District thar neih hi...

India ram pumah State leh UT chhiar telin District 788 lai a awm a. District ngah ber UP-in 75 an nei. Bihar-in 38, Rajasthan 33, Tamil Nadu 32, Gujarat 33 te hi a nei tam zual an ni awm e.

Hmarchhakah Assam-in 27, Arunachal-in 22, Megha­laya 11, Nagaland 11, Tripura 8, Manipur 9, Mizo­ram 8 bakah 3 kan neih belh dawn ta. Heti chung hian Meghalaya leh Nagaland kan zat chauh ang a, Arunachal chu 11 in kan la pha lo dawn a ni.

Heihi mi ṭhenkhatin an lo huphurh lawk a, kan tlin lo ang te an ti. Eng Party pawh Sorkar se, District 11 enkawl zawh loh chu Sorkar nep tak nihna a ni ang. Kan rilru hi a hniam khawp a, kan tih theih tawka kan ngaih pawh a hniam hle. MLA nise kan chhehvel state zawng zawngin seat 60 an nei a, keinin seat 40 kan duh tawk a. Party hruaitute pawh hian an duhtawk mai mai niin a lang. State-ah chuan MLA 60 aia tlem lo 500 aia tam lo an awm tur a ni (Art 170) Dan puiin a tih laiin India dan phal sa seat 20 kan han duh lo a nia! MZP, MSU te hian nawr vut vut awm zawk a ni.

District neih hi a hlu a, a huam chhunga mipui tan hmasawn phahna tur tam tak a awm. District Capital tan lek phei chuan thlakhlelh tham a ni. A chian em emna chu Serchhip, Champhai leh Mamit te hi District capital an nih hma leh hnu chu inthlau tak a ni. Khaw lian nazawngina ngen chi lah ni si lo.

Congress sorkarin term hmasaah an tlak dawn hnaih khan District 5 an puang a, a hnua MNF a sorkar leh ta si khan an ti puitling vek a. Kum 2008 ah MNF khan 3 - Khawzawl, Saitual, Hnahthial an puang ve a, Congress an sorkhar leh ta si a. Kum 10 chhungin pakhatmah an tipuitling lo. Campaign nan an hmang chungin an ngaihsak leh tak si loh avangin Pu R.Lalzirliana, Cabinet Minister chuan Congress a chhuahsan phah ta hial a nih kha.

Pu Hawla’n Hnahthial mipuite hmaah, ‘tiam zela ang ni lovin hei chauh hi chu ka tiam ve ang che u, Hnahthial District hi fuke kimin kan ti puitling dawn a ni’ ti meuhva a tiam chu kum 10 chhungin engmah a ti thei lo va.

Hei tunah 2019 budget ah MNF Pu Zoramthanga Sorkar chuan a rawn tipuitling dawn ta. Khawzawl, Saitual, Hnathial mipui tan chuan lawm hliah hliah tur niin ka hria. Heng thil lian thamah hian tunge thil ti tak tak peih a, tunge peih lo tih pawh chhut a ṭha. Khawzawl mipui, Saitual mipui leh Hnahthial mipuite hi an lawm tak tak nge tak tak lo tih chu lantirna tur remchang tak mai MP thlanna kan nei dawn hlauh mai a.

Khaw dang chu kan sawi thei lova, heng khaw pathum te hi eng ang rilru pu chiah nge an nih tih a hriat dawn a ni. Ka rin dan mai maiin heng khaw mipuite hian vote thlak an chak tawh ngawt ang. Lehlam pawl tan pawh heng khaw 3 ah hi chuan hun hekin campaign lo law law sela, khaw dangah hun tam zawk hmang se an duhsak pui awm hle a ni.

Saitual-ah mipa 5727 leh hmeichhia 5892, an vaiin 11,619 an awm. Khawzawl-ah mipa 5616 leh hmeichhia 5406, an vaiin 11,022 an awm. Hnathial-ah mipa 3573 leh hmeichhia 3614, an vaiin 7187 an awm mek (Source: 2011 census). Heng khaw 3 te vote thlak dan hian Mizote mizia a hril thei hle ang.

Lawmthu sawi nachang hria nge kan nih hre lem lo a hriat dawn. Lo en zui bik deuh teh reng u. Kei chuan District neih hlutzia ka hria a, Khawzawl hi kan chhungte tamna a ni a, ka lawmpui khawp mai. Heng khaw 3 ah hian tunge lawm thiam ber a hriat dawn a ni.

TV leh Chanchinthar puan kan lo hriat danin heng - Khawzawl, Saitual, Hnahthial te hian District thar an lo nei chho dawn ta chu an lawmthu an sawi ṭheuh a. Hnahthial lam phei chuan MP thlanah C. Lalrosanga a tlin theih nan theihtawp chhuah an tum thu an puang. An lawm hlawm tak tak a nih chuan MP thlanah a hriat ang.

Chumi tarlanna remchang an nei hi an vannei hle a ni. Party Party sawi lovin ruling candidate an vote huk duh mai awm mang e. An thu thu a ni.

Rualkhuma Hmar