Nuai 150 leka District!
MNF in inthlan hmaa an intiam angin Mizorama hmun thumah District siam an tum a, heng area te lawmpuina chibai ka buk e. Churih rualin Hnahthial, Saitual leh Khawzawl mipuite cheng buai 150 hmanga District bul ṭan an tum avangin sorkar lakah ka vui pui che u a ni.
MNF sorkar a lo din khan Chief Minister zahawm tak khan Aizawl parking siamna tur kha crore 10 a dah nghal pang a, kha kha an siam thar Parking House Support Scheme (PAHOSS) atan a ni. Sorkar kum tharah chuan Aizawla parking siamna atan hian crore 100 vel kan dah dawn kha a ti leh bawk a, Aizawl khawpuia parking atana sum dah zat en hian District bulṭanna tura nuai 150 den den dah hi chu inhmuhsitna ang hial a niin ka hria.
Han chhut ve vang vang ula, tunlaiah chuan in pangngai ve deuh hi chu nuai 150 man aia tam a ni deuh vek tawh a ni. District bulṭanna tura pawisa hi an dah tlem lulai deuh a ni. Lawmna tur a ni lo. Parking siamna aiin a let tam takin ngaih pawimawh a hlawh lo a ni. Heti reng reng chuan a zialo lulai a ni.
District pathumah hian nuai 500 diat diat tal chu dah ve ni se, a hriatthiam theih deuh tur. Tuna mi hi chu sa ṭah chhuak pek an sawi ang lek a ni si. Aw, Khawzawl, Hnahthial leh Saitual mipuite u, nuai 150 dah ting tang hi in lungawi loh dalna mai mai a ni.
Lawng bungah a chuan theih loh, chuvangin hmasawnna hi rualkhai taka a kal a ngai.
Hmasawnna rualkhai taka kal tur chuan District mil tawk pawisa a awm ve a ngai. Tunah hian cheng nuai 150 hmangin sorkar hian in ka hup a tum mek a ni ber a, District function thei lo an pe che u a, in lungawi a nih ngat chuan a tuartu tur chu in District huam chhunga mipuite bawk in ni dawn. Hnathawk thei lo District ke bai neih ringawt hi lawmna tur a ni lo e. Tun hi a hun lai a ni a, in tlai hma hian in chanvo nei ngei turin ṭan la rawh u.
"Engmah tih loh ai chuan a lawmawm tho tho," in tih theih chuan thuhran a ni. MLA inthlan dawna an sawi dan leh nuai 150 lek dah hi zawng ka lainat che u a ni.
Lalthanmawia