Tunlai titi leh buaipui Central Service

Tunhnai deuh aṭanga kan ram titi ber pakhat leh ziak tam takah Mizote Central Service/ All India Service-ah kan tlin tlem tak thu hi a ni. Tunhma 1960-80 thleng kha chuan North East state-te zingah Central Services lut chu Mizo kan tam ber reng a. 1990 aṭanga tun thlengin kan ngaihsak ta lo nge, kan khât ta pharh mai.

Hei hian rual û te leh politician te, sorkar thlengin a tizam a, an mangang a, an tlin theih dan tur ngaihtuahin sorkar hial a che ta a, thil ṭha leh lawmawm tak a ni. Engemawti zâwnga ngaihtuah erawh chuan heti em ema buaipui tak luih luih chu a tlawmngaihthlak lek lek te pawhin a ngaih theih.

Central Services zinga langsar zual IAS, IFS, IPS aṭanga retire tawh Chief Secretary te, Director General of Police te, Ambassador lai lo ni tawh engemawzat kan nei tawh a. Heng mite hian kan tunlai titi hi an zawm lovin engmah an sawi ve lem lo hian ka ngaih an ti ṭha lo. A ṭhatna leh ṭhatlohna a awm chuan sawi tur hre tur an nih tehlul nen, inziak tlin dan leh inbuatsaih dan tur ṭha te anmahni lo tih tawh dan aṭang pawh han sawi ve se. Mahni service leh thawh tawhna han sawi mawi viau chu an insum te pawh a ni ang e.

Chutih laiin Zonet [Azl] nge nge an bengvar ṭhin. Pu Lalduhthlanna Ralte IFS retired tawh chu an han kawm leh chat mai a, kha kha a bengvarthlakin a ṭangkai hle. LPS [Azl]-in an ti ve em ka hre lova, kan Lunglei cable network-te chuan tih nachang an la hre lo. Pu Duhthlana khan ama thawhna foreign lam hawi a sawi chipchiar deuh a, a kawmtu khan a sawipui tam deuh vang te pawh a ni ang. India ram chhunga thawk ngei Central Service-a mite han kawm leh sela a ṭangkai leh hle ang.

Central Secretariat Service hnuaiah Clerk aṭanga ṭan te pawh Joint Secretary thlenga inhlankai theih a nih thu a sawi te kha hna zawnglai te hian lo hria sela. Central hotu-a Joint Secretary chu kan state-a Chief Secretary level hi an ni. Heng hi hriain Manipur-a kan Zohnahthlak unau - Hmar, Paihte, Kuki etc te chu Delhi-ah an awm ṭeuh a. Mi In luahin a hnu deuhah an phû tawk quarters te hmu chho-in, promotion te an hmu chho zel a, Sunday inkhawm pawh a hrana ti tham an awm tawh a ni. NE chhunga Central establishment - Doordarshan Kendra leh All India Radio, etc.-ah te an rawn thawk fur a nih hi.

Hetih lai hian Central Service-a thawk tawh leh thawk mek ka ṭhiante leh kan naute hovin engmah an sawi duh tak lovah chuan, kalphung pangngaia UPSC Exam a tling chho ni lo, tlai khawhnua eng tin tin emaw hrat lak titiha intat lût ve hram hian hemi chungchang hi ka han sawi teh ang. Pute - Lalhmingliana Saiawi leh KC Lalvunga te kha la dam se chu an ziak tawh ka ring. Pu M.Lalmanzuala hi ka rin aiin a ngawi rei a, Pu PC Lawmkunga hi insum zawh loh hun a la neih chu ka beisei.

1. Tlin a har tehchiam lovang: Tun hma chuan UPSC Exam question paper te hi kum tin booklet-in an chhuah ṭhin a. Tunlai hian chutiang hmuh tur a la awm emaw ka hre lova, heta ṭang hian subject tina zawhna kalhmang a hriat theih vek a, chung zulzui chuan zir (inbuatsaih) mai tur a ni. BA or MA or Graduate course-a zir loh paper pahnih khat, compulsory si a awm ziah a, chung chu Bazara HelpBook te nen mahnia inzir chawp ngai chu a ni ta. Huphurh leh zam miah lovin heng question paper patern aṭangin a inzir theih em em ang. Graduate course-a kan zir tawh chin te chu ngun leh uluk zawka revise leh nise.

2. MPSC level-a pass thei tan a huphurh awm lo lehzual : UPSC zulzuiin MPSC hian question an set tlangpui a, chuta pass thei te chu UPSC-ah pawh an tling tho ang tih hi a rinawm em em a ni. Tribal tan 'reservation quota' 6 percent (?) kha a la awm chêk ang a, hei hi kan ṭanchhan hlu ber pakhat a ni. He quota chang tur em chuan tunlai mite hi in chhe love. Tunhma rual û, inziaktling ta te pawh kha he quota ring veka pass an ni. General quota thleng phaka ti ṭha te he quota-ah hian an dah tho. Eg. Pu Lalfakzuala (ka hre sual em?)

3. Coaching class kher ngai lovin a tlin theih: Tunhmaa mite kha coaching class kal lo deuh vek an ni. A kal chhunte chu 3-4 bak an ni lovang. Tunlaiin hetiang class-a kal kher tur emaw kan ti hi a buaithlak hle. 'on line' a tih theih chinah erawh chuan a zia deuh ang chu. Chuti chung pawhin ka rin danin thil an zirtirin an sawi tam lutuk ang a, candidate-te'n an thiam sa te ngaihthahin a thar deuh hlir hian a tichiai (confuse) ang tih ka hlau.

4. Sorkar hna hi a la vâng reng reng lo: Tunlai kan nauteho puitling ho te pawh hian Mizoram chhungah kher thawh kan tum avangin hna a vâng ta emaw kan ti niin a lang. India ram pum huapah chuan sorkar hna leh hna dang hi a la vâng lova, a tam tawlh tawlh zawk a ni. Tribal tan 'reservation quota' a awm deuh vek leh nghal. Heng quota-te hi kan hnawh khat zo lo fo zawk a ni. Commissioner for Scheduled Castes and Tribes Office-a ka thawh laiin kum tin Annual Report kan buatsaihna aṭangin a lang chiang em em ṭhin.

Central sorkar hnuaia thawk turin a sang ber tin zawn a ṭha. Chutih rualin Clerk level aṭangin Central Secretariat Service te Staff Selection Commission kaltlang te-in thawh tur a tam lutuk. Chuta ṭang chuan a sang zawk tan competitive exam a tih theih zel a, promotion hmuh ve zel theih a ni.

Public undertaking - Indian Oil Corporation leh Assam Oil Corporation te, Food Corpo­ration of India te, Life Insurance Corporation leh Insurance Company hrang hrang, Banking Service te, Airlines-ah te a dang tam tak kan sawi sêng lovang. Dap peih leh dil peih tan kawng a la inhawng reng a ni tih i hria ang u.

5. Mizoram hi nuam kan ti: UPSC Exam kan ngaihsak loh leh tihtakzeta kan tih loh chhan chu Mizoram Sorkar hnuaia thawh hi nuam kan ti em a ni. Hna thawh turin min daih loh khawpin thawktu an tam a; Central hlawh zat an hlawh a, Income Tax an pe lova; a hahdam bawk si a ni. MCS, MPS, MIS, etc. kan han ni dêk dêk a; kum khat emaw probation-in kan han awm kual a. Chumi hnu chuan (MCS bik sawi ta ila) BDO te kan han ni a. Motor nen quarter (free?) nen "Ka Pu", "Ka Pi" tih an hlawh ṭan a; mahni bial chhungah thil tihpui apiangin 'khuallian' an ni a; a nuam em bawk a ni.

Office furniture te hi kan duh uluk phian a, attached bathroom ngat te kan nei a. Kaisan chhoh ang zelin district 8 ah an awm kual a, a lal pawl an va ni zel a. Designation Plate nen duh chuan eiruk tur tlem tlem lo awm nen, chhungkhat laina te nen kan inchenchilh a; dik leh dik lo deuh pawha min duhsak theihna kawng pawh a inhawng deuh nge nge a ni ang e. Kohhran leh khawtlang nun lah chu kan duh leh nuam tih zâwngin kan kalpui a ni deuh ber mai a; kan zai a, kan lâm a, ruai kan ṭheh a, kan inchawimawi chhen bawk a. Heti lo liam maw le! Hei hian min bual ã a, thil te tak te leh Zoram zîmtê-ah kan lungawi mai hian min timawl zo atin ni. Hemi piahah hian khawvel hi a la awm a; sorkar leh a hnathawktu tam tak an la awm asin!

Pawl 10 leh Pawl 12 pass te hi school tin hian chawimawi tur emaw kan ti a ang ta. Top Ten-a tlingte phei chu CM leh Minister te, MLA te nen meuh kan inchawimawi ta zel a, heng mite hi kan Mizoram zîmtê chhunga pass te an ni a, kan chawimawi luai luai ho te hi an të tham deuh lo maw? MPSC-a pass ho lah cable network te bengvarin an lawmpui a, an chawimawi a, an fuih pah chiam bawk. Hengte pawh hi an la të tham deuh lo maw? National leh Inter State level emaw International level chin te deuh hi inchawimawi ila! Tunhma leh tunlaia kan Central Service lut ho te pawh hetianga chawimawi hlawh lem lo deuh vek an ni. Intihhmuh leh thangṭhat lak duh vanga inchawimawi te pawh kan ang palh ang e!

Vanglaini [Azl], Feb 5, 2019 (Tue)-ah Pu R.Lalthantluanga khan point hrang hrang thiam takin a rawn ziak kha dik ka ti. Mi engzatin nge lo chhiar che u? Ziakmite hian ram leh hnam tan thil ṭha nia an hriatte an han ziak ṭhin a, nimahsela an ziak chhan leh lo chhiar ngei se an tih te hian an lo chhiar lem lo fo. A bikin ṭhalaite hian chanchinbu leh a chhunga editorial leh mi ṭhahnemngaite thuziak hi lo chhiar ṭhin teh u. In 'hand-set' aṭang ngawt chuan thu tak hla tak in thai chhuak tawk lo fo ang.

Mizoram Civil Service leh Central Service kan khaikhin te pawh a ang ta hle a, chuti a nih chuan ka hriat chian ve deuh lam Central Service ka han fak ve nual teh ang. Mahni leh fate tan hnamdang ṭawng thiamna a ni. India-a kan awm chhung chuan Hindi leh

Sapṭawng pawimawhna a tawp lovang. Hnamdang sorkar hnathawk te office kal/ thleng tlaia hawng hma leh si hmuh tur an awm mang lo. Work culture a ṭha a, entawn tur a tam.

Head of Department tam tak chhuṭi nî-a office kal an awm, an hna an la urhsun tihna a ni. Eng engah emaw committee leh Inkhawmpuia kal daih te, chhiatnî/ ṭhatnî vanga office chhuahsan daih an awm mang lovang. Hnamdang zinga khawsak chuan an tih dan ṭha zir tur tam tak kan hmu a, ṭha kan tih loh zâwngte pawh kan hmu. Kohhran leh hnamdang ringtute zingah rinna leh inhmanna a tam zawk. Mi bik ṭhenkhat tan sorkar suma missionary hna thawhna remchang a awm. India khawpui lian tam takah Mizo kan inzarpharh ve ta. Kohhran anga rawngbawlna Mizoram chhung aiin a tam a, ṭhahnemngaih pawh a na duh zawk.

Zoramah chuan ti ve a pui kan tam a, 'nihna chelh' thlahlel chi kan ni bawk nen midang kiana awm mai mai a awl a nih hi. Damlo emaw ṭanpui ngai puih thu-ah leh Mizo mitthi neih zauh changin Mizo tlawmngaihna YMA taka chetna a awm tho. Naupang education chu sawi tam ngai lovin a ṭha zawk vek. Mahni in aṭangin a tawp thlengin an zir thei a ni. Ei leh in leh khawsak tinreng a awlsamin a thianghlim.

Sawi tur dang a la tam ang. Hmunpui danga zir thei leh hnathawk theite tan Mizote inzarpharh a, hnamdang hriat (recognise) nih ve hrim hrim te pawh a ṭha e! Zoram district 8 a vah kual ringawt loh deuh, khawvel dai dar ve deuh ila mahni leh Mizo hnam tan a ṭha e, kan tihna a ni. Retired (Pension) hnuah Zoramah chuan kir leh ila a tawk chauh ang!

C.Lalsangliana