Monica Lewinsky leh Synod

Tun hnaiah chan­chinbu lamah Monica Lewinsky chanchin chhiar tur a rawn awm thar leh a, a ziak tu lamin thu khuh taka an ziak chungin an ziah chhan niawm tak chu a rawn tin zawn tel bawk a, chuti a nih si chuan he American nula President Bill Clinton nena hmeichhiat mipat kawnga mawi lo taka khawsa hi an kohhranin an thunun ve ang em? tih hi Whatsapp group pakhatah fiam­thu titakin kan khel a, chumi aṭanga ngaihdan kal zel chu rawn thai lan ve ka tum dawn a ni.

"Monica Lewinsky kha an hunlaia an Synod ve khan an an thunun ang em le?" tih zawhna hi ṭhian pakhatin a rawn zawt a, fiamthuin kan khel zui ta sap sap a, America lam chu an thiangzau deuva an thunun an rin loh thu te, Bill Clinton zawk kha thunun tur tihte an rawn sawi a. Chumi zawhna kal zela kan ṭhianpa pakhat chhanna hian ngaihtuah a ti thui ve khawp mai a, "E... America lam Synod chauh dem tur a ni hleinem, Mizoramah pawh anmahni lang ngei ngeia sex video leak out a hmeichhia leh mipa te pawh an thunun chuang lova, Kohhran a in report lo chu a video kan hmuh pawhin an thunun ngam lova, chu lo pawh thunun loh in hriat vek kha," tiin a sawi a, khel zui a hlawh lova mahse emoji smiley chi hrang hrang chu a hlawh hnem khawp mai a ni.

1995-1996 vel khan USA mipui chu an lo duhtui khawp mai hi a lo nia, President Bill Clinton kha Lewinsky nen an lo inkawp ṭhin tih kha a tlangthang ta a, chu chu an hriatin USA rorel khawl House of Representatives chuan President meuh chu an impeach ta a (impeach tih hi a tluk pui Mizo ṭawnga dah dan ka thiam lo) , Clinton hi US President an impeach pahnihna niin kum1868 ah daih tawh khan Andrew Johnson chu an lo impeach tawh tih Google aṭanga enin a inziak a ni.

USA hi mi thiang­zau, sex lamah chuan inthlah dah nasa tawh, Kristian na pawh dal tawh, kohhran hlutna pawh tla hniam tawh, mipui nawlpuiin thianghlimna (virginity) an ngaih pawimawh tawh loh na ram ang hawi zawng hian sawi a ni ṭhin a, mahse kan hmuh chian chu USA ah khuan an Synod ve (Kohhran hruaitu sawina atan hetah hian ka hmang a ni) lamin thununna an lek lo a nih pawhin an rorelna in chuan thununna lekin Clinton kha an impeach a ni.

Monica Lewinsky scandal kha kan en hian Mizoram hian zir tur kan nei a, kohhran an ngawih pawhin an rorelna in sang kha chu an ngawi mai mai lo tih history en in a hriat theih a ni.

John Lalthansanga Hmar