MI FATE BAWK MAW

Mi fate, he ṭawngkam hi tun laia ṭawngkam lar tak a ni a, hlawhtlinna kawngah miin an tum ramte an thlen changin, a sir aṭanga lo thlirtu ṭhenkhat chuan hetiang ti tur chuan mi fate bawk nih a ngai an ti ṭhin an lo ti thuai zel a. Atu ate pawh hi mi fate kan ni deuh vek mai awm e; mahse, a tlirtu te thlir dan azirte pawh a ni ang chu.

Intluk tlanna hi a hlu a, tunlai khawvelah phei chuan mipa leh hmeichhe intluk tlanna tih hi kan lam zingin kan sawi uar pawl a ni a. Zepthu a cheng lo kawng ṭhenkhatah chuan mipa aia hmeichhia an chungnun zawk changte a awm a, eizawnna leh sumdawnnaah te, chhungkaw khawsak ngaihtuahnaah te pawh a niang hmeichhe lansarhna hmun hi a awm ve nual ta mai. Kan intluk ta tihna a ni ang em? Intlukna laite pawh a awm thei mai lo'ng maw? Kawng ṭhenkhatah chuan hmeichhiate hi mipa aiin an chungnung ta deuh em ni han tih maina tur hmun pawh kan ramah ngeiah pawh hian a awm tawh a. Engpawh chu ni se, intluktlanna tih aiin chawisan tih ṭawngkamte hi hmang i la, a fuh zawk ang em? Mizo hnam kalphungah hmeichhiain mipa an chawisan a ngai lem lo, mipa fing chuan hmeichhe chawisan nachang an hre thung. Mi ṭhenkhatin fiamthua rora leh balu thiar ila, hmeichhia leh mipa intlukna tih chu thil theih loh a ni an tih hi a dikna chen a awm, hmeichhia pawhin mipa tluk ṭalh an tum lem lo vang.

Engpawh chu ni se, hmeichhe ropui leh fakawm hi he kan ram zim teah pawh hian an va tam em, nimin lai lawka kan rama chanchin ṭha lo thlengte kha, sawi zui tlak a ni a, fak tlak a ni bawk a, duhsakna chibai buk tlak a va ni chiang em! Chi leh kuangah Mizo an ni a, chu chu an inlaichinna hnai ber leh awmchhun a ni hial awm e, sakhmel pawh la inhretawn lo, an pian aṭanga an intawn vawikhatnaah CT Ramnunmawii Champhai, Ruantlang nula chuan Samari miṭhate hnathawh chhunzawmin a la hriat ngai loh ṭanpui ngai, Pi Lalsiami Covid-19 a positive avanga a bika enkawl ngai chu duat leh hmangaih takin a enkawl a, he a thiltih avang hian an thawm chu bengngawngte hriat khawpin a ring a ni. CT-i kan hria a, zirna avanga phaia awm, an exam hun a chian theih loh avanga a ngaih leh a thlakhlel em em a chhungte hnena lo haw, vanduaithlak taka covid 19 hri kai a ni a, a chanchin tam zawk chu kan hre tawh awm e.

Hetiang chanchin ropui leh ngaihsanawm nei tur hian chhungkua aṭanga inzirtirna leh fuihna ṭha dawng ṭhin a ni tih a chiang em em a, nula hnahkhat ngawt aia nula chhuanawm bik a nihna hi a ropui hle mai. Pi Lalsiami a chhungte home quarantine an nih avanga an pi duh anga an ngaihsak tawk theih loh lai a, a chhungte aiawh tura Pathianin a ruat a ni tih CT-i'n a pawm thlapte hi a ropui hle mai. Dam taka damdawi in chhuahsan a, a chhungte hnenah hlim taka awm a chak dawn tehlul nen, ani CT-i'n a sawi dan takin, "Khatia, ṭanpui ngai pitar kum upa tawh tak a awm tih a hriat khan a nu leh a unaute a bia a, anni chuan hnial buai lovin Covid-19 i lo positive pawh hi Pathian ruat a ni zawk mai thei asin," tia midangte tanpui duhna rilru an lo pu leh zelte hi chhungkaw entawntlak tak a ni tih a chiang hle mai. CT-i hian Bible te chhiarsakin hmangaih leh duat takin Pi Lalsiami hi a enkawl a, BSUP Durtlang aṭanga ZMC lama an insawn phei dawn a, Pi Siami'n CT-i a tel ve dawn tih a hriata a thlaphanna zawng zawng lak kian ang maia a hlimziate hi thawnthu ngaihnawm a ni satliah lo, a tak taka thil thleng a ni si a. Pi Siami chhungte nen pawh inbe tawn rengin hlawkna awm lo, nun hial thapa midangte tana nun hlantu hi Miss Mizo title kei chuan ka pe e.

Tlawmngaihna chhawm nungtu, ṭanpui ngaite ṭanpuitu, hmelhriat a ni em tih pawh thlir lova, mite tana mi inpe kan ramah ṭhalai an la awm hi a ropui a, chutah pawh hmeichhia awmnem zawk leh dawm ngai zawkin hetianga mite tana a inpekna hi Pathian pawhin mal a sawm ngei ang. Mi fate tih atana kan ruat hi kan chungah pawh a lo thleng thut thei, chutiang hunah chuan mi fa i ni tih hria la, i ti thei a ni tih hria in hmalam pan ṭhin ang che.

Ramchhana Hmar, Phuaibuang