Kan hotute publicity atchilh dan hi
Kan thupuiah hian han lut nghal deuh chawm mai ila, Mizorama kan sorkar hruaitute publicity lawm uchuak lutuk em em dan han en hian, Mizo pi pute kha lo tho leh ta se an thlahte kan nih pawh hi an ring tawh lo hialin a ni ka ring ni.
Mizo pa chuan thil ṭha a tih pawhin midang tih anga lan tir a tum hram hram zawk ṭhin a nih laiin Mizorama kan sorkar hruaitute chuan hruaitu an ni chung chungin an ram hruai chhunga thil tih chu an tih a nihzia lan tir loh hi a hlauhin an hlau ta a ni.
Tun hmaa an sawi ka hriat reng chu, "Politics ah chuan lar a pawimawh ber," tih hi a ni. Chumi ti dik tur chuan Mizoramah pawh kan politician lamin ṭan an la ta ngar ngar a, lar chak uchuak bik leh mahni thil tih apiang mai a darh zau thei ang bera puan zar nuam ti, publicity lama tuihal huam huam ang mai kan Minister zingah te kan han nei ta zel hi a zahthlak takzet a ni.
Tunlai thiamna social media hmang ṭangkaiin mahni chet velna post darhtu tur mihring kid bik neiin kan Minister ṭhenkhat hi chu an tal vel ta hial a ni, tunlai khawvelah hian.
Facebook pakhata an thil post ka rilru la em emtu chu kan ram hruaitu ṭhenkhat hi an thil ṭha tih lai hi camera hian an la fuh chat chat zel a, zan lama an thil tih te thleng maiin news lama chhuak turin an ti fuh chat chat thei zel nia. Minister ve tho, thil ṭha ti ve tho mahni intihlar tum lo leh mahni news lama in lan tir ve thiam lo chu an hawi hil reng tawh mai a nih hi tunlai Zoram khawvelah hian.
Hei hian lar chak huam huamna khawvela kan Mizo ṭhalaite an awm hi chu an dem thei bik lovang.
Miin thawmhnaw sexy tak tak hmanga midang hmuh tura Facebook leh ṭhalai atchilh tak Instagram lama an inpho chhuah hian an duh ber chu midangte hip a ni a, chu chu kan politician ten publicity an atchilh huam huam ang tho hi a ni.
India ram hmun dangah pawh kang ṭhelh turin Indian Airforce Helicopter hi an lo hmang tawh ṭhin an ti. Pakistan Airforce an nih loh avang hian India state te chuan kan mangan hun huna kan auh kal theih tur an ni a, chumi chu ram kang ṭhelh turin Mizoramah kan au a. Chief Minister ngenna avanga lo kal an nihzia tih lan tuma party thuchhuah hial han hmuh kha chuan kan publicity atchilh dan hi chu review meeting neih hial tlak a ni tawh a ni.
Lalramchuana