MNF SORKAR HNUAIAH (P.H.E) TUI KAN DAWNG TLÉM; KAN PHÚNNAWI LO

Aizawl veng hrang hrangah tui khamkhawp kan dawng lo nasa hle mai. Kar khata vawi khat haw zel turah kar hnih chhunga tui dawn loh a awm ta fo mai. Veng tam takin a sem hun tur pelh fé hnuah pawh tui an la dawng lo. A man (bill) erawh thla tin a ngai rengin a kal tluk tluk reng thung a. Chhungkaw tui nghei engemaw zat an awm ta. Kan chhungkua pawh kan tel. PHE lama thawktuten, April thla kan pelh chuan a ziaawm tawh ang, an ti a niawm a, March leh April thlaa tui hnianghnàr neih hi a hlu ber zawk a sin. A harsat lái taka hnianghnàr hi!

Heti anga mipui harsatna a lo thlen hian a mawhphurtu ber chu an lang ruák mai; Indem a, inchachhuah ngawt zel tur a ni hran lo. Ṭhál va ék chàr hun kan thleng miau si a. Mahse, he hun hi kan thleng dawn a ni tih leh, kan paltlang dawn a ni tih hre rána sorkar a inbuatsaih lawk lo ṭhin hi a demawm lái tak chu a ni. PHED hian tui pump tur tam lai chauha mipui khamkhawp pék tum lovin; a vàn lai taka mipui khamkhawp pe tur hian inbuatsaih lawkin, tui dahkhawlna tam zawk nei sela, sorkar siamtu "mipui" hian ngaih pawimawh hlawh ber ang u.

Kum 2018 kum tawp aṭanga sorkarna siamtu MNF sorkar hian, an sorkar kum thumna kal mékah hian a rawngbawl sak tur mipui tan hian thil buaithlak nge a siam nasat, thil awlsam? Chákkhai mamawh hrang hrang (Essential commodities) kan tih leh, a bik taka a tel lova kan awm theih miah loh, Tui, Power, Gas, Kawngpui ṭha hi min chhawpchhuah sakin in hria em? A bik takin sorkar kutkawih liau liau zinga mi Tui (water) ah hian. Mahni tui dawn tam dan a zirin chhungkaw tin lo inzawt ila.

Tuna kan thupui ber chu tui (water) a ni. PHED in mipui hnena tui duhkhawp a sem theih loh chhanah P&E puhmawhin, an Transformer chhiat avangin a ni, te an ti a. A dik pawh a ni thei e. Mipui mamawh chu transformer ni lovin, tui (water) a ni. Chu­vangin a pump-na tur ber a chhia a nih pawhin a rang thei ang berin thuneituten an ngaihtuah ang a, darkar 24 ral hmaa siamṭhat a tum mai tur a ni zawk. Engvangin maw? E le, mipui tan maw le. Ni hnih, ni thum chhunga khawl ṭhat loh thu in puhmawh tawn ai chuan, siamṭhat vat a, mipui mamawh phuhrùk vat zel a finthlak. Ka sawi nawn leh dawn; MNF sorkar in a ngaihsak ber tur chu Mizoram mipui kan ni.

Mipui hi kan phunnáwi lo ṭhin khawp mai. Sorkar lai tan chuan thil lawmawm tak tur pawh a ni. Hla siamtu chuan, "Fakna hi kan tan thlemtu, sawi chhiatna erawh kan ṭhian," a lo ti hlauh thung a. A dik hlein ka hria. Mi thil tih ṭhat kan fak tur a nih rualin, an kal fuh lohna kan sawichhuah sak hian kal sual a har a, an in véng a, sawichhiatna anga ngaih kha an tan ṭhian ṭha tak a lo ni zawk ṭhin a ni. Mipui phúnchiar loh zarah sorkar sèlna pawh a tlem phah hle zawk a nih hi. Mahse, mipui ngaihsak hi sorkar bat a ni thung. Sorkarin a intiamna zawng zawng a ti thei rih lo a nih pawhin kan basic needs a ngaihtuah ang a, tih hlawhtlin hmasak zel a tum tur a ni.

June 23, 2020 a Press Infor­mation Bureau (PIB) tarlan dan chuan Union Jal Shakti Minister Pu Shekhawat-an Chief Minister Pu Zoram­thanga hnenah lehkha thawnin, Jal Jeevan Mission (JJM) an kalpui dan muang lutuk chungchangah chak taka hma la turin a hriattir a. JJM hi December, 2022 ral hmaa 100% zawh hman ngei ngei a ngaih thu a hriattir tawh a nih kha. MNF sorkar hi tui hnianghnàr kawngah a hnufùm hle niin a lang a. JJM chungchangah pawh Union Minister meuhina vau ngai hial khawpa muang an nihzia a lang chiang em em a. Mizoram Mipui tana tui hnianghnàr kan neih kawngah a vuàichà em em a ni tih a lang chiang hle mai.

Deputy Chief Minister department chan meuh ni si, heti tak maia tui kan harsa hi thuneituten uluk deuhin han enfiah leh ula, mipui tan theihtawp han chhuah thar leh hrám teh u khai. Tui pump tur chu a tlem ngei ang. Ṭhál a ni miau tawh a. Mahse, a hmaa lo ngaihtuah lawk tur ngaihtuah lawk loh te, khâwl chhia an chhuanlam fo te hi ennawn a, a thawktute pawh insiamrem hret a ṭul a nih chuan insiamrem (transfer & Posting) a, hna chak zawkna tur a nih a, Mizoram mipuiin tui kan nghei lohna tur a nih dawn phawt chuan tiin, thawktute han phe leh suáu suáu se kan va ti ém.

Tlumtea thlir takin kan lo thlir reng si a. Tlawn ngai lo; mahni thawh hlawh la, kan tuisem tute pawh hi han insangmar leh thuai teh se.

David Zochhuanmawia (Vida Hrahsel Saza)