MIZO ROHLU RK LIANZUALA A HER LIAM TA

Zeng kan ti ta nge? Kan biak sa hi kan ti nuar em ni zawk? Kan mi chhuanawmte kan chan in dawt zut mai. Kum a thar chauh a, thu leh hla lama kan kungpui miril Mafa-a kan chan a, a hnu lawkah mizo pa ropui Pu Mawlsawma Colney kan thlah liam leh a, tunah Pu RK Lianzuala kan thlah liam leh ta.

‘Mi bik an dam rei ngai lo’ an lo tih fo hi a dik em ni chu aw ka ti ta rum rum mai. Pu RKA kha kawng tam taka mi bik a ni a, ram leh hnam tana mi ṭangkai, kan hnam rohlu a ni a, heti maia kan thlah liam a lo ngai ta hi a pawi teh zawng a nih hi.

Kan hria a, Zonet Cable TV neitu leh dintute zinga mi a ni a, a hna lamah a buai em em dawn tih a hriat reng mai. Khati chung khan a hun a hmang daihzai thiam em em a. A eizawnna hna pui ber a thawh karlakah tuk tin facebook lamah thu ṭha tak tak min hlui ṭhin a nih kha. A thuziak chhiar ṭhin phei chu a zun khan min phuar deuh roh a, Pu RKA ‘Tuk chhuah nuam’ chhiar hmasa zet lo chuan zing kar te kha kan awm thiam lo riau a, mo thar tuk ang maiin kan lai deuh tlat ṭhin. A thuziak karlakah mi a kawm a, a khat tawkin documentary film ṭha tak tak ngaihnawm takin min chawp chhuah sak ṭhin. A awin a zir a, a sawi ngaihnawm thiam a, mizo ṭawng a thiam bawk si. Pu RKA sawi a nih tawh chuan a ngaihnawm piah lamah a awihawm bik hliah hliah ṭhin.

Mi ropui, pa ropui a ni a, cancer natna bawhbeh zawh lohin a rawn tho chhuak leh ang a, thu ṭha tak tak te min hlui leh ang chu tia beiseina nen kan thlir laiin heti hi a ni ta mai si a. He hnam hian a rohlu tak pakhat chu a chan leh ta a ni. Engpawh nise thihna chunga thuneituin ‘hun’ a ti miau a, keini sawi phak ni hek lo le.

A dam ṭhat laia a thuziah ṭhin (A tukchhuah nuam) te aṭang ringawt pawh khan Pu RKA’n mizo hnam a hmangaihzia a lang chiang ngawt mai. Mizote hian ngaihhlut tur dik ngaihlu i la, ngaihsan tur dik ngaisang i la, entawn tur dik entawn i la, chawimawi tlak chawimawi thiam i la, taimak leh thawhrim kawngah he hnam hi muthlu lo se tih kha a duhthusam a ni a. Chu mi kawng zawh tur chuan min fuih a, min tur a, a thiamna leh theihna zawng zawng hmangin min khalh kal hram hram a tum ṭhin. Ṭhalai nun a vei em em a, mizo ṭhalaite hian nun zahawm nei i la, mahni intodelhna kawng zawhin ram ropui te ke pen rualin ke pen ve i la tih kha a duhthusam a ni ṭhin.

Kohhran leh khawtlang tana a kula taia a lo inhman tawh dan te, lehkhathiam thei leh thluak ṭha a nih dan te, HSLC exam-ah pawh Mizoram puma pahnihna hial a lo nih tawh dan te, BA leh MA-ah Gold medalist a nih dan te chu kan hriat tlan vek ka ring a. Chutiang mi, lehkhathiam thei chungchuang chuan Central service exam te han bei se, a service duh ber thlang thei khawpa a invawrh theih a rinawm. Mahse, sawrkar hna kalsanin, a chipuite tana a ṭangkai zawk theih beiseiin media a luh chilh a, Zonet TV dintute zinga mi niin a khaipa ber a ni. Helamah pawh hian zofate tan a thawh hlawk ngial reng a ni.

Pu RK-a bikna riau pakhat chu mi kawm (interview) a thiam em em mai kha a ni. A hriatna a zau a, zawh awm a hria a, mi a cho phur thiam a, interview karlaka comment a lo pek ve ṭhin te hlei hlei kha a ngaihnawm ṭhin.

Mipui hmaa a dinin a hun leh a hmun a zirin sawi tur a hre em em a, sawi awm tawk a hre bawk a. A thusawi tichiang turin a karlakah mi ropuite chanchin leh an experience ngaihnawm tak tak zeh tel tur a hre em em bawk ṭhin. Khang zawng zawng kha tlangkam ti ti a dawn aṭanga a hriat chu a ni vek hauh lovang. Lehkhabu a chhiar aṭanga a hriat a ni. Amah hre chiangtute chuan Pu RKA lehkhabu chhiar peihzia kha an sawi ṭhin. Pakhat a chhiar zo a, a dang a chhiar leh a, chhiar lai hi a nei reng mai a ni an ti. Amah mi thluak ṭha, thil chhinchhiah thei em em mai a lo ni bawk nen, khati taka a hraitna (knowledge) a zau pawh kha a mak lo ve.

Amah hre chiangte chuan Pu RKA sap ṭawng thiamzia kha an sawi ṭhin a, a dik ka ring. Sap ṭawng a thiam mai a ni lo a, mizo ṭawng pawh kha thiam tak a ni. Thu sawi a thiam a, a thiam satliah mai ni lovin a sawi ngaihnawm thiam a, a ziah lamah nise a thiam hlei hlei emaw tih mai tur a ni. Hetiang mi bik, ziak thiam a, sawi thiam bawk hi an tam lo khawp mai. KC Lalvunga kha a ziah lam a thiam em em a, a sawi a thiam bawk a. Pu RKA nen mi thuhmun an ni. Chutiang mi bik, sap ṭawng thiam, zo ṭawng thiam, ziak mi ni chunga thu sawi thiam em em bawk chu kan chan leh ta!

Zofate rohlu RK Lianzuala a her liam ta! Nikin nia ropui taka kaihthawh turin a lei taksa tlawm tak chu pialleiah zalhin a lo awm ta. Zo hnam hmangaihtu, hringtu nu leh pa leh zo hnam tana fa hrin man hla hi thlamuang takin chawl se, ropuina ramah khian van angel ten thla khawngin lo hmuak mawlh rawh se.

K Lalrinchhana