TU NGE MIZO BÎK?

Hman lai Kristian kan nih hma chuan Hmar-hovin Ṭawng hrang leh Sakhaw biak dan hrang, Puithiam leh Bawlpu an nei hrang a. Ralte hovin Ṭawng hrang leh Sakhaw biak dan hrang, Puithiam leh Sadawt hrang an nei bawk a ni.

Chutiangin Pawi, Paite leh a dangte pawhin ṭawng hrang leh sakhaw biak dan hrang an nei ve. Lusei pawhin ṭawng hrang an nei a, Sakhaw biak dan leh Puithiam leh Sadawt hrang, inthawina thiam hla hrang an nei ṭhin. Chung zawng zawng leh a dang ka sawi lan tak loh hnam chi dangte nen chuan Mizo chu kan ni.

Mizo hnam bîk an awm lo. Lusei ram (Lusei/ Lushai) a awm ten ṭawng tualleng atan Lusei ṭawng kan hmang a. Hmar ram a awm Luseiho pawhin Hmar ṭawng an hmang mai a, Pawi ram a awm Lusei leh Hmar pawhin Pawi/ Lai ṭawng an hmang mai.

Heng hnam chi hrang hrang hi Mizo kan ni a, ṭawng tual­lengah Lusei ṭawng kan hmang a, Lusei ram (tuna Mizoram) a awmte hian Lusei ṭawng kan hmang a. Pawi emaw, Hmar emaw, Paite ṭawng zawng zawng pawh Mizoṭawng a ni.

Mizoṭawng ni ta bîk riau a awm lova, Mizo riau kan awm lova, Mizo lo riau kan awm bîk hek lo. Inpumkhatna atan Lusei ṭawng hi kan hmang mai a ni. Mizote hi India, Myanmar leh Bang­ladesh-ah te ṭhendarh kan ni a, inpumkhatna leh hnam hmasawnna turah pawh thiltih zung zung a harsat phah a ni.

India ram chhung ngeiah pawh state hrang hranga kan awm darh chung hian Mizoram hi Zo hnah­thlak unaute hian kan inpui a ni reng a. Aizawl hi kan Jerusalem a ni kum­khua dawn a ni. Hmun danga kan unaute hian Mizote hminga ram kan neih chhun Mizoram hi an ngai em em ṭhin a, chuvang chuan a bik takin Mizorama chengte hi nu leh pa chan kan chan thiam a pawimawh hle.

Zo hnahthlak zing­ah ‘Duhlian ṭawng’ hi kan hman tlanglawn ni mah se; ṭawng chungchangah a ni emaw ei leh in a ni emaw, incheina leh thil dang pawh lo dang deuh ṭhin mah se thlahtu thuhmun, thisen zawmpui kan nihna hi a thuk zawk tlat tur a ni.

Mizote vanneih­na chu kan ram hruai­tuten Zofate insuih­khawmna leh inpum­khatna an vei em em mai hi a ni. Political party hrang hrangte hian an manifesto-ah helam hi an telh deuh vek a ni. Zo hnahthlak hnam hrang hrang hian inremlohna eng emaw a lo awm chang pawhin kan inunauna hi kan tihchak zel a ṭul. Hemi atan hian Mizorama chengte hian mawhphurhna sang tak kan nei e.

JH Malsawmthanga