POSITIVE KAN VEIVAH PUI DAN HI
National Highway kama ei zawng tih takah ni tin mai hi lirthei vei vak kan hmu hnem, chu'ng zingah chuan tunlaia Covid positive an tam chhoh leh tak avangin a khat tawk hian Lengpui Airport lam aṭanga rawn chho ni ngei tur Ambulance hi hmanhmawh pheleng hian lirthei tawt karah an rawn chiau leh vu vu ṭhin. An hmanhmawh lutuk hian mihring dam ṭha pangngai zawk hi an su palh ang tih a hlauhawm lek lek.
Driver PPE suit nena inthuam ṭupin a khalh a nih bakah indopui laia sipai siren ri tluk zeta ring an tihrik bawk avangin kawng pawh an kian duak duak mai. Amaherawhchu, keia mit hlei hian an phurhte hi ka lo en chik viau ṭhin. A ṭhen chuan phone an khal mai mai a, a ṭhen seroius lo tih hriat taka nui hmel te, a ṭhen mi bye bye châk hmel deuha tukverh darthlalang kara rawn khi sung te an ni hlawm.
Chutiang ni si khati teh vaka ralkhel dar nena tlanpui ta chiam chiam nge maw an nih le!? Ka hriatna a tlem vang nge mawni ka hrethiam ṭhin lo. Darkar chanve hmaa kan zai hman loh chuan a nunnain a tuar hman ang emaw, darkar khat hmaa damdawi a taksaa kan chiu luh hman loh chuan a thi hman ang tih phurh ten an han phur a, an phurh ṭhenkhatte erawh an chuang nui vur vur ang lawi a. Nge ni, a khaltupa kaw dik lo ek chhuak hmanhmawh mai mai zawk.
An dahna tur damdawi in an va thleng ang a, eng teh vak ti loa calcium, tui lum adt. tih vel mai mai nena an lo sawngbawl leh si chuan an hmanhmawh chhan ber, a positive-ate leh mipui tiralkhel thei bera an chetna kha eng nge a awm zia ni ta ang? Ka bo tulh tulh mai. Kal muan chuan hri kha an vak chhuak ang a, kawng kama mite taksaah a lut palh ang ti dawn ila chuti maia lirthei tlan laia mi kai mai theih a nih thu mithiamten an sawi bawk si lo.
He hri vei hi ka zuam hauh lo; amaherawhchu, kan hmachhawn dan erawh hi chu a mak ka ti lek lek zel, ka ât vang emaw ni. Kum khat zen zawn kan chengho tawh a, hei aia zangkhai deuh zawka hmachhawn thiam tawh tur chu kan ni maw le.
Ṭawng mawi lo ni lo se, tu emaw hriselna pan sa tak, thih leh dam kara rei fe an lo enkawl tawh te pawh an han boral a, an lo positive tel ve avanga Covid vanga thi anga kan han theh darh chiam zel mai te hian min tifimkhur nge min tiralkhel!?
A chang phei chuan hotu lamte hian chhan ṭha tak avanga mipui rilru lak pen nan hian hman an duh emaw ni chu aw tih mai a awl rum rum ṭhin.
Sanga Râlte, Chhinga Veng