Anu kei chu ka hlau e mai

Zana ka ṭawngvai chuan 'Anu kei chu ka hlau e mai, an hnaihah pawh ka awm ngam lo' tiin ka lo au chiam a, ka nu chuan ka ṭawngvai chu lo hriain, kan room-ah lo lutin min lo sawi harh a, 'Mama enge maw i hlauh le, chuti tehchiama i au vak le? I nupui fanaute i ngai lutuk a nih kha' a rawn ti a, ka harh chhuak zawk.

Ka ṭawngvaih chiam zan kha chhung­kaw thil avanga ka nupui fanaute an zin lai ber kher a ni a, ka nu thusawi kha a mak lo e. Ka ṭawngvaih dan ka nuin min hrilh hnu chuan ka ṭawngvai chhan ka hre chiang ta kher mai. Kan vei zawng chu mumangah kan hmuin, kan ṭawngvaihnaah kan sawi chhuak fo an tih ṭhin kha a dikzia ka hre chiang ta hle.

Ni e, The Citizenship Ammendment Bill (CAB) hi kei zawng ka hlau em a, ka ngaihtuah nasa hle a ni. Dawihzep min ti mah ula, pawi ka ti lo, ka ngaihtuah chian poh leh hlauhawm ka ti tulh tulh. A chhan chu kan ram, kan hnam, kan sakhua hi ka hmangaih em a ni. Ni lo se, CAB hi hlauhna chhan tur a awm lo, kei zawng kan ram, kan hnam, kan sakhua chimral hi ka phal ve lo a ni.

CAB hlauhawmzia hi mi­thiam zawkte'n vawi tam an sawiin, an ziak tawh a, chu­vangin kei chuan sawi zau ve vak ka tum lo. Ka sawi duh hram erawh chu CAB hi pass a nih phawt chuan Mizo nuai 10 awrh hi kar loah kan ṭhenawm rama Hindu ho hian min rawn chimral dawn tih hi a ni. Kan tlem si, anni an tam si, CAB hnuaiah chuan awlsam takin India khua leh tui ṭhenawm rama Hindu-te hi an rawn ni dawn a ni.

Tuna central-a sorkarna fawng chelhtu chu BJP an ni tih kan hre vek awm e. NDA angin an kal a, mahse central sorkar kaihruaitu ber chu amal pawha sorkarna siam thei, MP ngah ber BJP hi an ni. BJP hi Hindu lal rama siam tumtu tiin an sawi fo a, phat mar tum mah se, an chet dan aṭang hian thu dik a nihzia a lang chho zel a ni.

A bik takin hmarchhak tana hlauhawm em em CAB pass tumin BJP-te hian hma an la, Lok Sabha-ah pu lutin chiang takin a tlang a ni. Rajya Sabha-ah majority an nei lo a, mahse pass ngei tumin political party hrang hrangte chu anmahni thlawp turin an ngen a, mahse an pass thei dawn loa an hriat vangin ngaihtuah turin an chhawp chhuak ngam ta lo a ni.

Rajya Sabha-a CAB pharh a nih tak loh avang khan ka thawveng huai a, mahse rei pawh a rial hmain BJP President Amit Shah chuan sorkarna an siam leh chuan CAB thar thawh leh an tum thu a sawi nghal. Rilru a mangang takzet a ni.

Kan hriat ṭheuh angin Mizo­rama sorkarna chelh mektu MNF hi BJP kaihhruai NEDA leh NDA member an ni. Heta member an ni hi awm lo tihna ka nei ngai lo, a chhan chu central-a BJP tih loah party lian leh dang chu Congress an ni a, anni hi state-a an khingpui ber an ni tlat a ni.

MNF-in NDA an thlawp hi an tih tur rengah ka ngai ṭhin. Mah se, CAB boruak a rawn rik tak hnu chuan MNF hi NDA aṭangin an inhnukdawk mai turah ka ngai a, ka lo ngai sual hle. Eng vanga vawiin ni thlenga inhnukdawk duh lo nge an nih tih hian ngaihtuahna a luah lo thei lo! Kristian zaa za tia inchhal Mizorama sorkar lai party-in, Kristiante chimralna tur dan siam tum BJP kaihhruai NEDA leh NDA-a a tel tlat hi thil mak tak a ni.

Mizoram hian Lok Sabha-ah MP pakhat chiah kan nei a, chumi tur chu kan hma lawkah kan thlang dawn. Heti khawpa mipui aṭanga nawrna a awm hnuah pawh NDA/ NEDA chhuahsan duh lo MNF candidate hi thlan tlin a nih chuan CAB duh lo lamah a phar dawn lo tih chu thil chiang sa a ni. Kan ram, kan hnam, kan sakhua hi chhimrala an awm kei chuan ka phal lo.

MNF-in MP atana an candidate hi a mimal chuan sawiselna tur pakhatmah ka hre lo. Mah se, a behchhan MNF hi CAB pass tum tlattu BJP lam ṭang an nih miau avangin Mizo mipuite'n ngun taka kan ngaihtuahna kan sen a ṭul tak zet zetin ka hria.

MP inthlan lo awm turah independent-a ding tur pakhat a awm chiang tawh a, ZPM leh Congress-in mipui candidate atana an vawrh chhuah an nei tawh a, PRISM lamin candidate an siam dawn thu an sawi tawh a ni. Candidate tur han hriat kim se, ka vote tur ka thlang fel ang.

Taka BJP lamin candidate an siam dawn thu an sawi tak e. Anni candidate hi chu central BJP lamin an thurualpui MNF candidate a tlin theihna atana an candidate tir a nih hmel a, vote tura en chiah ka ngai lo nghal. BJP candidate hi tu pawh nise, a tlin hmel lo a, chuvangin central BJP chuan anmahni thawhhpuitu tlinna chance nei MNF candidate a tlin theihna atan MNF nen thawk dun loa an lanna tur an zawnna a ni maiah ka ngai.

Sum leh pai lamah i buai lo a ni thei e, mah se maw i ram, i hnam leh i sakhua a him loh chuan engtik niah emaw him loh ni i nei dawn. I tu leh fate kan ram ngeia him loa an awm lohna atan ngun takin i ngaihtuahna seng la, rilru fim takin Lok Sabha MP inthlan lo awm turah hian vote thlak ang che.

Vanlalduatsanga