Hripui huaisar vangin Lungsen mipuite chawbel a baw ta!

Vawk vulha eizawngte tana ngeiawm tak, vawk natna hriin Lungsen khua a rûn a, an thawhrimna, ei an zawnna leh an hmathlir zawng zawngte chu thlan khurah a liam mêk a, tu nge chhanchhuahna dar vua ang a, an dinhmun ngaiah engtin nge an kir leh theih ang? He zawhna hi a thûk a, a hria apiangin ngaih thu tak ṭulah ka ngai.

He hri avanga vawk tam tak thihna enfiah turin April ni 12, 2021 (Thawhṭanni) khan Aizawl aṭangin ZONET team-in Lungsen kan pan. In 650 vel khua, VC pahnih leh YMA Branch pathum awmna a ni. Ro fel taka rêl lâwk ngai nia ka hriat avangin VC te hnenah ngenna ka thlen a. Zan lamah VC 1 & 2 te, YMA Branch pathum OB te leh hri avanga sawrkarin doctor a tirh luh Dr Mahlimi leh Dr George-a te nen YMA Hall-ah kan ṭhukhawm. Mi harsa tê tê eizawnna tlusawp ta chu kan lainat thu leh an dinhmun dik tak chu sawrkar hotute leh Zoram mipuiin hmu se kan duh avanga kal kan nih thu kan sawi a, anni pawhin kan kal chhante an hriatin min lawm der thiam hle a, ro kan rel ta. Tichuan, hemi zan leh a tûk nilenga kan thil tawn zinga pawimawh zualte tarlang ila.

April ni 12, 2021 zan hian, YMA Branch pathumin vawk thi tawh leh vawk dam lai an chhinchhiahte chu an rawn keng a, hetiangin :

Hmar veng Branch YMA huam chhungah vawk thi – 256, vawk la dam -285 (541), Chhim Veng Branch YMA huam chungah vawk thi tawh zat – 174, vawk la dam zat – 206 (480), Venglai Branch YMA huam chhungah vawk thi tawh zat – 45, vawk la dam zat – 91 (146). A vaiin 1,167.

Heti zat vawk an vulh hi pui ka ti hle a, mi hrang hrang ka zawt a, chuta min chhannaah chuan, “Covid vang khan eizawnna a harsa a, vawk vulh lamah hian kan kal ta a, kan intihhmuh ta zel a ni. Khawi aṭang maha puihna dawng loa heti zat kan vulh thei hi kan lawm ve hle,” an ti a, chu chuan min tihlawm hle.

Zing dar 7:30 aṭangin kan che ṭan a, tlai dar 4:30 pelhah kan zo a, kan tlawh kual nasa hle. Kan kalna zawng zawngah hian Vety doctor pahnih leh sawrkarin Selesih aṭanga mi pathum a tirhte chuan nilengin min uap a. An hmanraw chi hrang hrang an keng a, kan bun a, kan phelh leh a, an hâl ral nghal zel a. Hri a darh loh theih dan berin min chet tirin, vawk la awmna in phei chu kan hnaih ngam lo. An uapna hnuaiah kan che ho vek a, thlamuanthlak tak a ni. Hetiang hi kan thil tawn leh hriatte a ni a, ngaihtuah zui ngaite chauh sawi ila.

1. Branch YMA pathumin vawk phumna hmun an siam a, a tirah mihring thaa laih a ni a, an tlon lo. JCB in lian tak takin thlan khur an lai a, an phum ṭhin. JCB hman man hi AH & Vety deptt in an pêk leh hmun dang aṭanga an dawn aṭanga pêk a ni.

2. Vawk thi tam zual zingah vawk 15, vawk 13, vawk 10, vawk 9 thite an awm. An vawk vulh hi pakhat Rs 30,000 - Rs 40,000 man a nih hunah Lunglei lamin an lei ber a, an hralh nasat avangin khaw chhungah ei turte an nghei lek lek hial. Heta ṭanga chhut hian, chhungkaw pakhatin sum an chân nasatzia hi nui chunga sawi chi a ni lo.

3. Chhungkaw engemawzat chuan ramhnuaiah himna zawngin vawk an tlanbopui! Zing leh tlaiah chaw an va chhum chilh a, an pe ṭhin. Mahse, hmun pakhat kan tlawhna a mi chu kan kal thlen hma lawkin a lo thi a, YMA ten a ruang an hlawm nghal.

4. Tunhma aṭanga ei­zawnna atana hmang, an fate khawpuia zirna chhun­zawmte chawmna atana hmang engemawzat an awm. Vawk vulh hi an khaw mipui ei bar zawnna siamtu a ni. Nasa zâwka hmalâk zêl tuma vawk in sei tak sak belh lai mêkte an awm nual nghe nghe. A ruak ta huai si!

5. Mi tam takin vawk vulh nan loan an la. Hei tak hian a tilungngai hle, “Loan te hi engtin nge kan rulh tâk ang? Hri a ni miau si a, a luhaithlak ania, sawrkar hian min puih dan zawng hram se,” tia kekawr pawt chhing paha ṭhutthlengseia patling a’n han ṭhu hnawk lai hmuhte chu a hrehawm hle a, ‘sawi tur rêng ka nei lo e misual mai ka ni’ lo tih ve awl tak a ni.

6. Mi tam takin dawrah a bain vawk chaw an la a, “Heng vawk chaw, a baa laktirtu dawrkaite hlei hlei hi an khawngaihthlak. Vawk a thi miau si a, an lei batuten an rul thei dawn lo tih an hmu chiang si a, an ṭap tlawk tlawk a ni ber e,” te an ti a, kohhran thawhlawm a nghawng hle bawk an ti.

7. Ni khatah 20/30 te a thi a. Hmar Veng YMA Hall a vawk thi an rawn phurh kan nghah laiin a bul lawkah pahnih a thi! Pakhat phei chu a neituten puanin an tuam a, pangpar an dah a nia aw! “A neitu nu saw kawta a kal lai an zui ṭhin,” te an ti.

8. Vawk damlo tan purun­sen a ṭha, tih sawi a awm. VC te sawi dan chuan, ‘Pu Dala a awm a, a sipai ṭan laiin sipai ho chaw nawiah purunsen a tel ṭhin tih hriain a pe ṭhin a. A vawkte hi an la dam ngei a, mahse, Lungsena vawk zawng zawng zatve an la thi lo, a kal kân rihah kan ngai,” an ti a. Thim ruaiah purunsen pe nia sawi nu pakhat chu biakhlatna hmangin kan zawt leh hrâm. Purunsen a her dip thu te, chumi tui chu vawk káah an kah luh thu leh a thih tho thu a rawn sawi.

9. AH &Vety Minister Dr K Beichhua lakah an lawm hle. A ngaihsak avang leh kan kal hma lawka Lungsen a tlawh avang te, an harsatna chu Chief Minister Pu Zoram­thanga sawipui a tum thu a hrilh vangte a ni. Khaw ṭhen­khat pawhin ṭanpuina an pe. Hetih lai hian bialtu MLA Pu Zodintluanga’n an khua a la tlawh lo chu mak ti an awm a, a nawmsam loh avanga a thlen loh thu leh VC te hnenah ṭanpuina Rs 30,000 a pe erawh lawmawm ti an awm ve thung. Thlan ko tlangah kan ding a, ka ding lamah MNF VCP, ka veilamah Congress VCP, kan debate zauh a, a nuam riau.

10. Vawk thi hi tuna felfai taka an chhinchhiah hi kalpui zel ni se. Hri hi a reh hunah sawrkarin an bul ṭan lehna atan vawkte 2 emaw 3 emaw man ṭheuh pe se. Heti taka vawksaa intodelh tura hmala taima khua hi puih an ṭul. A thlawna sem an dawn aṭanga hlawhtling ni lo, an taimak avanga hlawhtling ṭan an ni.

Chu chu sawrkar tan pawh puih a inthlahrunawm loin a rinawm.

Lalnunṭawma Fanai