DAK CHHUAK LA HARH TAWH TEH!!!

Article "Mizoram- leh Assam Ramri- Politics thlirna aṭangin" tih ziakin Social Media ka Wall aṭangin ka Post a. Mizoram Chanchinbu darh zau ber Vanglaini in Map nen 25th & 26th (Monday Issue,) ah an rawn chhuah a. A kalhmang chu Assam BJP sawrkar lai hian nakkum April Assembly Election lo awm turah illegal Migrants Hindu & Muslim Vote bank neih tumin Ram / In hmun nuaih khat pek hman a tum a. Mizoram chhungah pawh rawn pek tumin khaw hmun li (4)-ah min rawn nek/run ta a ni. Mizoram leh hnam tan a pawi dawn em vangin, sawifiah nawn ṭul ka ti a. Ka ziah tawh 'Politic Thlirna' bawk chhunzawmin i'n bihchiang lehzual teh ang.

Kum 2014 MP General Election, BJP PM Candidate Narendra Modi kha Gwauhati, Itanagar, Silchar leh Agartala rawn kalin, ni 22 February khan Silchar Rally ah hetiang hian thu a sawia "Hindu Migrants from Bangladesh will be accomodate" tiin a tiam a,"Muslim migrants Party bil Vote bank neisa chu thawn kir an ni ang," a ti thung a. Hindu lo pem Vote nei tawhte a thlem a, Muslim lo pem Congress leh AIUDF Muslim Vote ṭhinte chu inngaihtuah turin a vau titih nghal a. Helai bawr area dinhmun hrechiangin BJP tan Vote zawn dan a thiam hle (A hunlai Silchar leh Guwahati chanchinbu leh Google a en theih).

Kum 1985, PM Rajiv Gandhi leh AASU Accord angin, Assam chhunga Foreigners te dap chhuaka thawn kir, kum 1971 Census hmanga Citizen endik tur a ni. Hei hi kalpui theih lawk a ni lo a, Assamese-hote'n Supreme Court an luhpui a, SC-in kalpui turin Assam sawrkar Order khauh tak a pe a, tuna Assam BJP sawrkar hian NRC chu a kalpui ta a, Assam khua leh tui ni lo nuai 19 chuang hmuhchhuah a ni. Bangladesh leh Nepal aṭanga lo pem Vote leh Ration Card pawh nei tawhte an ni ber a, Cachar, Hailakandi leh Karimganj District te hi chu'ng Bangladesh Migrants lo pemte tamna an ni.

CAB - CAA Assam Illegal Migrants tan em ni? CAB kha Lok Sabha chuan a pass ta mai a, Rajya Sabha lam Opposition tam zawknaah khan an pu lut ngam ta lo a, Parliament term Session tawp 13th February 2019 khan a Lapse ta phawt a. Hemi hnu lawkah BJP President, Amit Shah chu Guwahati lo chho nghalin, 18th February 2019 khan Lakhimpur-ah MP Election Campaign Rally neiin, "CAB hi BJP National Agenda a ni, BJP kan sawrkar leh anga kan kaltlangpui ang - If CAB isn't implemented, it will adversely impact the people of Assam. The Bill was necessary to prevent Assam from becoming a Muslim majority State like Kashmir," tiin a sawi a. NEDA hotupa Himanta Biswa Sarma pawhin thusawiin, "CAB lapse hi Assam min palzutna, CAB hi Assam BJP ten Election neiha kan auhla ber tur a ni," a ti a. CAB-CAA hi Assam tan a pawimawh hle a lo ni. Lok Sabha Election 11 April - 19th May 2019 ah neih a ni a. PM Modi bawk PM, Amit Shah pawh Home Minister rawn niin Parliament in hnihah CAB a tlang a, CAA a lo ni ta a.

NRC Final list 31st August 2019-ah tar chhuah a ni zui nghal a, illegal Migrants nuai 19 chuangte chu Assam khua leh tui an ni lo tiin an awmna Bangladesh, Nepal-ahte thawn kir (Deport) an ngai dawn ta a. Mi rama mihring thawn kir tur chuan ram pahnihin pawm dun a ngai vek a, Bangladesh hian India aṭanga thawn kir ṭhinte a khua leh tuiah a pawm duh tawh losa daih tawh a, India ramri tawpa drop ngawt theih an ni lo. Kum 1971 hnua Bangladesh aṭanga lo lut Muslim chu sawi loh Hindu ringawt pawh an tam si a, Complaint a tam bawk si a. Assam BJP sawrkar hian NRC endiktu Commission an siam leh ta a, chu Commission thurel chu a leakout a, Commission chuan Cut of Year atan kum 1950 Census chin ni zawk rawh se, tihte a ni. NGOs te chuan Assam Sawrkar hi NRC tihkhawtlaina zawngah an puh thung, Assam hi buai tak an ni.

Tun kum 2020 hian Assam mihring hi vbc 3 leh nuai 56 anga chhut a ni. Assam ram Area hi 78,438 Sq kms, Mizoram mihring nuai 12, ram 21,081 sq kms a ni. Mizoram mihring let 30 aia tam, ram erawh Mizoram let 3 awrh chauha zau nei an ni. Ka ziak hmasaah khan tuna BJP sawrkar hian 4th October 2020 thleng hian ram 13,362 Bighas semin ram nei lo chhungkaw 55,000 hnenah Land Certificates a sem tawh a, chung ram chu State dangte ramri bawr a chuh leh ram chhunga sawrkar pass na nei loa ram lo nei, a chhuh lette an ni. Assam sawrkar hian ram dap zela sem zel a tum a, Assembly Election hma hian nuai 1 pek tlin a tum, tih ka ziak tawh a. State ṭhenawm ramte neka/runa a chhuhsak ngawt loh chuan Assam ram Area Carpet-in a tlin lo.

2014 MP Election, Silchar Campaign Pu Narendra Modi thusawi Bangladesh aṭanga Hindu lo lutte awmtir (Accomodate) ngheh tumna, Muslim-ho Vote hui tuma vau leh ram peka tawkdarh, Mizoram hmar lam dep Cachar, Hailakandi leh Karimganj District chhunga Bangladesh illegal Migrants Vote nei tawhte Vote Bank siam tuma Politics Strategy a lang reng. Heng District pathuma eng lai maha Hindu leh Muslim ṭangrual ngai lo khan tunah Chance tha hmu in tia ṭangrualin min dodal dun thei a. Helai hmawrfem aṭanga irhchhuak ni loin Guwahati atanga strategic plan a ni. CM Sonowal leh FM Himanta Biswa hian Home Minister Amit Shah pawh tun kum February leh September thla khan NRC leh CAA kalpui dan tur thuah an hmu a, lawm taka hawin Fruitful tih a ni.

Mizo pipu leh Lalte'n hmarlam phaizawla Lakhipur, Silchar bul Sonai leh Syhlet ramri thlenga an lo hauh ṭhin, thlanglam aṭanga Cachari Kingdom in Silchar bak rawn pel phak lo, hei hi 1850, 1875 ramri kalhmang zel a ni. Tunah Thinghlun, Zophai, Phaisen, Saihapui - Coronavirus vanga VLTF duty-na bukte chu an rawn sawisel a, min ṭhiahtir a, an ṭhiat bawk a. Leilet thlamte rawn halin, thlaite an rawn suasam a, Assam ram chhung aṭangin Police inla chhuak turin na takin min phut a. Mizoram chhunga lo lut tur Motor dangin Economics Blockade min tih khum a. Order/barhluih Agreement te min han siampui a. Ram min chuh Area chhungah Coronavirus Duty post, Police duty pawh an phal lo, Guwahati sawrkar thil tum hi a hmanhmawh hle.

Engtin nge, 'Official ṭhenkhat fuihpawrh' tawlh duai duai chungin, "Incheees khat pawh kan tawlh dawn lo, Kum 20 India do ngam kan ni," tihte kan sawi theih le aw. 1875 leh 509 sq miles kan pawm thu kan sawi, kan sawi a. Ramri hi Van boruak khuhtir ngawt loin Hmar lam ramri leia kan Carpet khuh  ngam chin a tawi lutuk bawk si a. Anni Assam sawrkarin an rawn hauh Carpet khuh chin an rawn kawk huai si a. India Constitution-te an rawn lam ri a, chung lo chhanna chu kan hre lo nge sawrkar kan ngawi tlat thung a. Keini sawi leh chhuan tur chu 1830 bawr Historical fact dik, British-in Cachar ram chin leh Lushai Hill ram a tih chin, British-in Inner Line Permit hmanga Gate a neihna ṭhin laite, Lushai Hills Inner Line Forest Reserve chin Assam ngei Rules leh Gazettes thlengin Documents finfiahna kan neih vek lai hi a ni.

Mizo Politician hmasa District Council ten 1957 aṭanga 9/12/1965 daihte khan Mizo ramri fel lo buaipuiin Assam sawrkar nen an lo sawi dun tawh a, Mizo District Council in Resolution-te a lo siam a, phaizawl lamah Leilet pass pein khuate a lo din belh a. UT kan nih aṭangin Ministry-in buaipui ṭha lehin CM Pu Ch.Chhunga, Pu C.L Ruala, Rev Zairema, Pu SR Vala, Pu B.Poonte, Pu C L Ruala, Pu B.Poonte, Rev Zairema te hian Delhi-Calcutta-London Archives-ahte Document pawimawhte dapin tha leh zung an seng a, PM Indira Gandhi hnenah Memorandum te an lo thehlut a. Vawiina ṭhangtharte tan Document an hnutchhiah ṭha hle. Heng kan mihlute zingah Pu C.L Ruala'n min la dampui a, a lawmawm hle, a duh tan zawhfiah theih a ni, mihlu sawi hmaih ka neih chuan hriatthiam ka dil e. 

Assam hian eng ang pawhin an duh ang anga State ṭhenawmte neka Ramri kham a, fing taka Survey India Map siamte, Constitution an lam rikna lai tak hi, Mizoram State sawrkar hian Supreme Court-a Challenge vat a ṭul tak zet. Historical facts & evidence Document hmanga dikna hailan kawngah Assam hian min hneh a rinawm loh. Assamese-te ṭanchhan fo, "Tun hi British hun a ni tawh lo, India a ni tawh," tih a ni ṭhin. India Constitution leh Dan dangte hi British Dan siamsa kan chhawm deuh vek a ni zawk a, chuvanga Adaptation of Law pawh awm nghal a ni. Chu lai tak chu Supreme Court luh ngaihna a ni, 1933 emaw NE Area Reorganisation 1971 te hi pawm tlan vek tur ni se Nagaland, Meghalaya, Arunachal-ten Assam nena ramri thubuai, SC-ah an pu lut duh dawn em ni ?. Tun hi Mizoram leh Assam ramri kalhmang zirchian a, ram chhan hun a ni.