World Optometry Day
World Optometry Day (23.3.2019) kan lo thleng leh ta. Optometrist te hi Health Care Profession zingah, a bik takin Mizoram angah chuan hriat lar an la ni lo hle a. Mipui mimirin kan hriat dan chu Ophthalmic tih hi a ni mai awm e. Optometrist te nihna, an hnathawh leh pawimawh bikna tlem azawng han thailang dawn teh ang.
Optometrist kan tih chuan mit lama thiamna bik nei, B.Optometry course zir zo tawh, graduate tawhte an ni a. Mi tam tak chuan opthalmic assistant (Diploma Course) te nen kan ngaih pawlh fo. Optometrist te hi Health Care Profession niin refraction bikah independent charge pek an ni a. Mizoramah chuan kum 2011 khan RIPANS ah chiah zirna hawn a la ni.
Optometrist te hna pui ber chu mit lama harsatna neite lo enfiah a, a ṭul dan a zir zela enkawlna pek te hi a ni. Mit lama harsatna hi eng vanga lo awm nge a nih a, eng natna chiah nge a nih tih, engtia enkawl ngai nge an nih tih hi Optometrist te kuta a innghat a ni. Khaw hmu fiah loten an lo hmuh fiah theihna tura tarmit chawh te, tarmit siam(fit) te, contact lens lo chawh te leh mit natna hrang hrangte lo chhui chiangtute an ni.
Hetiang tura a hranpa kum 4 chhung lo zirbing (training) tute an nih avangin Optometrist te hi an pawimawh em em a ni. Ram changkang zawkah chuan Optometrist te hi an ṭangkai em em tawh a, keini ramah pawh hian kan hman ṭangkai chhoh zel a beiseiawm.
Engvangin nge Optometrist kher rawn a ṭul? Tunlaiah Optical Shop (tarmit dawr)
ṭhenkhatah chuan hemi kawnga thiam bik ni lem loten khawl hmangin a thlawnin mit an en ṭhin a, khawlin a hmuh chhuah ang ang chu an chawh mai ṭhin. Hei hi a sapṭawng tak chuan Objective refraction tih a ni. Chu chu tarmit chawh tura min kaihruaitu pakhat ve mai chauh a ni. Hetianga khawlin a hmuhchhuah ang ang tarmit te chawh an nih ṭhin avang hian damloten harsatna an tawh phah fo a, hetiang lama thiam leh zir chhuak ngei Optometrist te rawn hi a ṭhain a him zawk hle a ni. I mita harsatna awm te kha eng vanga lo awm nge tih leh engtia enkawl tur nge tih lo hrilhtu tur che an nih avangin Optometrist te hi an pawimawh em em a ni.
Optometrist te hian tarmit chawh tur hian doctor puihna an mamawh hran lo. India ram khawpui hrang hranga damdawiin tam takah chuan doctor-ten an ṭhutchilh mai piah lamah a hranpain Optometrist te an ṭhu ve leh a. Anni pahnih ṭangkawp hian mit lama harsatna neite an lo enkawl ta ṭhin a ni. Mit lama harsatna enkawl kawngah hian 50% - 75% vel hi heng Optometrist te khawih theih a ni. Surgery (in zai) leh damdawi chawh tih loh hi chu Optometrist te tih theih thil vek a nih avangin mit lama harsatna neite tan pawh pan manhla tak an ni.
Thiamna a sang zel a, hriselna pawh kan ngai pawimawh chho deuh deuh a. Mit lama harsatna nei te, tarmit vuah ngai te pawhin mahni maia kan duh duh lo vuah ve ngawt lovin hetiang lama zir chhuak te thurawn hi la thiam ila. Mi ṭhenkhat ten an dampui avang ngawta a remchan ang anga mit thlawr (damdawi) lo hman ve ngawt te hi a him lo. Mit thlawr ṭhenkhat te hi a hmanna tura hman a nih loh chuan mit ti del thei hial zawk thil te an nih hlawm avangin fimkhur a ngai em em a ni. Chuvangin, kan mit mil ngei tarmit kan vuah a, kan mit natna in a mamawh tak enkawlna kan dawn theihna turin Optometrist te hi kan pan nachang hriat a pawimawh hle.
Lalrinchama, Optometrist