CAA BAWK LE!

Tuna CAA kan sawi lar em em hi CAB a nih lai pawh khan Zoram dung leh vangah kan insawi hlauh siakin, kan induh loh siak tawh kha a ni. Hun a kal zel a, CAA a lo nih takah pawh sawi a hlawh chho nasa hle a ni. 

A ni lah tak a, he CAA hi han ngaihtuah chian chuan sakhaw zalenna a dal thei awm mang e pawh a tih theih awm e. Ram pathum aṭanga raltlan te, Mo­solman lo ho zawng chu India khua leh tui ni thei tura han duan tlatna hian sakhaw thlauh bik a nei tlat mai a, hei hian India secular state a nihna hi a dal riau chuan a lang tlat mai. 

Hei hi chu kan ram sakhaw zalenna lungphum nghawr nghingtu chu a ni ti ila kan sawi sual tam vak chuan a lang lo. Chuvangin, he lam aṭanga han thlir hi chuan he dan an passed tak mai hi chu dan ṭha lo tak a ni a tih theih mai awm e. A sut leh tura ṭan lak chu kan tih makmawh a nih hmel hle mai. 

Sut leh tura hma­lakna tur atan hian eng ang hmanrua nge kan hman ang tih lam hi chhut ngun a ngai fu mai. Mosia hunlai ang hrim a, ‘ha aiah ha, mit aiah mit’ ti zawnga hma kan lak mai chuan buaina zakhua a thleng ang. Chu ai chuan Krista ringtute chuan kan hmanraw ṭha ber ‘ṭawngṭaina’ hmanga kan beih let a ngai a ni. 

Tuna a lan dan hi chuan inpuhmawhna leh insawiselna nen kan hmanhlel a, kan hmanraw neih ṭha ber pawh kan hlamchhiah ti tih deuh der tawh zawng a nih ber hi maw le! 

Zoram mipui tu-ate mah hian he CAA hi ṭha ti kan awm chuan a lang lo. CAB a nih lai pawh khan kan political party hruaitute leh kan NGO hruaitute pawh khan do turin theihtawpin hma an la a ni. Central Home Minister hnenah pawh an duh lohzia chu an theih ang tawka insang marin an thlen a. Khatia an thlen hlawm avang khan min huam ve lo tur pawhin Home Minister khan a tiam ta reng a. Chumai bakah Mizo hlang awmna CRPF Batallion thlengin min tiam a nih kha maw le! 

Khatiang taka a tiam tak avang khan lawmthu pawh kan sawi ta hial reng ni khan hriat a ni. An lawmthu sawi nan an phar pui ve ta mai ni khan a lang. Kan duh lo a ni tih hriat avanga min huam tir loh ahnu hetia insawisel leh inrel vak vak mai hi chu kan tih loh tur, kan Pathian rinna kalh pawh ni hialin a lang thei zawk awm e. 

Tunah pawh khawi party mah hian he CAA hi ṭha ti an awm lovin, ṭha an ti lo tlang vek a, kan mimal ṭheuh pawh hian kan duh lo tlang vek chuan a lang. Chuvangin, a do nana kan tih theih ber chu ṭawngṭaina hmanga sut leh tura kan dil hi a ṭha ber mai. 

Kei ni chu he dan sakei hmang lo tur hian Pathianin min hung bik a, he min hung bikna hi kan neih reng theih nan leh he dan sakei hmang ramte pawh hi an lo zalen nana Pathian hnena thinlung leh tih tak zeta kan ṭawngṭai a ngai ta a nih hi. 

Hmana ‘Setana Bill’ Parliament a put­luh tumah pawh ram pum tih tak meuha ṭawngṭai rualna khan kori a tuk em kha maw! Chanchinbu lama insawi hlauh siak vak vak leh in duh loh siak vak vak aiin tihtak zeta ṭawngṭaina hian thil a ti thei ngei zawk chuan a rinawm e.