MIPUIIN ELECTRIC BILL KAN BA SI LO
Chhungtinin Bill kan pe a, kha chen Inkhawm lo Kohhran thlengin Electric Bill kan chawi âwl lova, heti zat zat Electric chhit man Sorkar in a lo ba reng mai hi a va mak em.
Power man ba leh vauna -
Power lama min chawmtu NHPC chuan Mizoram P&E Department a hotu, Engineer-in-Chief lehkha thawnin Mizoram leiba chu Vbc. 1.42 a nih thu leh leiba ṭhin aṭanga ni 45 a liam tawh avangin a pung nen a vaiin Vbc. 2.49 chu April thla chhunga pek an nih loh chuan Power an rawn pek chhunzawm theih dawn loh thu in an rawn vaukhan ti tih a.
Hetiang deuh bawk hian NEEPCO chuan Mizoram leiba Vbc. 42.49 chu April thla chhunga pek an nih loh chuan hmalak an tum thu an rawn hrilh ut mai bawk a. He Company (Govt of India) pahnih hian hma la tak tak se thim ṭhup thei dinhmunah kan ding mek a ni.
Mawl taka ngaihtuahin -
Heng leiba tlingkhawm Vaibelchhe tel teh meuh hi engtik aṭanga in ṭan nge tih leh tun Ministry kut thlakna hnuai liau liaua tlingkhawm a ni em tih hre kilh kelh lo mah ila chhutna mawlmang berah chuan mipui lam chuan kan tihtur tiin Bill kan pe thlap thlap hlawm a, Lockdown vang, hri leng vanga ngaihnatthiamna, Sorkar tawrhna tur thil Bill chungchangah a awm hriat a ni lova, 1st April 2021 aṭangin 20% laiin tihpun a ni hial zawk a ni.
Hetiang a nih lai hian mipui ten Electric lama kan chhit man chhiah kan chawi thlap thlap hi kan batna lam a thleng zo lova, pawh pen a ni ṭhin em ni? Tih hi zawhna awm thei a ni. Mipuiin kan Duty kan hlen laia kan aiawha petu tur Sorkar hian heti zat bâ a lo nei hi a mak a, mipui Bill pek reng si Company lam hian an dawn loh vanga kan thim a nih chuan mawhpuh tur chu kan Sorkar hi a ni ngei ang.
Power chungchang -
Kumin April thla tir aṭanga Electric Bill 20.68% laia tih pun a nih chungchangah pawh hian mak tak awmin a lang.
Bill tih pun hrethiam em em tute ṭan chhan ah chuan Electric Bill reng reng hi State Sorkar ruahman a ni lova, a duh thu a a tihpun theih pawh a ni lo, Manipur State nena kan thawh dunna Joint Electricity Regulation Commission (JERC) thuneihna a ni zawk tih hi a ni.
Mahse heti chung hian Bill punna chu 42% lai ni turin Mizoram Sorkar chuan JERC ah a lo thlen zawk a, ṭhenkhat dodalna avangin 20% ah a tlahniam ta hlauh zawk a ni. State dangah mipuite phurrit chhawka tihniam turin State Sorkar in hma a lakna chanchin kan hriat fo laiin keini ah chuan mipui phurrit belhchhaha 42% lawiha eng chhit man tih san pawh kan hreh lo chu a ni phawt a, kan leiba lo neih tam tawh lutuk, vaukhanna hial kan tawh mek sutkianna tur ngaihtuah lawk râna rawtna pawh a ni thei.
Delhi-ah -
2014 a AAP in Delhi ah Sorkarna an siam khan an lo intiam tawh, mipui phurrit chhawk zangkhai nan Electric Bill tih hniam chu an Sorkar aṭanga ni 3 lekah 1st January 2014 aṭanga hman nghal turin thu an chhuah a, Unit 200 hnuai lam eng chhi te chu 25% a tihniamin Rs.170 vel a tam berah Bill a ni ta a, Unit 200 - 400 chin te chu 43% laiin an ti hniam kawk bawk.
Chhuanlam duh dawn se Delhi Sorkar Control phak vak bik loh Delhi Electricity Regulation Commission an awm ve tlat a, mahse chhuanlamah an hmang lova, a tih dan tê an hre bik a ni mahna le.
Tlipna -
Hri leng vangin Sorkar a pachhia tih kan hre ṭheuh a, chutih laiin inren lohna mualah chuan loh theih loh thilah a inren thiam em em lo hmuh hian heti zat power man ba hian mipui min barakhaih a, kan bill pek rengah vauna hial kan tawk a, Sorkar in mawhah a la a, kan thim a nih ngat chuan mipui thikthu a chhe viau ngei ang.