INBIAKNA AWMZE NEI LO

Mamit leh Karim­ganj bawrhsapte inbia kha engmah awmze nei lo leh ṭangkaina nei lo a ni. 

Karimganj bawrh­sap Anbamu­than MP hi Mizoram chhunga a chekawite nena mi thlam hal a, mi kuhva kung chinte an tihchhiat avanga man tur a ni zawk; man si lova lo zu biak hi a ṭul lo. Sorkar hotu, official liante hian hetianga inbiakna awmze nei lo hi bawrhsapte tihtir tawh suh se. 

1. Ramri-a rem­na leh muanna a awm theihna turin thawhhona ṭha tak nei chungin hmalak­na kalpui nise tih a ni a. State pahnihte hian anmahni huam chhung ve ve buaina a awm lohna turin hmala se tih an ni. 

2. Mamit leh Karim­ganj thuneitute hian motor veivak te pangngai taka an kal leh theihna turin leh a bik takin Essential Commodies phur­tute LPG leh a dangte chu khawi lam ve ve aṭang pawha dodal­na awm lova an kaltlang theih nan enpuia hmalak nise, tih a ni bawk, tih vel hi awmze nei lo mai a ni. 

Mizoram chak lakna kawngpui dan pin an hlih hma chuan Assam state emaw ṭhenawm district emaw hi biak an ngai lo. Keini lamin kawngpui lo danpin ve hi a ṭul hran hek lo. Mahse, an danpin chhung chuan sorkar laipui nawrna pawh ni raw sek sek, inbiakna neihpui tawh loh tur a ni mai. Ramri a Police dah pawh hnuhkir loh tur. Sor­kar laipui a inrawlh duh lo a nih chuan an thu a ni mai. An duh chen chen min han hrek (economically strangulate) teh se. 

Tun hi duap kaih hun a ni mawlh lo. Mizo­ram mipui chak lakna kawngpui dang ping a, ei leh bara min hrek thei tih avanga min vau beh mek hi silaia beka tin reng chunga an duh ang min tihtir tumna a ni. Sorkar ve si dawt hlir an theh darh zui bawk. 

Silai a kan beka min tin chunga inbiak hi awmze nei lo a ni. Inbiak tawh loh tur a ni tawp mai. Lailapur lama kan hotute an kal dawn a nih chuan kan Mizo lirthei leh a khalhtu tangkhangte hruai chhuak tura Police nena an kal hunah ni tawh rawh se.