I IN CHHUNG NING SUH

Lockdown a ni a, loh theih loh tih loh chu inkhung leh hmak mai ang u aw. Ṭul lem lovah chhuahna tur insiam lui hram suh la, phal loh a nih veleha pawn chhuak thei nih intihtheih nan hmang ve reng reng suh.

In chhunga tih tur awm ni danga i tih hman ngai lohte tih nan hmang la. Chawmpang kar zawng zawng phiat fai la. I thawmhnaw inbel khat deuh rimchhe mai tur te pho chhuak la. In khai ṭha lo te khai ṭhain thleh chi te fel takin thlep ṭha ang che.

I awngphah te phawk la, a lu lam kha a mawng lamah hmang ve thung la, a ngai renga hman chu a bek lam te awmin a inrual lo duh a nia. Khum hnuai leh a kil kar te phiat faiin nawt fai vek la, mut a tui duh bik. Hrangkhawl ho chuan zana nau mu thei lova an ṭah vak vak te hian inchhung bawlhhlawh an phiat fai ṭhin a, nau ṭap an bang a, an mu siai siai ṭhin.

I choka, ei siamna lam te pawhin phiah fai, rem ṭhat leh tih fai an mamawh ang. Chutiang bawkin i lehkhabu te rem fel vek la,chhiar ngai loh lehkhabu ṭha deuh i lo neih reng te pawh i hmu chhuak hlawl mai thei asin. A bo emaw i tih te pawh kha i hmu chhuak nawlh mai ang.

I in leh a vel, i pangparten i kut lumin a tawh an lo nghakhlel hle tawh tih hria la. Thlai leh ran te hian neitu an ngai a, duattu an mamawh em em a ni tih hre reng rawh.

I theihnghilh reng reng loh tur chu Pathian pawlna hun ṭha a ni tih hriat hi a ni. Lockdown hian Pathian thu chhiara amah pawlna hun ṭha a pe che tih hria la. I tan, i chhungkaw tan, mamawh­tute tan, kan ram leh kan hruaitute tan ṭawngṭai tam la. Damlo leh khawhar chhungte hre reng rawh.

Bible hi Lalpan a biakna che a ni tih hria la, i zeldinnaa i duhthusam leh ni se i tihte kha dah Pathian thu vak lo la, i thlarau lam nun hruaituah hmang suh. A thiltihtheihzia hriain ti thei emaw inti ve ngawt zel lo la, a thil tih theihna hma chhuanin ṭawng chapo ngai hek suh. Kan awm mai mai pawh hi ngaihdam ngai kan ni reng a ni tih hre reng zawk ang che. Engvang pawha chapo hi Lalpan a hua. Hriatna chapopui te, thu sawi thiam chapopui te, dikna chapopui te, retheih chapopui te, hmel­ṭhat chapopui te, hausak chapopui te, lalna leh nihna chapopui te hi a haw vek.

Chutichuan, i in chhung kha ning reng reng suh, mahni in ber nin hi thil pawi tak a ni. A nih ang angin i in chu duh la, ngaina la, ngaisang rawh. Lalpan a pek che, Amah nen in inpawl tamna ber tur hmun, a malsawmna a hlanna tur che a ni tih hre reng rawh. Biak in chauh hi Pathian pawlna tura i ngaih chuan in inpawl khat hle tihna a ni.

Office kal leh hna thawk ni si lo khawlai lama kan hmuh tam lutuk ho hi tuman kan ngaisang ngai lo. Nu, pa, nula tlangval hmel ṭha tak pawh ni la miin khawlaia an hmuh tam lutuk che chuan an ngaisang reng reng lo ang che.

I inah awm la, him rawh le.

Commissioner Lalkiamlova