COVID-19 : SOP CHI THUM

A thâwm a na ngei mai, Covid-19 hripui thawh hnihna chu. India ram pumah ni khat thil thu lekah nunna hlu tak sâng dawn dawn a liam leh țan ta a. Mizoramah pawh nitin kai thar kan pung chho leh ta zêl a. Kan khawvêl hi a thim mup mup a ni ber a, hripui hùváng hi a nêp lo tawp mai. Hripui laka kan him nân SOP chi thum zui tur kan nei.

(1) Taksa lam SOP: Taksa lama kan mamawh SOP chu sawrkâr lamin a zam a, media chi hrang hrangah kan chhiar a, kan ngaithla a. Mithiamten uluk taka kan him nân an siam a ni a, uluk takin zuiin zâwm ila, kan nihlawh ang. SOP zui hian awmzia a nei tih chu zirchianna lam ațangin kan hre thei. Hripui hi a têt êm avanga mit lâwnga hmuh theih loh a ni a, a hrik kâi tawh mihringin mi dangah a kâi chhawn chi a ni a. Him kan duh chuan mi dang nên inpawm chilh loh te, inchibai rih loh te a țul a. Taksa chhûnga hri lût tur vênhim nân kut sil fai fo leh hmui-hmai kua khawih loh a pawimawh a, hmai tuamna hman tlat a țha tih kan hria. Natna hrik kha hla tak ațanga lo thlâwk vang vanga kan taksaah lo lût a ni lo hi kan vânnei hle a, Pathian hnêna lâwmthu sawina tur chhan țha tâwp a tling.

Hetih lâi hian mi țhen khat chu â takin kan nung a. Biak inah kan fimkhur viau laiin bazâr hmunah leh politik hmunah kan fimkhur leh lo a. Kan him kim lo palh ang tih a hlauhawm. Hripui nihphung ngaihtuahin, "Sâw-ti-lamah an fimkhur chuang lo, he-ti-lamah fimkhur bîk lo ang!" tih chi chu a ni hauh si lo. Lala a fîmkhur loh avânga Thanga a inthlahdah chuan Chhechhâwnga te vai dawr an sawi angin kan che chhe vek thei. Kan awmna apiangah SOP hi zâwm ngêi ila, hripui lakah kan him thei ngêi ang.

(2) Rilru lam SOP: Taksa lamah Covid-19 hi vei kher lo mah ila, rilru lamah nasa takin kan tuar thei. Hlauhna nasa takin min bâwm thei a, nunphung a buai vek thei. Rilru ber a chauh tawh chuan thahrui a rul zo a, kan chau chhe der thei. Vânduai thulhah Covid-19 hripui kâi palh ila, rilru lam a chauh der tawh chuan țang tur a awm tawh dawn lo a, kan dam thei nâng! Chu vângin, rilru lamah SOP felfai tak kan kalpui a ngâi.

I rilru kha fâwn vêl theia Pathian siam a ni a. I hlim reng thei lo a; i țap reng hek lo. I nui reng thei lo a; i chi-ai reng hek lo. A pangngâi hi vawng nung tlat ang che. Hripui lo thawk leh mup mup avâng hian thlaphâng mai lo la. Hahdam tak leh dam dapa lo dawnsawn tum ang che. A-eng-a-mah hmâa i chi-ai mai chuan i taksain hripui kai lo mah se, i nun pumin a chauhpui vek dâwn asin.

Țah hun a awm, nuih hun a awm. Țahna áwm takah pawh i nuih vur vur reng chuan i pangngâi tawh lo. Nuihna âwm takah pawh i țah reng chuan i pangngâi tawh lo. Hripui khawdur mup mup hlaua i phi ruai hian i rilru a la pangngai; mahse, i nun ram a kûlcho vek a, tho chhuak hleithei loa i chhûngril nun a rûm reng a nih chuan a pangngâi tawh lo; i rilru hrisel fâwn vêlin a sen a kâwk tihna a ni. Counseling dawng ngei la, inenkawlna dawng thuai la, dam turin bei ngêi ang che.

Dam lohna a awm chuan damna pawh a awm. Beidawnna a awm chuan beiseina pawh a awm tur a ni. A pangkhing lehlam chauh hi a awm chhun a ni lo tih hria la, a thim lam kuahbet tlat loin a êng lam bawh ang che. Inbûkna chu a lehlam lehlam a inhniam chhawkin a insân chhâwk țhin angin, i rilru hrisel fâwn vêl hi a hun bi ang zelin her rem tum la, insiamrem țhin ang che.

(3) Thlarau lam SOP: Thlarau lam SOP hi midang emaw sawrkâr siam rin tur chi a ni lo a, nangma siam tur a ni. I țhenawmte siam ring suh la, i țhiante siam ring hek suh. I thlarau kawng zawh a dik lo thei a, a tâl buai hlen thei. Kohhran pawh a dik leh dik lo a awm; Kohhran dikah chuan Bible a chungnung țhin.

Mumang ram leh inlârna te hnâwl kher loin, Pathian thu nung "Bible" thu hi a lâilumah dah reng la, nghet takin vuan la, thlah ngâi suh ang che. I thlarauin lungpui nghet, nghîng ve ngâi lo, chatuan mi, Krista zawm rawh se.Taksa SOP lamah hlawhchham palhin, rilru SOP lamah hlawhchham lehzel mah la; i thlarau lam SOP a fuh tawh chuan hlauh tur i nei lo. Covid-19 pawh lo vei tehreng la, i dam thuai ang a, i tho chhuak leh thuai mai ang. Lo thi palh ta pawh ni tehreng la, i nung reng ang. Hripui lêng kâr nun hlim, nun hahdam, nun nuam; hripui vei chunga damna leh thihna hial chunga nun châwl chu i chhar thei alâwm.

Zo-fate hi hripui lêng avânga indawm kun hman kan ni lo. Taksa lama SOP zui tur kan neih hi țha takin zui ila. Rilru lam SOP hi hlamchhiah mai loin țha takin vawng ila. Thlarau lam SOP dik zui ngei bawk ila. Kan thunun phâk loh covid-19 hripui hrâng leh mêk hi huaisen tak leh hlim taka hmachhawn turin i inbuatsaih țheuh teh ang u.

Rev. Lalbiakhlira, Mamit