Kawngpui ticheptute hriat atan

Upa Pu Lalhluana In dawt chiah aṭanga Pi Remsiami (ṭawngtai ṭhin) in inkar, Upper Republic leh Sikulpuikawn inkar kawngthlang lam zawng hi a bikin kawngthlang lama in satute hian kawngpui an nek chep a, he kawng pawimawh tak hi ke a kal chang hian chetsual/ tluksual palh hlauh­awm tak a ni.

Tunhma zawng khan he lai kama in satute hian sawrkarah thuneitu leh kawngpui enkawltu PWD hi in an sak dawnin an rawn lo nge an mahni duh danin kawngpui hi an nek chep ta mai zawk? PWD Minister huaisen deuh, sawrkar ram chin leh kawngpui humhalh ngam, Aizawl khawpuiah hian kan mamawh ta hle a ni.

Aizawl khawpui hmun hrang hrang nek cheptu, mahni compound baka kawngpui kam a in satute hian traffic jam leh mipui tan a hartsatna nitin hian an thlen ṭhin tih inhria sela a lawmawm ngawt ang. Tin, traffic jam chhan tam tak hi chu a bikin Two wheeler (lirthei ke hnih nei) te hian traffic jam lai hian hmanhmawh fal bik leh file pawimawh rang taka thawh tur nei ni awm tak hian motor karah an inzep thuai thuai ṭhin a, fel lo tak a ni.

Two wheeler khalhtute hian traffic jam lai reng rengin lane (line) hnih a inzep kual bik lo hian hmanhmawh ve tho mi motor hnungah intlar dan leh kal dan zir sela a ṭha ngawt ang.

Heng harsatna an siam chawpte hi traffic duty leh an hotute hian endik zung zung bawk sela, dan bawhchhia chu tupawh man hmiah hmiah bawk sela, traffic jam zualpui hi chu a ziaawm sawt ang. Chuvangin, Aizawl khaw­puiah mahni compound bak kawngpui nekchep zawnga in sa zawng zawng leh traffic ti jam tute hi sawrkar thuneitute leh dan kengkawhtute hian huaisen takin endik thlap ngam sela.

Vote duh vang leh tlak hlauh vang ringawta dan bawhchhetute hrem ngam lo hruaitute hi (MLA/ Counsellor/ VC) traffic ti jam tu an ni vet ho. Mi huaisen, taima leh rinawm ram hruaitu dik bawk si kan mamawh hle. Kawngpui nek cheptute leh kawngpui zah lo taka kawngkam a mahni compound baka in satute hi an entawn tlak lo viau a ni.

Sawrkar kal tawh hma­chhawp (vision) ṭha tak tak, entirnan:- PC Ministry hunlaia Chief Minister zahawm tak Brig. T. Sailo (L) an Aizawl khawpui tih zauhna tur (Capital Expansion Project) Luangmual, Tanhril, Sakawrtuichhun etc. lama sawrkar pisa lian zawng zawng insawnna tur a lo duan sa thlap, central sawrkar pawhin Financial Sanction a pek fel diam tawhte kha a hnung chiaha Chief Minister Pu Lal Thanhawla khan chhunzawm sela chuan heti em em hian traffic jam leh buaina tenau siamchawp te hi a awm lo tur! Pawi tak a ni pawi tak.

Tin, Bairabi Hydel Project te pawh kha nuihza siam nan hmang liam mai mai lovin taima takin chhunzawm mai sela, Pu Hawla hian hmingṭhat leh chawimawina ‘lal lukhum’ a khum mai tur! Mahse, Congress sawrkar chhung zawng khan an chhunzawm duh tlat lova, a va pawi tehlul em! Tlai luat te hian pawina a nei a nih hi. Engpawh nise, kan thlen chin aṭang hian hma i sawn zel ang u.

Sawrkar hmasa hmachhawp (vision) chhunzawm duh loh hi a fel lo khawp mai. Mizoram Chief Minister hlui zahawm tak, Brig. T. Sailo (L) mipui vantlang tana hnathawh

ṭhat avanga lawman (Padma Shree) hmutu/ dawngtu khan, Bawngkawn leh Kulikawn inkar kawngpui hi nakin lawkah motor/ lirthei leh mipui kan la pung zel dawn a. Kawngpui thar - New Capital Project fel tak a duang a. Luangmual, Tanhril, Sakawrtuichhun leh New District jail lamah capital expansion project mumal tak duangin, central sawrkarah sum (financial sanction) pawh an hmu vek tawh a. Mahse, kum 1984 MLA inthlanah khan Congress leh MNF (underground) ṭangkawp khan an paihthla ta si a, Congress-I (Indira) sawrkar CM ropui tak, Pu Lal Thanhawla khan a chhunzawm duh ta lova, kan buai zo ta a nih hi.

Bairabi Hydel Project, sum tam tak senga Pu Lalhming­thanga, Ex-Power/ Finance Minister chak takin PC sawrkar laia a lo duanfel vek tawh te pawh Congress sawrkar hun chhung zawng khan chhun­zawm duh sela chuan, power (kawlphetha) lama kan manganna leh harsatna zualpui hi chu a ziaawm deuh tawh mai tur!

Serlui-B Hydel Power takngial pawh an hawng (commission) duh si lo! Mahse, Tuirial Hydel Project (chhe vek tawh) erawh Pu Lal Thanhawla/ Pu Lal Thanzara te khan an ti puitling ve a, BJP PM Pu Narendra Modi an ropui takin a hawng a, a

ṭha ve tho alawm. Kan ram tan hian rail kawng mai mai ai hian Bairabi Hydel Project hi a pawimawh fe zawk. Ṭhalai hna nei lo leh kawlphetha hmanga eizawngtute tan hian Bairabi Hydel Project te hi kan sawrkar thar duhawm tak, Pu Zoramthanga kaihhruai ngei mai hian, Dr. R. Lalthangliana ten ena inrawnin han bawhzui tak tak se, thil harsa lutuk a ni lo ve.

Engpawh nise, in hmangaih tawnna chauh lo chu ba lovin, kan thlen chin aṭang khan hma i sawn zel ang u.

HF Rohlupuia, Social Worker