Mizo-ah i kir teh ang u!
Mizo tih leh Kristianna tih a inhmeh tluk bawkin Mizo tih leh tlawmna nun hi ruahsûr leh chhimbal ang maia thil inchawih a lo ni tawh ṭhin a. Amaherawhchu, India ramah kan cheng rei tial tial a, kan nun pawh a danglam zo ta a nih hi.
Tun hnai maiah Lungzarhtum sele chu mi kut tuar ni ngei turin a boral a. Kan uia kan ngaihhlut dan kha tihawm tak a ni. Chu chu duh tawk ta mai lo chuan lirthei hmaah pârthi nen kawng zawhpuia kan han vuiliam zet kha chu a Zo lovin a vai tiah tiah hle a ni!
Mizo kan nihna anga kan danglamna leh kan hlut vena kawng hrang hrangte chu vairam politik thli chhia hmanga umboin an ze ṭha lo kan lakchhawn zawng zawngte hi MNF sawrkar-ah hian bo thei se a lawmawmin a ropui hle ang. Min bialtu MLA lo zawn luih luihte hi a lo chhuahna hnâr a tenawmin a vai zia ngawih ngawih a. Pangpârṭhi awrh sen loh han in pêk chiam maite pawh hi in fakderna suak mai niin Kristian kan nihna anga kan thlauhthlak ngam a hun ta.
He khawvelah hian Pathianin hnam anga min dinin kan chenna tur ram min pe a. Vantlang nun dan tur leh khawtlang kalphung tur pawh Pathian thua tlawmna nun nena inhnaih takin min siamsak bawk a nih hi. Chu chu kan nunpui mai tur a ni.
Mahse, hamṭhatna kan zawn luat vang te, mahni hmasial kawnga chinlem nei lo khawpa kan lo duham tak a, awm leh mawi takngial pawh chhut duh tawh lo khawpa milem hmaa kan lo kun tak hnu hian kawng engkimah kan hleihluak zo dawn ta mai a nih hi.
Sele pakhat kan han sawngbawl duh dan reng mai hi a Pathian thu tawh lovin a Mizo lo ngawih ngawih a. Mahse, thil tha tak ti-ah he thil buaipuitite hi chu an inngai tlat thung si a. Thil tha kan tih kawngah pawh hian Pathian thu lo zet leh Mizo zia lo zeta thiltihte hi a tam zozai ta a nih hi!
Tirhkoh Paula chuan a tân thil engkim tih a thian thu min hrilh a. Mahse, thil engkim tih a tân a that lem loh thua min vaukhannate hi chhiar liam mai lo va kan zawm a hun ta hle mai. Sele kawng zawhpui duh khawpa thil ṭha buaipui hi ramsa humhalh dan dik ni pawhin a lang lo.
Mizo kan nihna anga chhûngkua leh khawtlang kan lo inawp dân tam takte kha Pathian thu kan hriat hmaa kan lo neih tawh, Pathian thua lo chuang deuh vek an lo ni a. Mawi lo taka inchawimawi derte hi a Mizo zia lo hle a nih hi.
Chuvangin, hma lam panin ke i pen ang khai. Milim emaw thlalak han hal chiam maite nen hian vai ze chhe tak kan lakchhawn vel mai mai an ni a. Kan hnam nunah heng vai ze chhe tak takte hi paihthlak vang vang ngam a, Pathian thu anga tlawm tak leh zahawm taka Mizo leh kan hun ta a lo ni e.
Lalremliana Pachuau