a inanglo ṭhin hle. Chuvangin a hranpa a Serchhip mipui te hma a party hrang hrang rawn phawrh mualpho a mipui te rilru kawih pen lo tum kher angai hranpa lo, kan hmuh chin kan hria a kan ngaithla ve zel bawk e.

A chhan chu Serchhip bial chhungah hian party hrang hrang workers leh supporters te an awm ve a, I party support loh zawng an nih vanga party dang I rawn sawi mualpho tel ṭhin khan helai bial chhunga an supporters te rilru ah ngaihdan dang a thlen ve thei ṭhin a, hemi chungchangah chuan bialchhunga supporters te inkara alo awm zeuh ṭhin te hi kan duhtawk rih viau a, belhchhah vak kan ngai tawh rih lo e.

Engthil pawh nghawng lo nei se bial mipui ten mawh kan phur e. Bial mipui ten kan theihtawp chhuahin Serchhip bial tan kan hma hun thlir zelin vote kan lo thlak ang e.

Serchhip bial mipui te hi vannei kan han inti mai mai khawp a, heti tak mai a Serchhip bialtu nih chak a, bialtu nih tum a rawn in candidate ho hi han en vang vang la Mizoram chhungah hian an ni aia duhawm leh ṭhazawk tur chuang hi an awm leh tawh biklo tawp ang. Mimal tin te hi a tu a te pawh hian min bial dawn chiah se a zamawmloh e, bial tan theihtawp an chhuah theuh vek ang tih hi mimal tak pawn ka ring tlat a ni.

Nge ni a, Serchhip bial hian kan phu ve hrim hrim zawk nge ni!? Heti tak mai a mi bialtu innghahna tlak an nihzia pholang tura candidate paruk (6) ngawt an rawn penchhuak hi a ropui khawpmai.

Atawp ber atan, Serchhip bial mipui zawng zawng te kan hma lawka inthlan kan neih turah vote thlak theuh tum ila, chutihrualin ngaihtuahna fim tak pu chung zelin thu belchian dawllo hrang hrang hmanga inchirh­thehna te a lo awm ṭhin a nihpawn, thutak hla takah la loin kan bial tan, kan ram tan kan mawhphurh ve na kan vote hlu tak kan thlak theuh dawn nia.

Lalnunfela, Serchhip