RINNA LEH HRIPUI

Tunlai hian hri leng hlauh awm dan leh kan rin Isua phatsan tura sawrkar emaw, lal emaw, ringtute tiduhdah hrim hrimtute'n emaw min beihna hi thliar hran thiam a pawimawh hle. Rinna phatsan tura min beitute hmaah kan thih loh nan phi ruaiin hlau thlabarin awm ta ila a zahthlak ang. Krista kan rinna phatsat lovin kan martar ngam tur a ni. Hri leng avanga thih hi martarna a ni lova, hri leng hlauh hi rinna phatsanna a ni hek lo. Kan inveng chung chunga kan lo kai ta a nih erawh chuan Krista neitute'n khawvel sual avanga natna leh harsatna an tuar dan tur ang takin kan tuarin, kan chungah eng pawh thleng se, ringtu kan nihna kan tilang zawk ang.

Daniala khan Sakeibaknei puk kha a hlauh loh vanga luhchilh a ni lo va, a duh avanga paih luh a ni hek lo va, a rinna phatsan tura an tih a phatsan duh loh vanga paih luh a ni. A rin Pathian avang chuan a hlau lo. Abednego, Mesaka leh Sadraka te ṭhian pathum kha anmahni thu leh an hlauh loh vang hrim hrima meipuia zuang lut an ni lo, an rinna phattir tumtuten an paih lut zawk a ni. Rinnaa kan hmelmate hmaa kan awm dan tur leh khawvel hri leng leh indona rapthlak takte kan hmachhawn dan tur hi ringtute hian kan hriat fel em em a ngai.

Krista Rinna avanga kan tuarna chuan mi dang a kaihhnawih lo vang. Mahnia rinna awm sa avangin kan tuar ṭheuh zawk ang. Hri leng hmaa rinna hmachhuana kan hlauhlohzia tilanga kan tawn erawh chuan ṭhenawm khawvengte leh vantlang a nghawnga keimahni avangin kan chhungte leh mi dangin an tuar thei. Hri leng laka invenna sanitizer leh mask kan hman te, Medical team te leh sawrkarin kaihhruaina an siam kan zawm te hi natna dang kan vei a kan inentira, kan inenkawl nen hian Krista rinna thuah a danglam chuang lo. Inven theih loh natna kan kai mah pawi tih nak a laia inven theih reng inven loh vanga kai hi âthuai kan tih ang chi, Bible-in 'mi hmang hria chuan thil ṭha lo chu a hmuhin a biru ṭhin a; mi mawl erawh chuan a tawn mai ṭhin a, a tuar phah ṭhin' (Thufingte 22:3) a tih ang chauh hi a ni.

Chuvangin he hri leng lakah hian theih tawkin inveng ila, Pathian Engkimtithei ringtu kan nihna erawh keimahni chhung lam inhriatnaah hian hre reng ila. Hlau thlabar leh phi ruaia awm lovin, chhungrila Krista thlamuanna nei chungin kan tunlai boruak hi i hmachhawn ang u.

I puan in chu hri reng rengin a rawn hnaih ve lo vang (Sam 91:10) tih hmachhuan a, 'Pathian mite tan a hlauhawm loh' tia inzirtirna te hi kan hman hun a nih leh nih loh hriat a ṭha. Bible-in a sawi hri hi chu mi zawng zawng chunga leng (pandemic) a ni lo va, Pathian thunun tlat hri, tute emaw hremna atana a tih, a mi, amah ringtu mi felte khawih ve lo tur hri a ni. Kan tunlai hri leng erawh chu rukru leh eiru hremna hri a ni lo va, ringtu thil sual ti si te hremna a ni lo va, Isua ring lo milem biate hremna a ni hek lo, mi zawng zawng chunga angkhata leng a ni. Kan rinna avanga kan ram leh kan khua him bik tur anga zirtirna pawh hi kan rawngbawltu ropui tak tak ram thim,

ringlo mite luh chilha Chanchin ṭha hriltu, hripui veia thi ta, tunlai a mi leh hmanlai hun kal tawh a mite pawh thiamloh chantirna, rawngbawltu ni si Pathian ring lo leh sual tiru anga sawina a ni. Joba ṭhiante'n â taka Joba chungchang an sawi ang kha a ni e.

Chuvangin fing takin kan hripui leng mek hi, thinlunga Krista neitu kan nih avanga thlamuang tak siin in venna tura mi thiam ten min rawn te hi i zui hram hram ang u.

Commissioner Lalkiamlova