LAWNGTLAI - SIAHA KAWNG HI

Hman ni chu Lawngtlai leh Siaha lamah chhungte kanin ka zin a, ka rin aiin a lo nuamin a lo ropui. Mahse Lunglei - Lawngtlai National Highway saw engtizia nge maw ni a chhiat em em mai bik ni, a kawng a zim mai bakah a metal a khawk nasa tawh a, motor pawhin a rah lai ber tur zawngin a tlan tluan deuh ṭhak thei mai a!

He NH 54 kawng zauh tur lah hi tang ang maiin, a thawm chauh kan hria a, a tak ram a thleng mai thei si lova, chuvangin thuneitute hian sawlai kawng saw chu a thawm ṭhat dan ngaih­tuah vat atan a ṭha hle.

Lawngtlai - Siaha kawng mawlh saw a veiawm. Lawngtlai aṭanga han thlir mai chuan Siaha khawpui chu khi lai lawka khi tih mai turin a lang pe un mai si a, mahse NH 54 a han kal tak tak chuan a pan tur ni awm lo takin kan kal daih a, lungphur thleng tlang hel chu nep te a ni ringawt mai. Ning tawk tlan hnuah a tawp a tawpah kan thleng hram.

Lawngtlai - Siaha chu a boruak melah chuan a hnai hle a, tin, ṭhal laia kalna kawng, zau, nuam angreng tak an sial tlang. Motor lian pawh kal theihna, ‘Ferry Kawng’ an tih mai aṭang saw chuan a inhnaih hle. Sawlai kawng saw eng vanga sial tlang ṭhat a, metal road a an siam mai loh le tih hi zawhna lian tak niin a lang. Saw kawng zawk saw chu metal road chuan siam ngat sela chu sawnglai chhehvel khuate sawn an awl­sam phah ngawt ang.

Ka chhut a, sawng District Capital pa­hnihte sawn an Dis­trict Council ve ve ten mut mawh hnar mawhah neih se, metal road a siam turin, inthurualin ṭan la ngat sela chu kan chhim khawpui pahnihte saw an inhnaih sawt ang a, an changkan phah ka ring. Chutiang ngaihtuah chung chuan LADC leh MADC-te hi he lai kawng an ngaihtuahna turin home work pek a va ṭha em.

Ka vei pakhat chu ‘Ferry Kawng’ ah sawn signboard tar a va ṭha em tih hi a ni. Lawngtlai lamah chuan han bona tur vak a awm lo. Mahse Siaha lamah sawn kawng peng pahnih a awm tlat a, sawtah sawn sign board tar a ṭha hle awm e. A kawng peng ngil ṭha zawk awma lang saw khualzin, chinchang hre vak lo chuan Siaha kawng emaw tiin an zawh foin ka ring. Siaha kawng dik tak zawk chu lui mawng lam panna kawng emaw tih turin a kal bir ngat mai a, an zawh sual fo awm asin le! Sawlai pengah tak saw chuan Sign Board tar ni se.

Kei ni pawh kan kal tum hian kan mi zawh pa khan min hrilh dik lo deuh nge ni, veilam kawng zawh turin min ti a, kan zawh thui ta hle tihah khaw dai kan thleng dawn ta mai a, pa pakhat thingtuai pu kan han um phak a, kan han zawh nak chuan kan lo bo daih chu niin! Chuvangin, tlawmngai pawl engemaw te chuan sawlaiah sawn sign board fiah tawkin tar ngei se.

Kan sorkar, kawng ṭha duha hma pawh la nasa tak hian sawlai NH 54 saw thawmṭhat hna thawk ngei se tih hi ka rawt a ni. LADC leh MADC-te sawn an inkar kawng ‘Ferry Road’ an tih mai saw metal Road-in siam ve ve bawk se. Ferry Road a nihna ang sawn lawngleng hmanga inthiar kai ni reng tho se, khualzin veivak vel pawh a hip em em zawk bawkin ka ring.

Patrick Z, Chhingchhip