R.K. LIANZUALA A HER LIAM VE TA

Eng chen nge min la dampui dawn ti-a kan thlir ruk reng laiin R.K. Lianzuala (1966-a piang) chuan March 9th chhûn dar 11.15 khan a natna hrehawm tak leh amah hmangaihtute kalsanin he khawvel hi a lo chhuahsan ve ta. Chanchin thehdarhna hmanraw hrang hrang aṭanga he thu hi ka lo hriat veleh thil tam tak ka ngaihtuah zui a ni.

Amah hi Mizo zingah na nâ nâ chuan mi thiam leh lar, hriat zauna lama talent nei ṭha ber pawl a ni ti ila kan sawi sual lo vang. Master’s degree-a Gold medallist nih baka Journalism-a diploma nei ngat, mi namen a ni lo va. Lehkhathiam naran mai ni lovin, a thil hriat hre chiang tak, a thil hriat sawi chhawng fiah thiam em em mai mihring a ni. A kalna awm tak media lama a kal te hi a mimal hlawhtlinna ni mai lovin Mizo mipuiten kan bengvar phah em em a ni tih hi mitin hriat hnu ni mahse, sawi nawn leh pawh ni ila a pawi lo vang. TV kal tlanga mi lar chi hrang hrang biangbiakna a neih pui te leh documentary film engemaw zat running commentary pe-a min awi tlei ṭhintu kha vawiinah chuan “He was….” tih a lo ngai ta. Rilru a khawih na thei khawp mai.

Amah hian ṭawngkauchheh pawh a duhtui hle mai a. “Lawmkunga dai ve chin” ti-a Facebook-a April 11, 2017-a a ziakah pawh ka lehkhabu a rawn fakder laiin, ka ṭawngkauchheh, “Ka rawn haw” tih erawh chu a sawisel thiam khawp mai a. Kei chauh ni lo he ṭawngkauchheh hmangtu Vanglaini daily leh ṭhianpa V.L Zaikima te thlengin a rawn (hetah chuan ‘lo’ ni lovin) hawl kual vel a nih kha. A sawiselna kha hnial thla thei kan awm lem lo. “Ka lo haw, ka lo haw, bo tawh lo turin,” tih hla te kan lo nei tlat bawk si a. A hrisel ṭhat laia nitina Facebook-a a thu rawn ziakte kha zir tur hlirin a khat a. Tunah zawng a thuziak ṭha leh ngaihnawm te kha kan hmu leh dawn ta lo a ni.

ZONET Cable service sawi tawh chuan RK Lianzuala hming hi rilru-ah a lang hmasa ber fo phawt mai a. Keini chhung phei hi chuan kan nêl zual a. Signal ṭha lo leh transmission chiangkuan loh chang te hian Distributors ho kal kân hian amah hi kan phone deuh reng mai a, ani lahin dawhthei takin min rawn tihfel sak zel mai bawk a. A u Dr. R.L. Dangvela hi ka nuphalpa a lo ni bawk nen, innel ṭhin tak kan ni. An in hi ka tlawh ve zauh zauh ṭhin a. Hetia a liam ta mai hi mumang lam te pawh a ang rum rum alawm le.

Kan hriat angin R.K. Lianzuala hi rei tak cancer natnain a tibuai a. Eng emaw lai kha chuan han ṭha chhuak leh mai tur ang te khan a han khawsa deuh va, thu te pawh a rawn ziak leh zauh kha a ni a, kan lawm hle a ni.

Nikum March 11th khan kan nupain kan va tlawh ve a. Chemo a lak hlim a nih avangin amah tak tibuai lovin a nupui leh mi dangte nen kan inkawm a. A hnu leh deuh July 5-a a u Dr. Dangvela nen kan va tlawh lai pawhin sitting room-ah bawk zâl chungin mi a kawm peih a, ei tur an pekte pawh ṭha takin a ei mai a, beisei ka neih san pui viau va. Titi pui theih a nih avang khan, “ZONET hi a sound in control ṭha lo a niang- chanchin thar puan laia a rin dan tawk tura kan dah hian, bungraw fakna hunah ama thuin a ring vak zel a, fakna lah a tam thei a” ka han ti pek a, mi chhang fumfê vak lo.

Hun a lo kal leh deuh va, chuti lua chuan a changkang ta lo nge ni, Delhi aṭanga ka rawn haw ni October 30, 2018 khan Lengpui airport-ah an nupaa thlawhna an pan lai hi ka tawk phut mai a. A nupui chuan a kuah kal ni ber khan ka hria. Ka va pan a, a chanchin ka han zawh chuan Vellore lama in check up leh tura kal an lo tum hi a lo ni a. Kha ta a hmel ka hmuh kha, dama a hmel ka hmuh tawpna tur a ni ang tih phei chu ka ring lem lo. A hmel kha a dul hle a, ka ngaihtuah zui viau mai a. A hnu-ah a u Dr. Dangvela’n a zu kan laiin ka zuk phone leh a. Ani doctor meuh pawh chuan beidawng takin min rawn chhang ta mai a. Chuta ṭang chuan “Engtikah nge…?” tih kha rilru-ah a awm ta reng mai a ni.

Tichuan a natna chuan a thlah tak loh avangin tunah chuan kan lo ṭhen ta a ni. ZONET-a a thawhpuite tan chânna nasa tak a ni a, ZONET chhungkua (consumers) te tan khaw tihartu a lo ni dawn ta a ni. Hetia a vanglai taka R.K Lianzuala kum 53 mi chauh lak bo a nih tak maiah hian Pathian remruat dan hi hriat thiam pawh a har khawp mai.

Hetia R.K. Lianzuala’n min kalsan hi mihring lamah ui hle mah ila, lehlamah chuan thlamuanna kan nei. Isua Krista ringtu fel tak niin a kal ta niin ka hria a, a chhung leh laina te tan pawh a thlamuanthlak em em ang tih ka ring.

“Leiah ṭhiante ṭhen mah ila, Vanah kan intawk (leh) ang”

Lawmkunga, Mission Vengthlang