Assam Rifles an la chhuak lo
Chapchar Kut kha kan la hre reng ang chu, Aizawl Assam Rifles hmunah Lammualah ngei hman a ni a, Chief Minister zahawm tak chuan, "Nakkumah chuan Chapchar Kut hi kan hmanna hi Mizote ta a ni tawh ang," tih lam hawi khan thu a sawia chu chu 2019 kha a ni tawh a, Assam Rifles an insawn chhuak dâwn tih a sawi avangin kut beng thawm a rin bakah, "MNF nge nge..." an han ti zui a, Facebook leh WhatsApp lamah MNF chu an insawi thei zui nghal char char tih kha kan la hre reng a ni.
Aizawl Municipal Corporation (AMC) Inthlan dawnah Ramhlun South ah a ni tain ka hria kan Chief Minister bawk hian Assam Rifles te chu an insawn chhuah tur thu a sawi khan, "February chhungin" a ti a, kum 2021 February chu a pel leh ta duai mai a nih hi mawle hei le.
Kan Chief Minister khan a sawi tel chu 'um chhuak' tih niin hmun danga sipai awmte pawh um chhuah tur thu lam kha a sawi tel a, April a ni tawha an la chhuak lova, Assam Rifles te hi an hmanhmawh lo mah mah chu a nih hi aw! Keini chuan chhuak turin kan duh a, Zokhawsang lama an chhuah tur kan puanna pawh kum hnih a ral ta a, Lammual bula an gate te chu an la veng uluk si a, an la chhuak mai dâwn lo em ni le?
Assam Rifles hi Congress um chhuah theih chu ni se an um chhuak tawh ang. Assam Rifles hi MNF um chhuah theih a ni lova, chuti ni lo se chu an chhuak daih tawh ang.
Ministry of Home Affairs thu lo chuan an chhuak dâwn lova, Mizorama sorkar thu a ni lo tih chu kan chiang tlâng tawh a ni. Zokhawsang ah hian Mizoram sorkar chuan Assam Rifles hi hmun an pe tawh a, kawngpui an siam tawh a, tui an pe tawh a, electric supply an pe tawh a, an chenna tur pawh central sorkar lam niin ka hria an sâ leh vek tawh bawk a ni.
MHA lamin "In sawn chhuak tawh rawh u le" an tih hunah an chhuak mai dâwn a, Congress leh MNF tih lam a ni lo tih chu a chiang reng a nih hi.
Daniel Lalthanpuia