BJP-in Hmar Chhak mipui min tham lo

Bharatiya Janata Party (BJP) hotupa Amit Shah chuan February 17, 2019 khan Assam-a Lakhimpur leh Guwa­hati-ah thu sawiin Lok Sabha inthlanah an chak chuan Citizenship Amendment Bill (CAB) chu an kalpui leh tur thu a puang dum dum a. Hei hi India Hmar Chhak state-a political party tam takin an khel a, Mizoramah hian sawi a hlawh lo angreng a, hei hi chu Central YMA leh MZP-te pawhin an ngaimawh tur chi a ni.

A chhan lian tak chu CAB Lok Sabha lama an pass chiah khan Rajya Sabha-ah pass leh an tum a, a tlang lohna turin Joint NGO khan theihtawp a chhuah a. Tunah chuan chu CAB chu campaign au hla atan BJP hian an rawn hmang nawn leh sak a, hmar chhak mipui hi engah mah min ngai lo tih a chiang hle a ni.

Manipur lamah chuan MPP leh CPI Manipur State Council-te’n press conference an ko nghal a. BJP hian Hmar Chhak mipuite rilru tihnat an hreh lova, India hmar chhak mipuite hi engah mah min ngai lo niin an sawi a, an thin a ur hle a, Mizoram lam hian Amit Shah thusawi hi kan la chhang let ve vak lo niin a lang.

Mizoramah Total Bandh kan huaihawt a, party zawng zawngin an thlawp a, protest day te kan buatsaih a, kan NGO-te’n Delhi an kal phah a, ama insawi dan phei chuan kan Chief Minister Pu Zoramthanga pawhin Union Home Minuster hnenah CAB a duh lohzia hi chiang fek fawkin a hrilh a ni awm e (A sawi tak hi kan hriat pui thei tawh si lova).

CAB tlawlh hnua thar­thawh leh tumnaa Amit Shah thusawi hi kan Chief Minister hian na takin khak leh se a

ṭha khawp mai. Manipur lama MPP president Y Jugindro thusawi media lama an dah chu, “Jugindro asserted that BJP has failed to acknowledge the sentiments of the people of Manipur and the North East region and is paying no heed to the voice of the region regarding CAB 2016 as BJP president Amit Shah has categorically stated that the party will bring back the same Bill if BJP Government is reinstated at the Centre,” tih a ni a, kan rama party hrang hrangte hian Amit Shah hi an chhan let a ngai a ni.

Mizo Kristianten kan duh loh em em CAB chu BJP hian Lok Sabha inthlana an chak chuan pass leh nghal an tum tih lo lang hi Hmar Chhak mipui zah lohna lian tak a ni. Lok Sabha inthlana BJP leh an thawhpui an chak chuan kan hmabak chu CAB a ni tih kan hriat tlan a hun a ni.

James Lalduhthlana, Bawngkawn