AIZAWL KHAWPUI LEH NEW DELHI TUI HARSATNA

Mizoramah a bik takin Aizawl khawpuiah ṭhal laiin, tui harsat avanga sorkar ding lai apiang demna thawm a ring hle ṭhin, chhan hrang hrang zinga pakhat chu. Kan ram hruaitu hmasate leh kan mithiamten Aizawl khawpui hi mi nuai tling lo chenna tura an lo ruahmannaah kum tin pung zelin tunah tak hian nuai li chuang kan awm vang leh kan la pun belh zel vang a ni.

India ram khawpui tam takah pawh tui harsatna hi an nei ve a. India khawpui ber Delhi phei chu, Chief Minister Kejriwal-a party-in ro a rêl hma zawng khan tui an harsa ve em em a. Aizawl khawpui nuho tui inchuha insual buai hmuh tur an awm loh laiin, Delhi nuho tui inchuha insual buai hmuh tur an awm fo a ni. Amaherawhchu Pu Arvind Kejriwal, CM a rawn nih aṭang khan, kawng engkim­ah khawvêl barakhaih khawpin Delhi khaw­puiin hmuh theihin hma a sawn a, tui in tur pawh hnianghnar takin chhungkaw tin a pe thei a, electric hnianghnar leh man tlâwm a pe ang khan; tui thianghlim leh man tlâwm chhungkaw tin a pe bawk.

Kejriwal-a a Lal hma chuan Delhi mipuite pawhin tui an hmu ṭha lo hle. Kum 2014 thleng khan chhungkaw za zêla sawmnga bakin connection an nei lo. Pu Kejriwal-a a CM hnu erawh chuan, chak taka hna thawkin kum nga chhungin chhungkaw Za-a sawmkua leh pasarih (97%) hnênah connection a pe thei a.

Electric bill an tih hniam ang khân, tui chungchangah pawh thla khatah tui litre sing hnih leh a aia tlem hmang chinte chu a thlawnin a pe a, bill an chawi lo, litre sing hnih chu renchem taka hman chuan chhung­kaw pangngai tak tan pawh a in daih thei a, bill an chawi loh nan mi zirtir ngai lovin chhung­kaw tinin tui an ren phah êm êm a ni.

Pu Kejriwal-a ho kum nga an sorkar hnuah, kum 2020 Feb thlaah khan inthlanpui an nei leh a. India ram pumpuia hneh taka sorkarna chelhtu BJP chuan hneh ngei tumin theihtawp an chhuah chung pawhin AAP party chuan seat 70-ah 62 lain BJP chuan, seat riat chauh an la thei ṭawk a ni.

2020 kumtir aṭangin India ram pumah Covid-19-in min ti buai a, heti chung pawh hian Pu Kejriwal sorkar chuan tui litre sing hnih chin leh electric unit zahnih chin a thlawna sem chu a chhunzawm reng thei tho a ni. Hei bakah Delhi Taxi pu leh Rickshow pute hnenah lockdown lai khân thla khatah Rs. 5000/- a sem char char bawk a, India ram state leh U.T zawng zawng zingah Auto leh Taxi Pu ngaihtuahtu sorkar awmchhun a ni bawk.

Heti taka mipuite tana insêngso Pu Kejriwal-a sorkar hi India ram state leh U.T zawng zawng zingah leiba nei lo leh budget surplus kalpui thei awmchhun a la ni cheu bawk zu nia.

Comptroller leh Editor General (CAG)-in India rama sum hman dan zawng zawng a chhui chianna leh report a siam ṭhinah sum hmanna felhlel tam tak a hmuchhuak ṭhin a, Central sorkar ngei pawh leiba neia a kal laiin Kejriwal-a sorkar chu leiba nei lo, fiscal surplus a kal thei sorkar awmchhun a ni.

Tunhmaa BJP leh Congress Delhi an sorkar chhung zawng khan leiba leh fiscal deficit pawh kum têlin a pung vak vak ve tho kha a ni a. Kejriwal-a CM a nih hnu a, a thil tih lang chiang êm êm chu tu sorkarah pawh sum a tlem lova, dik tak leh rinawm taka hman a nih chuan mipui tana chhenfâkawm leh ram hmasawnna nasa tak thawh theih a ni.

Kejriwal-a'n hetiang taka mipui tâna a in senso hnu hian Tax eng mah a ti pung lova GST phei chu a hma aiin a ti hniam zawk a, chuti chunga CAG report-in India rama surplus budget nei thei sorkar awmchhun a ni tih a la puang zawk a ni, entawn tlak a va ni tehlul êm.

M.C. Lalrinthanga