Min Hnualsuat Ve Lotu Chu Lal Isua Chauh

“ Mihring chu tumah famkim kan awm lo” tiin chhuanlam mawihnai tak kan siam reng thin a, kan tlinlohna sawi nan tak kan hmang thla zen bawk a, a dik em em lai hian a hnung kan zui kan Pathian chu a famkim a, Pathian a ni a, a famkim reng ang chu tih hi zawhna lo kal nghal chu a ni. Kan Pathian ang em em hi chu kan ni hauh lo vang a, kan ni thei bawk lo vang. Mahse, amah an-na chu kan nei ve thei a ni. “In Pathian ni turin Aigupta ram atanga hruai chhuaktu che u LALPA ka ni. In thianghlim tur a ni. Kei ka thianghlim ang hian.” ( Leviticus 11:45 ). Kan Lalpa hian kan tih theih tawk lo chu min phut hauh lo vang. Kan thianghlim ve thei ani tih hi. Helam chu kan sawi tam lo mai ang.

Khawvel hi hripuiin min tuam hlup hlup a, Mi tam tak hri kan kai a, mi tam tak an thi bawk a. A reh dawn emaw tia kan thla a muan tan laiin a thawh hnihna thlipui chu vung takin a rawn kal leh mek ta. Kan khawpui pawh a mi chenga te chhuak thei lo turin thuneituten min kharkhip mek a. He hri hian enge harsatna min thlen zel dawn tih lah kan sawi thei si lo. Kan hotuten an sawi pawimawh em em chu thuawihna hi a ni. Hri laka kan invenhim theihna tur leh kan him theihna turin tih tur leh tih loh tur an duang chhuak a, chu chu thuawih taka kan zawm phawt chuan engemaw chen kan invenghim thei dawn a ni. ‘Thuawihna’ hi eng kawngah pawh a pawimawh vek mai. Ringtute tan phei chuan a pawimawh zual hle a ni.

Kan Pathian thu kan awih chuan thih hnu piahlama kan awmna tur chu Lal Isua bulah a ni ngei dawn a. A thu kan awih loh erawh chuan chatuan hremhmun ah a nih tur thu Pathian thuin min hrilh a ni. Khawvela kan chen lai pawh hian kan hotute thu i awih ang u. In chhungkhurah kan nu leh pa thu i awih ang u. Chu chu Pathian duhzawng pawh a ni ngei ang. ‘Thuawih’ tih ngawta sual lam kawnga thuawih erawh heta kan sawi tum hi chu a ni lo thung.

Thuthlung hlui hunah khan phar natna an sawngbawl dan kha tuna covid-19 hri nena inan-na lai a awm a. Phar natna vei nia lang chu Puithiam hnenah a kal thin a, Puithiam-in nguntakin a lo en a, a pan lai hmul chu a vara, a pan dan chu a vel vun aia thuk hlea a lan chuan phar natna chi a ni a, mi bawlhhlawh anih a puang thin. A pan chu a vara, pawnlang hlea a lana, a hmul pawh a var loh bawk chuan puithiamin ni sarih chhung a awm hran tir ang a, ni sarih hnuah puithiam chuan a en leh ang a,a pan chu a ngai reng a, a darh loh chuan ni sarih dang a khung hrang leh ang. Ni sarih hnuah a en leh ang a, a pan chu a darh loh a, a lo hil chuan mi bawhhlawh a ni lo tih a puang ang. ( Leviticus 13 :1-17 ). Mi bawlhhlawh ‘phar’ chu ramhnuai-ah te an dah thin a, tumah tlawh pawhlohin an awm thin a ni. Miin an ten em em a, an hlau a, an tih a ni. Phar lan chhuahna (Sympton ) an lo nei anih pawhin ni 7 chhung an khung hrang phawt te te thin a ni. Phar natna veite chu an khawngaihthlak em em thin.

Covid-19 hri leng mek pawh hi kan hlau a, Mizoram min rawn run tan tirh phei kha chuan tu pawh kha hlau thlabarin kan awm a. Vei pakhat hmuh chhuah ringawt pawh kan khawpui boruak chu a hnim a, a reh thuap anih kha. Hun lo kal zelah erawh zawng kan hlauh dan a nep ta. Phar natna vei ang deuhin covid-19 vei, positive chu a hrang hlakin dah hran an ni a. An mahni hnaihtu pawh sarang-a inthuam-in kut kawr nen, kai theihlohna tura thuam famkimin in atangin kan in phur chhuak vawn vawn mai a. A lo thlirtu leh hretute pawhin kan hlau a, an kalna hnu, an awmna hnute silfai a ngai a. Positive hnaihtute zawng zawng chu chhui nghal zel an ni a. Phar natna khung hran ang deuhin covid-19 positive lo hnimhnai-tu zawng zawngte chu tuma tlawhpawh lovin khunghran nghal vek an ni. Heng ho hi tunah chuan ni 7 naah endik leh vek an ni. An negative chuan an zalen a, an lo positive chuan enkawlna hmun siam bikah an mahni chauha khung hran leh an ni. Tu pawn kan tih vek a, chhungkhat laina te pawhin kan hmu thei miah lo a ni.

Phar natna bawlhhlawh tak, tihdam theihloha ngaih hi Lal Isua erawh chuan engmah hnualsuatna nei lovin a rawn tidam tih kan hmu a ni.” Vawi khat chu khaw pakhata a awm laiin pa pakhat, a taksa puma phar hian Isua chu a hmu a, bawkkhupin tihdam a dil a,”Lalpa, i duh chuan mi tithianghlim thei e,” a ti a. Ani chuan a han ban a, a dek a, “Ka duh e, lo thianghlim tawh ang che,” a ti a. A phar chu a lo dam ta nghal a.’’ ( Luka 5:12,13 ). He phar veitu hian dan a bawhchhia a ni. In chhungah nge pawnah a awm tih a chiang lo va, mi dang awm leh awm loh a ngaihtuah miah lo va. Lal Isua chiah a ni a hmuh chu a ni. A mamawhna a nasat em avangin a dan bawhchhiatna chu Lal Isua a mamawh zia tilangtu a ni tlat a ni.Phar hian Isua a hmu chiang em em a, tidam thei tih a chiang a ni. Lei sia bawkkhup hi inngaihtlawmna tawpkhawk a ni. Amah mamawhtu em em chu Lal Isua hian a chhang a, amah chu a dek a, a lo dam ta, a lo thianghlim ta tih kan hmu. Lal Isua chuan tumah hi a thliar ve lo va, natna tenawm tak, miten an hlauh pawh a ti dam a, Uire-nu lunga den hlum tur pawh ani chuan tha takin a hrilh mai a nih kha..

Lal Isua Chauh Hi A Ni: Covid-19 positive niin miten an hlau che a, an hnaih ngam lo che a, an hmu ngam lo che a, i sulhnu ringawt pawh damdawi hmang ten an tifai a, i chil per pawh an hlau em em a. Ral khata hmuh che pawh an hlau em em a, i bawlhhlawh paihna tur thlengin an buai a, i thawmhnaw, i towel zar hmuh ringawt pawh an sawisel che maw? Khawvel hi zawng hlauhawm tamna a nih hi!! Pathian rawngbawltute ngei ngei pawh an tih che ni lawm ni? Khawvel mihring zingah hi zawng a awm hliah hliah mai. Hri kai chhawn a hlauhawm em atin ni. Mahse maw, Lal Isua chuan positive ni mah la, a hlau ve miah lo che a, i bulah khan a awm reng a, a kuah reng duh che a sin. A ten ve lo che a, i bulah pawh a mu duh a, chaw a kilpui duh che a, i khawharna kha a hre em em a, i pindan mutna khawhar takah khan nangmah kawm turin a inpeih reng zawk a ni. Amah chu ngaihsak la, i pindan chhung zawng zawng chu Thlarau Thianghlim-in thla a zar ang a. Tih thianghlimin a awm dawn a ni. A ni chuan i mangan lai te, i khawhar laite pawhin a kalsan tawp lo vang che. A awmpui reng zawk dawn che a ni. Midang en lovin Lal Isua chauh en rawh khai. Amah-ah chuan chatuan nunna a awm si a.Ani chuan min hnualsuat ve ngai reng reng lo.

R.Zomawia