Sorkar officer motor 1 aia tam kawl
Mizoram sorkar hian inrenchem a tum tak tak a nih chuan mi pawimawh zual bik ni lovin sorkar motor pakhat aia tam an kawl hi ti tawp hmasa ber teh se.
Chutah chuan department thlei bik nei lo se, tunah hi chuan motor pakhat aia tam kawl, luxury car (Compact SUV) pahnih kawl officer an awm fur na state kan ni a, sorkar pawisa neih lohzia sawi nen hian a inhmeh lo a ni.
Mi pawimawh bik tlem te chu an awm thei ang, heng zingah hian District SP te hi chuan motor pahnih an kawl hi a dik thei ang a, chu pawh chu a nihna takah chuan an motor kawl pangngai bak hi chu 'pool car' awm se anmahni hmingin awm bik lo se, an office aṭanga pawh theih ni se a la dik zan a ni.
Tunah hi chuan Police Department-ah hian Battalion Commandant hian motor pakhat aia tam an kawl deuh fur a, hei hi a chhan ka hre thiam thei lova, an nupui te leh an family pual atan motor pakhat (Bolero a ni tlangpui a) an kawl tel tlat nia lang hi chu Mizoram sorkar hian a ngaimawh a hun tawh khawp mai.
Tin, DGP tih loh Police officer lian dang te pawh hian motor pakhat aia tam hi an mamawh lo, an nupuite VIP light khuhin an chuang kual deuh mai mai a ni si a, sipai (Police) chu lal a na bawk si a, tumahin sawisel thiang lo ang maiin sorkar petrol leh diesel hmangin official thil ni miah lovah an motor pakhat zawk hi an vei ve sek tho tihte hi sorkar thuneitute beng thleng ṭhin se a tih tawp dan ngaihtuah a hun.
Police hi kan han sawi lang a, an motor hriat hran a awlsam vang a ni a, Department dang pawh hi motor pakhat aia tam kawl an awm tlat mai ṭhin hi a mak a ni. Delhi-ah chuan tuna Mizorama kan Secretary ang level te hi office room lian tak pawh nei lovin motor ṭha vak lo kawlin hna an thawk thei tho si a, Mizoramah chuan luxury car sei an neih bakah a back up atan Bolero emaw, a tlukpui Compact SUV an kawl tel tlat ta mai hi Mizoram sorkar hian titawp thei se pawisa tam tak a hum ngei ang.
Director ṭhenkhat pawh motor pakhat aia tam kawl an awm a, Department head ṭhenkhat an office bus leh truck (407/Pick-up etc) mahni private thila hmang mai mai driver te pocket money pea in siam rem ta mai mai an awm ṭhin bawk.
Heng thila sorkar pawisa khawhral hi tihtawp ni se, Electric Bill sang lutuk hmanga sum tuak kher ngai lo hian pawisa tam tak thla khatah an hum thei ngei ngei ang.
Malsawmtluanga (MSTA), Bethlehem Vengthlang