PLAYBOY MAGAZINE

Hmanni khan Playboy Magazine an chhuah chhunzawm tawh dawn loh thu khawiah emaw ka chhiar fuh a. Mak ka han ti dawn viau laiin a chutih vak lohna chhan ka ngaihtuah chhuak thuai a. A kaihhnawih thil eng eng emaw min ngaihtuahtir ta zawk. He magazine hi a tak phei chuan copy khat pawh ka la hmu lo va, chhiar pawh ka la chhiar ngai lo hrim hrim a. Amaherawhchu, American popular culture khuan min chiah hneh em avang hian lehkhabu dang, film, magazine, etc., -ah Playboy magazine nihna leh awmzia chu ka lo hre viau tho mai. Tih tawp a ngai ta hial hian khawvel inher danglam nasat tawhzia a tilang chiang khawp awm e.

Playboy -ah chuan eng nge awm
He magazine hi kum 1953-a an chhuah tan a ni a. A bu hmasa berah chuan Marilyn Monroe i thla a chuang kalh mai a, a chhungah a saruak thla a awm nual bawk nen, tifuh an inti char char hle awm e. Kum1960 leh ‘70 chho vel kha a vang lai a ni a, November 1972 phei kha chuan copy 7,161,561 lai hralh a ni a. Pui hem hem tak a ni. Mipa buaipui zawng dah khawmna, an thupui pawh ‘Entertainment for Men’ tih ngat, a nih avang te pawh aniang a, America rama college kal lai mipa 4 zela 1-in an lei thin, an ti bawk. He magazine hi ‘zahmawh bu’ ti ila kan sawi sual tam lo mai thei. Nula hmeltha, lar leh pian nalh te thlang chhuakin an saruak thlalak an chhuah thin a ni. Playboy magazine ‘cover girl’ nih phak ngat chu khawvel mite tana inchhuan fena tling pha a ni awm asin. Editor hi a fin riauna chu nula mal mum leh ruak keng kung thlalak ringawta kal ral bik lovin thuziak thiam tha ber berte a ruai a, article tha deuh deuh leh ngaihnawm ber berte a telh thin a ni awm e. Thenkhat phei chuan, nui deuh tet tet chungin, a article-te chu an lei chhan niin an sawi thin a, mahse chung zawng aia hiptu chu nula thlalak nge nge kha a nih hmel zawk.

Hun inher danglam a tuar bik lo
Heti khawpa mi’n an duh leh mihring rilru le lo mil magazine chu tla chhe thei awm lo tak a ni a, mahse khawvel inher zela thil inthlak danglam hi a tuar bik lo a ni ber awm e. Kum 2000 chho vel atangin a che chhe tan a, 2014 ah meuh chuan ‘hmeichhe saruak’ thla chhuah tawh loh tur thu an puang ta hial a ni. Internet khawvel a zo lo a ni ber awm e. Hmanlaia miten an lei ruih ruih nachhan ber hmeichhe saruak thla chu tunlai khawvelah chuan Playboy magazine ngai lovin mahni phone leh computer-ah an hmet chhuak zung zung tawh si a! An thlalak ‘cial deuh deuh te pawh a ho zo vek tawh! Thangtharin lei nachhan tur an nei tawh lo. An magazine ami aia pui tak tak an hmu hnem tawh lutuk a, he multi-million dollar company pawh hi a tla chhe rup rup mai a nih hi. A bu-a chhuah chu tih chhunzawm hleihtheih loh a nih laiin online chuan chhunzawm zel an tum a ni awm e.

Ngialngan zawk a tam tawh
Playboy magazine leitu an awm mumal ta lo hi mite an that tak em em vang a ni lo chiang a. Hmeichhe saruak thlalak thangtharin an en peih tawh loh vang leh, mipat-hmeichhiat kawngah thangthar an lo fel tak em em vang pawh a ni lo. Playboy ni lo a dang, hmuh awlsam zawk fe leh ngialngan zawk fe fe a tam tawh vang a ni. An ni pawhin ‘Kan chhuah thin te hi chu a ve mai mai a ni tawh a, thangtharte kut hmawrah engkim hmeh chhuah mai theiha a awm tawh vang zawk a ni,’ an ti. Hei hi hre lo palh kan awm a va hlauhawm em aw! Kristian tan tun hmaa Playboy magazine kha a Setana viau a nih chuan, tunlaiah chuan Playboy aia rapthlak i faten an hum reng tihna a ni thei ang. Fimkhur a va pawimawh tehreng em! Thalai leh naupangin an duhthala phone leh computer an buaipui mai hi a pawi theih turzia a chiang hle a ni. Hmantir loh theih emaw, an khal dan tawk thunun thiam a va tul tak e aw! Kum an tlin hma phei chuan duat tum avanga an ta bil tur leisak ang chi phei chu tih loh tawp atan a tha. An mamawhah chuan nu leh pate ta tawm ve mai sela a him ber awm asin.

Hriatna tui lian a nasa
Thu hi sawi mai ni lova a ziah dan an hmuh chhuah khan khawvel chu a tidanglam nasa ngei mai. Tawngkam inhlan chhawn leh ri hriat mai piah lamah ‘thu’ chu tihdanglam theih miah lohva vawn that theih a lo ni ta a. Hmasawnna ropui tak ni mah se, lunglehkha, savun, papyrus, lehkhapuan –an ziah thin te khan hun leh tha a duh hneminin mipui nawlpui a thleng tha zo meuh lo. Chumi hnuah lehkha chhutna khawl (printing press) an han hmu chhuak phei chu khawvel hi hriatna leh thiamna, sakhaw nun thlengin a her danglam bawih bawih mai a nih kha. Printing Press hi khawvel tidanglam nasa bertu thil pakhatah an ngai. Lehkhabu leh magazine a han chhuak tak tak chu, a tha leh tha lo a chhuak hnem hem hem hle a ni. Chumi hnuah chuan tun hun Digital age hi a lo inher chhuak ve leh ta a. Lehkhabu pangngai hun a liam tep tep: ‘A rit mah mah,’ ‘a man a tam duh,’ ‘khawvel a dap chhuak zo lo,’ ‘thing leh mauvin a tuar’ etc., an ti. Internet khawvelah chuan khawvel kil tin kil tang hi second khat loa liamah a inthawn zung zung theih tawh a si a. ‘Khawvel history-a hun inthlakthleng nasat lai berah i awm,’ an lo tih thin hi ka awih ta khawp mai. Tunlai khawvelah hian kan hmuh loh tur leh hriat ve loh tur tam tak kan hmaah chhawp chhuahin a awm ter tuar a. Puan hnuai thil leh pho chhuah tur chi pawh kan thliar hlei thei tawh lo chu a nih hi. Thlalak leh video tha lo tak tak chauh hi a pawina a ni lo, Chanchin Tha nena inmil lem lo zirtirna hian thangtharte hi a va han chiah hneh tak em! Theih patawpin tan la mah ila kan hneh lo deuhthaw a ni dawn si. Inthlahdah theih a ni lo a nia!

Min chiah pil lul suh se
Lehkha ziak mai ni lo, milem leh milem che thei (video) te hlei hlei hi kan kut phahah kan hmet chhuak zeih zeih tawh mai a ni a. Hmanlai chuan mihring chan chawp drama an chhuah a, mi a hip nasa thin hle a ni awm e. Kristian invawng takte chuan an duh lo hle thin. Drama chu cinema-in a rawn luah lan hneh hle mai a. Cinema hall te chu khawvel mite talna hmun, nawmsip bawlna chawi nungtu angin an ngai. Television an hmuh chhuah meuh chuan cinema dinhmun pawh a nghing lawih lawih mai. Chu TV chuan in tin luhchilhin Cinema hall-a an en duh lohte kha sitting roomah an en ta hem hem mai a ni. Mithiamten a sawhkhawk chhiat nasatzia an sawi thin. Tunlai hunah chuan TV pawh thangtharin an en peih meuh tawh lo – an kutah engkim an nei tawh si. Smartphone pangngai tak chak dan hi thlaa an inkahkainaa an hman computer aiin a chak fe an ti lehzel nia! Chumi hmang chuan i fate, naupang te te leh kan thalaite a run mek a ni. Playboy magazine te lek lek a ho tawh em mai, an ti. Engtin nge kan tih tak ang?

RE Ralte