Mizo mipuite laka hmai phih tumna resolution?

Eight Mizoram Legislative Assembly Session vawi 2 na - ni 12 -20, March, 2019 a neih zawh takah, a ni tawp ber ni 20 khan Home Minister Pu Lalchamliana chuan Citizenship Amendment Bill - 2016 tharthawh duhlohna Official Resolution a pu lut a, hei hi Assembly chuan a pass ta a ni.

Congress Sorkar pawh khan kum 2018 khan Assembly Session-ah CAB - 16 duhlohna hi an lo pass tawh a ni. State Assembly-in a duh loh a pass ngawt chu awmzia teh chiam a nei lo hle a ni ang, ni 8 Jan, 2019 khan Lok Sabha chuan CAB - 16 hi a pass ta tho a nih kha. Hei mai a ni lo 17 Feb, 2019 khan Lakhimpur, Assam ah BJP National President Amit Shah chuan, kan hma lawk MP thlana an sorkar leh chuan CAB 16 an thar thawh leh tur thu nen lam a sawi a. Hei hian state-in kan lo pass ve hian awmzia a neih lohzia a pholang chiang hle a ni.

Central-a BJP leh an sangawi zawnpui NDA/ NEDA hmanga an thlunzawmho (Mizoramah chuan MNF Party - chauh hi NDA/ NEDA a tel an ni, i chian duh chuan i phone-ah khan NDA/ NEDA member list google aṭang han zawng la i hre mai ang) te hian sorkarna an chang a nih chuan Mizote tana Bill Sakei kan ram, hnam leh sakhua nekchepna leh chimralna tur CAB 16 hi an pass ngei ngei dawn tih kan hriat tlan a ṭha.

A thuhrimah MNF Sorkar hi 15 Dec, 2019 ah khan lakluh a ni a, tunah hian thla 3 hmel a hmu tawh a ni, chumi chhung chuan he Bill hi Lok Sabha-ah 8 Jan, 2019 ah Pass a ni. Rajya Sabha ah 13, Feb, 2019 ah an pharh talo hlauh a nih kha, khang hun lai khan MNF hian CAB 16 hi an do tak tak a nih chuan Central lama NDA kal tlanga an mawngzawm BJP hotute vau zam nan Emergency Session/ Special Assembly te pawh koh awm tak lah ni a. Session hmasa ber ni 18 - 20 Dec 2018 chhung te khan CAB 16 thar thawh duhlohna Resolution te hi put luh daih tawh awm tak a reh hmak bawk si. Tin, All NGO Co-Ordination Comtt-te'n he Bill duhlohna lantirna atan Republic Day Boycott an tum a, MNF Sorkar hian hman hram dan zawngin mipui tel loin official-ten an hmang ta hram a nih kha. Kan ram, hnam leh sakhua tana NGO te hmalakna han ngawihpui mai ai chuan Delhi tlanga an pute tih lawm loh an hlau a, pute bulah thangṭhat lak an duh viau te pawh a ni mahna.

Tuna taka CAB 16 thar thawh duhlohna han pass leh si hi kan hma lawk MP thlana mipui laka hmai phihfai tumna te pawh a ni hial awm e. Mizoram State BJP President Prof JV Hluna chuan 12 March, 2019 khan BJP Office ah Press Conference koin MNF Party chungchang hetiang hian a sawi "MNF Party hi Delhi a BJP/ NDA em em, Mizoramah insawi fihlim tum em em, lehlama awrsen, lehlam awrdum an ni" a ti. State BJP President meuh hian dawt muhlumin MNF Party hi a puh lo tawp ang tih a chiang hle.

Hetiang ang a nih lai hian CAB 16 thar thawh duhlohna official Resolution-ah khan C.M leh MNF Party President ni bawk Pu Zoramthanga chuan CAB hi Parliament-in a pass lui a nih chuan NDA aṭang kan in hnukdawk nghal ang a ti a nih hmel a. NDA leh NEDA hi sawihran theih loh thil thuhmun an nih thu a sawi bawk a ni. Kan CM-in NDA aṭang kan in hnukdawk ang tih a sawi hi thu awmze nei lo, sebo hnu a se kawngkhar an sawi ang chiah niin a lang. He Bill hi an pass tawh miau chuan anni in hnuhdawh hian awmzia a nei lo viau ang, a nih tur ang zawng zawng a ni vek tawh dawn tihna a ni.

Hei mai hi a ni lo Aizawl S III MNF North & South Block te'n Aibawk Field-ah Sorkar thar an lawmnaah khan C.M hian "A ṭul chuan NDA a ṭanga inhnuhdawh kan hreh hauh lo" a lo ti tawh bawk. BJP nen NDA kal tlanga an inzawmna hi CM hian a puang chiang hle a ni. 2018 MLA Election khan MNF te hian Pu Lalduhoma leh BJP inzawm niawm fahranin lehkha Zoram pumah an thehdarh chuai chuai a, anmahni zawk hian an lo mawngzawm tih a lang leh ta si. Kan hnam, ram leh sakhua tana Bill Sakei pass tumtute lama la ṭan tlat duhna thinlung MNF party ten an pu tlat hi a chhan ṭha tak chu a awm ngei ang le?

Han sawi belh leh chakawm deuh chu MLA Election 2018 a MNF ten an aupui ber chu cheng nuai 3 In tina sem, NLUP dawng tawh zawng zawng pawh pek vek, Budget Session hmasa berah SEDP tan vaibelchhe 1500 aia tlem lo kan ‘dah’ ang tih te a ni.

Heng hi pakhat mah a thleng lo, sawi rik ber chu Assembly Session ṭan niah Governor-in "SEDP hi a sem a, sem tur a ni lo" tih zawng kha a ni leh mai. Thil lang chiang ta ber chu Pu Hawla'n "Delhi drip khaia nung kan ni" a tih

ṭhin kha, tuna kan Sorkar hian NDA hmanga an mawngzawm Delhi tlanga BJP hruaitute khu an tihlawm hliah hliah a ngai, sawi leh intiam kam an ngah si an project lo pawm a, lo reject theitute an ni si. Kan ram a intodelh lo a, sum lakluhna (source of income) mumal kan nei hek lo, midang te ringa nung ‘kutdawh’ a huaisen theih miau loh. NDA/ NEDA

ṭanga Break Off ngawt kha a hreha hreh ngawih ngawih tur niin a lang ve tlat.

Zu zawrh issue a tawp a, tuna issue lian ber chu CAB 16 hi kan sorkar chuan kan thar thawh leh ang tih BJP President Amit Shah-in a sawi hi a ni. Sap thufingin, 'Prevention is better than cure' a tih angin BJP leh NDA ten kan ram, hnam leh sakhua chimrala kan awmna tur CAB an pass lohna tura Mizo mipuite kan invenna tur ber chu BJP thawhpui NDA/ NEDA (MNF) candidate tih tlin loh hi a ni ber mai awm e.

Rama Khawlhring