DAN NGAI PAWIMAWH TUTE THILTIH

Harhna chi hrang hrang kan ṭawngin kan hmachhawn mek zel a, chung harhnate chuan a ṭha zawng leh a chhe zawngtein min chenchilh thar ta ṭhin a nih hi. Kum tam tak kal liam tawha ‘Isua hi lo ring ve tawh rawh u’ tih ṭawngkam ringawta harhna lo thleng an sawite kha chuan hnuhma ṭha tak a nei ni awm tak a nih laiin tunlaia kan harhna dawn erawh chuan sawi sep a kai ta thung ni awm tak a ni hei. Assembly House chhung aṭang ngeiin harhna danglam tak kan chang a, ni danga la tih ngai reng reng lohin sakhaw puithiam kaihhruaina meuhin ṭawngṭai rualna neih a ni a, mipui lam chuan beiseina sang tak kan lo nei a nih kha. Nimahsela chu ṭwngṭai rualna rah chu a ni e tih erawh a tihtheih hauh lo nain a rah chhuah kan hmuh ropui ber chu dan ngaihpawimawh vanga ṭawngṭai rualna hmun thlenga an ṭhutpui lai reng, an member-pui pakhat chunga hekna thleng ta chu a ni. Treasury bench lam aṭanga hekna thehluh a nih tlat avangin mi pakhat chauh pawhin hekna kha thehlut ta se la, a hlawhtlin loh a rinawm loh tehlul nen Zirtir zat lawihin hekna an han thlen ta kha a ni a, a hlawhtling chiang teh e.

Heti a nih chuan dan ngaih pawimawhna lamah kan harhna hian a bul ṭanna a sang ang bawkin a hnu leh zelah pawh ngaih pawimawh a hlawh dawn viau mai tura kan lo rin khauh khauh laiin dan ngaipawimawhtute zinga pakhat chuan FIR pahnih thehluh ngai khawpin khawtlang humhalh lai sangha bomb-tute zingah a tel ve nia sawi a ni a, Zirtir 12 zinga Juda Iskariota ang deuhin mi famkim vek chu an ni bik hauh lo mai kan ti a nih kha. Famkim loh ṭheuh ṭheuhah pawh hian tum nei sa rana midang chunga dan ngaihpawimawhna chu a lian viau ni bawkin a hriat a, thuthlûkna kengtu tan pawha lu hai map mapna tham ni ngeiin a hriat bawk a ni. Mipui lam aṭang lahin ṭan a hnehin sawiseltu an tam ang reng phian mai ta si a, Speaker hnena insawifiahna thehluh niah ngei pawh Press Conference neih a ngaih mai bakah By Election neihna hmun thleng thleng pawh chuan kan dan ngaipawimawhtute lam chuan an la sawifiah ta zel a nih kha. Mipui lamin an hriat loh a hlauhawm bawk em atin ni.

Hetianga harhna kan dawng ta hi thil lawmawm tak nia a lan laiin mi pakhat chungah chauh dan an ngaih pawimawhna hi lantir loin mi dang, amah ang bawka colour tak leh danglamna awm hauh lo tur mi 6-te chungah pawh hian dan an ngaih pawimawhna hi lantir ta ni bawk se la he harhna hi a famkim awm mang e a tih theih laiin, anni erawh chuan ṭul an lo ti kher lo pawh a ni thei bawk a. Chutih mek laiin mi dang 6-te ngei pawh chuan ban huam takin zawlbuka e táng ṭheuh ṭheuh an lo ti bik ta chiah bawk si lo nen chuan kan lo heti zo ta a nih hi. Hetiang neuh neuh ngaihtuah chuan Rev. C. Lalhmingthanga ṭawngkam takin ‘a mak lutuk a, a mak leh lo’ a tih hi ka hriatchhuah phah a, a mak dawn viau a, a mak leh lo tih mai ve tur ni awm tak a ni. Dan ngaipawimawhtute reng reng pawh chuan mi pakhat chungah chiah an dan ngaih pawimawhna chu an tilang reng reng bawk hi a chhan tak zuk hre lem lo mah ila ngaihbel deuh reuh chuan a hriat theih tho ni tea sawi an awm bawk a.

Party ang chauh pawh ni loa a hnam anga chawimawi tlak khawp hian kan dan ngaipawimawhtute hian thilṭha an ti zel dawn nia beiseina lian tak kan neih mek laiin nimin lawkah Lunglei ram kang ṭhelh tura Indian Air Force (IAF) Helicopter rawn kal chu Kawmzawl Helipad-a a rawn thleng hlim hlawl laiin an member ṭhenkhatte chuan hmanhmawh takin thla an lo lakpui a, thlalakpui hi a pawimawh viau ni tur a ni. IAF Helicopter hi an la hmu ngai lo em ni ti dawn ila a rinawm chiah si loh a, heti taka thlalakpui tuma hmanhmawh ta chiam nge an nih ang tih hi hriat chakawm tak a ni. Tleirawl hawklak deuhte chuan thla lo lakpui ta mai mai pawh ni se la an ninhlei mang e tih mai mai tur a nih laiin, anni dan ngaih pawimawh vanga an member-pui hék duhtute meuhin thlalakpui tuma hmanhmawh taka an han ding tlar ta hi chu an nihna nen a inhmeh hlawl loh mai bakah, mipui chunga leng tan phei chuan zahthlak tak a ni thei ang. Nuih liam mai mai ka tum laiin anni, mi sawm leh pahnih bikte ngat hi chu mi zawng zawng chunga leng tur leh mi zawng zawng entawn tur khawpa dan ngaipawimawhtute an nih tlat si avangin an che vel hian mit a la bik lo thei lo si a.

Kang mei chauh kan tuar lo a, tui harsatnain Zoram hmun hrang hrang min tuam mek bawkin kan ran vulh ber vawk lam lah hrileng vangin an thi mek bawk a, hmun ṭhenkhatah lah chinghniain kan ran vulh a lo seh hlum bawkin chhiatna chi hrang hrangin min tuam mek a ni a. Kan hripui leng CoviD lah chuan rem lam pan bik hauh loin zual lam a pan zawk emaw ni tih turin ni khata hri kai thar kan hmuhchhuahte lah chu a tam viau zel mai bawk a, hetiang karahte hian ram hruaitu kan neihte zinga dan ngaipawimawhtute ngat hi chuan langsar taka Zoram mipui min thlamuan theih ngei pawh beisei ila a àwm hliah hliah a ni. Anmahni lamin langsar lo takin thil tiah inngai mah se la, mipui lamin kan dah langsar tawh tho tho si a, social media lama an thil tih apiang vawrhdarh chak tak tak hi kutcháng thleh nghauh nghauh tham an awm hialin a rinawm a. Ram hruaitu, mipui thlanchhuah kan neih tawh zawng zawngte ai pawhin anni bik ngat hi chu ṭhangtharte ngat hi chuan kan dah langsar lo thei si loh avang hian tuna kang ṭhelh tura Helicopter rawn thleng hlimhlawl thla an lo lakpui pawh hi sawi ta hluai mai chauh kan ni e.

Mahmuaka Chhakchhuak