Khawvel thar...

Vanglainite - Nu leh pa ṭha tak Pathianin min pek karah kan lo piang a. Duat takin min enkawl chho a, School-te kalin tleirawl/ rawlthar kan lo ni.

Thawmhnaw, ei in, pocket money thlengin min tum sak a. Engmah ngaihtuah buai tur awm lovin hun kan hmang a, puitling kan lo ni ve ta. Hetih hunah pawh hian engkim mai ngaihtuah buai ngai lovin petrol man leh topup man thlengin min pe ṭhin.

A her liam ta - Kum 30/40 kan han tlin meuh chuan kan chhungte/ nu leh pate chuan mual min lo liam san tawh a, kan hlim lai nite chu a her liam ta. A thlawna kan hmuh ṭhin te chu a lo tawp ta. Miin min hriat ve chhan kan chhungte an lo awm tak lovah chuan hmelhriat an vang ta pharh mai. Chhung khat laina, unaute pawh an bo duak mai. Mamawhtu leh ṭhian ngah tak ṭhin kha tunah chuan a hawihai ve ta. Tunah chuan eng pawh tawk se ngaihtuahawm tak a ni ta, chhantu nei lo vakvai ang mai a ni. Nite pawh chu a rei em em a, han intih harhna tur lah a awm tawh lo, a chhan chu miin inlengah pawh an duh meuh lo. Tichuan, kan vanglainite chu a lo her liam ve ta reng mai.

Khawvel thar chu - In

ṭhen­awm khawvenna kawngah pawh uaptu an awm tawh lova, mahni a in hai ven a lo ngai ta. Khawtlang leh kohhranah pawh mahni a din ve a lo ngai ta. In lamah te pawh mahnia rorel a ngai ve ta, mahni a thutlukna siam te pawh a lo ṭul ta. Kalna apiangah chu khawvel - nu leh pa tel lo chu kan hmang ṭan ta a ni.

Naupang ang mai ni thin kha tunah chuan puitling tak tak nih a ngai ta. Nu leh pa tel tawh lo khawvel chu mahni a innghat fimkhur taka hun leh nun te hman, rin tur awm tawh loh avangin khawvel thar chu a lo ni reng mai.

Nun nuam nei turin...- Nun hlim, nun nuam chu engtinnge kan neih tak ang le? kan han hlim dawn viau ṭhin a, kan chau a, kan lungngai leh mai ṭhin. Zuk leh hmuam te hi kan uar lutuk a, hei hian kan hriselna dinhmun a ti hniam a, kan pawisa eiraltu a ni bawk. Han sim hmak thei ila chuan, hnara hlit phawi ang huai a ni ang. Ei leh inah kan induat lutuk a, natna benvawn kan neih phah thul.

Hla vak lo kal dawn pawhin lirthei kan chelek zel a, ke in kal tam ila kan ṭhat pui zawk awm si a. Ei leh in thianghlimte hi ngai pawimawh ila, kan lo hrisel zawk ang a, kan nun a lo nuam ang. Pathian kan han ngaihsak leh phei chuan chunglam ṭanpuina nen kan hun te chu hlim leh nuam takin kan hmang thei dawn a lo ni.

Bible-ah chuan i nu leh i pa chawimawi rawh, nu leh pa anchhe lawhtu chu anchhe dawngin awm rawh se, tih te kan hmu. Vai kan tih te pawh hian an nu leh pate an ngaihhlutzia chu patling pui tawh pawh hi an hmaah chuan an ding zum reng mai ṭhin. Nia, Mizote pawhin kan zahin kan ngai hlu a, mahse, tun hnuah erawh a dal ta deuh em aw... a tih theih.

Kum hlun tur kan awm lo a, kan chenna khawvel erawh la awm reng ang. Keinin kan rochun ang bawkin nakinah kan tu leh faten nu leh pate tel tawh lohna khawvel an la rochun dawn.

Khawvel thar duhawm tak an neih theih nan nang leh kei hian mawh kan phur a, fanau enkawl kawngah leh kawng dangah pawh ṭan ila sauh sauh zel ang.

Lalchhandama Colney