I lam kan lo hawi mai zawk a ni e (II Chro 20:12)

Jehosaphata chuan a hmelmate lam thiltihtheihna en (duh) lovin, "Lalpa i lam kan lo hawi mai zawk a ni e" tiin a inhlân a. Chu chuan rah ṭha tak chhuahin, hmelmate kuta thi vek thei kha, hnehna changin an lo awm ta hlauh zawk a ni. 

Uirenu vanneihna chu - denhlum tumtute khan anmahni ngaihdan anga thu tawp siam mai lovin, Isua lam an en hlauh avâng khân chhanchhuahin a lo awm phah ta a ni. A vannei hle mai! Isua lam en lovin anmahni rel rel ang khân kal sela chuan an denghlum chiang khawp ang le! 

Sadrak, Mesak, Abed­nego ten meipui lam en lovin, vân Pathian lam an en tlat avângin chhanchhuahin an lo awmphah ta hlauh a. Stephana'n a denghlumtute lam en lovin, vân lam a en tlatna avângin a hmel chu lungngai hmel reng reng pu lovin, vantirhkoh hmel ang maiin a lo eng ta hial a ni. 

Mosian ni 40 chhung zawng vanlam en tlatin, Pathian nên an inpawlna avângin, a hmel a eng vek bawk. Rebeki'n phir a pai lai khân, a pum chhunga nau insual chu hrethiam lovin thih mai duhnain a khat a, mahse vanlam enin, Pathian a râwn ta zawk a, chhanchhuahin a lo awm phah ta a ni. 

Isua lam an en tak zawk avânga thil lo danglam ta, kan hmu ta nual a. An harsatna leh an buaina aiin Pathian a lian zâwk a, an hmelmate aiin Pathian a lian zâwk bawk a ni. Chu chu a ni, Pathian lam en a pawimawhna chu! 

Kan ngaihdân leh tum dân, duh dân te, thlak danglam a lo nih theihna chhan chu Isua lam enna aṭang chauhin a ni. Nikuma i thil ruahman te, i ngaihdan te kha Isua lam i en avânga tihdanglam ngaite a awm ve em? I ngaihdân leh tum dan chauh chu thlir lovin, Isua lam han en teh le, thil a lo danglam thei dawrh asin. 

Motor siamtu company te hian hnunglam enna darthlalang (side glass) ai hian hmalam enna dar­thlalang hi en tam zawk tûr atâna an siam a ni. 

2019 a liam ta, 2020 a ni tawh e. Isua lam en rawh le. Engnge a lo hrilh tur che thlir ṭan ve rawh le!