HAND OF GOD

Covid hripui thawhhnihna chuan dimlo baksakin khawvel a nuai a, mi tam tak thihna thlàn thim lamah a nawr liam a, a runthlák lai ber chu chung dam duh êm êm, mahse hripuiin an taksa a suamsam avanga a ni têla thihna kut vâwtin a man mêkte chuan khawhar takin an natna khumah an chunga thil lo thleng tur an nghâk a. Dam duhin thapui nen an bei a, hmangaihtu leh lainattu, thamuantu leh fuih chaktu an mamawh lâi tak a ni a, mahse an natna avangin an chhûngte lak aṭanga khung hran an ni si! An khawhar dan tur hi kan ngaihtuah ngai em!

Chutah an nunna zâi chat mai tur chu ngawi renga an thlir lai chuan an hmangaihte kut lum vawn an va châk ve dâwn tehlul em! An hmangaihte kut lum vuan talin khawvel chhuahsan ni sela an rilru pawh a dam deuh tur! Chutih laiin in lama chanchin lo ngaichângtute lah an awm hle hle thei bik lo! An hmangaih, ICU-a thih suala let mêk chu va kuah a, thlamuanna thu fah an va châk dawn em! Chutianga an hmangaihte hmuh phâk loha chatuan ram pan ta te enkawltu doctor leh nurse te thinlung chu a va ṭap ru ve nasa dawn ṭhin em!

Brazil rama São Paulo district-a São Carlos khuaa Covid damlo enkawlna Vila Prado Emergency Care Unit (UPA)ah chuan Covid avanga damlo pakhat chu châu takin a mu a, biak theih a ni tawh lo va, oxygen mask an vuah avangin a mut ngaiin a mu reng a, chesawn turin chakna a nei tawh lo. A thâwk zâwng chuan a ri hrâwk hrâwk a, boruak chu duhthawh takin a hip hrâwk hrâwk a, dam a va tum tehlul em!

Amah enkawltu nurse technician Semei Araújo Cunha-i chuan a thiam ang leh theih ang tâwka duatin a enkawl a. Chu damlo châu tak, a natna avanga a chhûngte awmpui theih lohva mahni chauha mu bâm mai chu a thlir a. A chhûngte kut lum thar thar vawn ve a va châk dawn em! Chutah chu nurse chuan thil pakhat a ngaihtuah chhuak ta.

Doctor ten damlo an zaia an bun thin kutkâwr (surgical glove) pahnih chhûngah chuan tuilum a thun khat a, chu chu mihring kut ang turin a suih zawm a, chu a enkawl damlo kut chu a vawn tir a, damlo kut zungṭang inkârah zêl chuan a surgical glove hmawr chu suihin kut pahnih rem taka kan han invuan ang chiah hian a siamsak a. Chu damlo tân chuan chu kut (surgical glove) lum thar thar chu a hmangaihte kut lum nen a danglam chuang lo ang a tih tur khawpin a hmangaihte kut vawn chak êm êm tân chuan a va hlu dawn em! Chu kut siamchawp chu a tirah 'Little hand' tiin a hming lem an vuah a.

Chu thil chu a thawhpui nurse dangte chuan ṭha an ti ta riau mai a, an damlo enkawlte tân chuan an siam­sak ve ta sup sup mai a. Damlo châu tak, kut vawt vek tawh, hmangaihtu kut vawn thlahlel ngawih ngawihte tân chu 'Little hand' chu a hlu ta riau mai! He kut lem siamtu nurse Semei Araújo Cunha-i chuan a siam chhan sawiin an enkawl damlote tâna an tih theih sâng ber, an lainatna leh hmangaihna entirna leh duhsakna lantirna a nih thu a sawiin social media-ah a post a.

He a kut lem siam leh damlo kut a vawntir lai thlalak hi journalist pakhat­in lo hmuin social media lamah a post darh sak bawk a, kâr lovah khawvel a fan chhuak nghal a, chutia social media-a a darh tàk hnu chuan a hming lemah 'Hand of God' tiin an vuah a. Damlo châu tak, thihna nena inchibai mai tawh tur chu chu 'Hand of God' chuan a thinlungah thlamuanna leh hahchawlhna a siamsak a, chu 'Pathian kut' (Hand of God) vuan chung chuan thlamuang leh hahdam takin damlo tam tak an awm theih phah ta a ni.

He kut lem hi Nurse Lidiane Melo-i, North Zone of Rio de Janeiro Hospital-a thawkin nikum khan a hmuchhuak tawh a, a damlo enkawl kut vawt vek tawh tihlum leh nana a ngaihtuah chhuah a ni. Chu idea chu Nurse Cunha-i hian a Covid damlo enkawl laka hmangaihna leh duhsakna, lainatna leh enkawlna entir nan a lo hmang ve ta thung a ni.

He khawvelah hian min hmangaihtute kut hi a hlu bik asin tiraw! Harsatna, mang­anna, thlaphânna, hlauhna, thawpikna in min chim buai lai te, hlau thlabara kan awm laitea min hmangaihtute kut lum ther therin min vawn tluka hlu leh thlamuanthlak hi he khawvelah a tam lo.

Covid avanga khung hran, hmangaihte hmu phâ lova mahni chauha khawhar taka awmte tân he 'Pathian kut' hi a va hlu dawn em! Covid hripui avanga kan mihringpui tanpui ngaia awm te, thlamuan ngaia awm mêk te, chhanchhuah ngaia manganga awm mêk te tân hian 'Pathian kutah' kan ṭang ve thei asin. I kut lo chu Lalpan kut dang a nei lo.  

PC Nghaklianmawia