Ka duhthusâm Govt. Super Model School & Hostel
Duhthusâm sawi hi thil nuam deuh mai a nia, hrisêlna atân pawh a ṭhat a rinawm. Duhthusâm han sawi hi chuan retheite pawh kan lo hausa a, ram hnufual deuh pawh kan lo changkâng a, dai kil kâra mi pawh kan lo ropui êm êm a, engkim mai hi a hlimawmin a phûrawm vêl vek.
Govt. super model school leh super hostel din a, elementary school ṭha tak kan neih theih dân tur duhthusâm sawi teh ang. School man toa lût ve thei lo tân a hlu dâwn êm asin!
Zawhna leh chhânna
Zawhna pawimawh tak mai pakhat chu engati nge sorkar school-a zirlai an tlêm tih hi a ni. A chhânna chu an luh duh loh vâng a ni mai. An duh loh chhan eng nge ni ang? Chhan hrang hrang a awm thei ang.
Sorkar school ngaihsân lohna hmân aṭanga an lo neih laklawh tawh vâng te, sap ṭawng thiam kan duh si a, ṭha taka sap ṭawng hman a nih loh vâng te, zirtirtute an rin tâwk loh vâng te, private school zirtirtute anga sorkar zirtirtute an inpêk tâwk loh vâng te, chhan hrang hrang avânga khawng taka discipline lekkawh ngam a nih loh vâng te, sorkar school âia kohhran leh private school ṭha zâwka an ngaih vângte a nih a rinawm. Hêng zînga ngaimawhawm ber chu nu leh pate bâkah zirlaite rilrua sorkar school ngaihnêpna intuh nghet laklawh tawh hi a ni. Engtia hmalâk tur nge?
Hmalâk dân tur
Duhthusâm chu sorkar school nêp lohzia leh ṭhatzia lantir nân Aizawl leh district khawpui tinah super model school leh hostel din tur a ni. Sorkar zirtirtu zawng zawng thiam êm êm vek mah se chûng super model school bîk atân chuan zirtirtu thiam bîk, taima bîk, tui bîk, zu leh zûk leh hmuam laka fihlim bîk, private school-ah pawh experience lo nei tawhte leh private school zirtirtute âia sap ṭawng thiam zâwkte dah khâwm ni se.
Mi bîk deuh lo tân chuan thawh a nuam lo ang - a hahthlâk dâwn. Headmaster ṭha tak, rorêl thiam êm êm dah ni bawk se. School building ṭha tak, naupang 1000 aṭanga 2000 vel leng tur sak ni se. Facility, faculty leh equipment ṭha tak hnuaiah zirtirtuten an thawk ang a, zirna a ṭha dawn si a, sorkar school leh sorkar zirtirtute nêp lohzia nu leh paten an hre nghâl ang a, kum hnih khat lek chhûngin admit sên loh zirlai an awm mai ang. A va’n ṭha dâwn tak êm!
School dangte hi
School zawng zawng hi super model school ni vek mai se a tih ngawt theih loh. Kêlkâng aṭanga harhna a rawn alh chhuak ang deuh khan super model school aṭangin sorkar school-te an rawn ṭha chhuak zel dâwn. An entawn zêl dâwn si a. Super model school-ah zirlai an tam dâwn. Seat an inchan dâwn lo. Mahse, sorkar school dang tam tak an la awm. Mahse, zirlaite an lût châk vak lo ang.
Chûng vêng hrang hranga school, zirlai tlêm tê tê neihote chu school hmun nei ṭha berah sawi khâwm leha vêng hrang hrang 10 vêl tân super model school pakhat siam belh mai tur.
Tichuan, super model school leh super model school an han inel ang a, private school leh kohhran school-te pawh he inelna thianghlimah hian an tel ve ang a, state education quality hi a ṭha dâwn chiang. Super model school chu a ṭul dân azira siam belh zêl mai tur. Aizawl leh district khawpui hrang hranga super model school siam zât tur kha chu a inang thei lo ang.
Sum sên vak ngai lo, zirna ṭha bawk si, sorkar super model school hi a lûn dâwn. Khawpuiah elementary school 10 bâk a ngai lo ang. A pui hep hep dâwn!
Thingtlâng lam school-te hi
Thingtlâng mite chuan lehkha an thiam loh bikzia an sawi ṭhin. An environment pawh inelna a awm lo a, zirna boruak a ṭha lo an ti fo. A nei deuhte chu khawpuiah an indah zêl. Inkhualtelem ang maiin khaw khatah school pahnih pathum, zirlai leh zirtirtu tlêm tê tê an awm. Nu leh paten an fate an chhawr nasa bawk. A lan dân chuan thingtlâng zirlaite lehkha thiam theih loh chhan chu rual elna environment a awm loh vâng niin a lang. Chuvângin, district capital dawta khaw lian deuhah super model school din mai tur. Chûng khuaahte chuan govt. super hostel siam tur.
Fee hi sorkar hian a subsidize mai ang. Zirlai 1000 vêl an kal khâwm chuan zirna boruak a ṭha ang a, environment pawh a changkâng ang. Primary school pakhat chu thingtlâng khaw tinah dah ni thung se naupang zual tân.
Tlipna: Duhthusâm ang chu ni thei se school tinin LDC/ Cashier/ Peon/ Chowkidar/ Sweeper/ Cook/ Security Guard (police/ homeguard) an nei ang a, zirtirtute paw’n MDM, Shaala Siddhi tih vel buaipui tawh loin zirtir hna an thawk thei tawh ang. Chhûn lam zirtirtu an awm ang a, hostel lam zirtirtu an awm bawk ang. Zirtirtu kan indaih bawk ang. Sorkar hian doctor a ngah bawk a, school leh hostel tinah regular takin free medical check-up an nei thei bawk ang a, an hrisêlna pawh a ṭha ang.
Tichuan, Findland, Norway tih vêl kan sawi reng tawh bîk lo ang. Duhthusâm sawi hi a nuam ṭhin mang e.
Miltona, Vaivakawn