Helicopter kha tu chah chhuah nge?

Ruling Party MNF khan Mizoram chhim lama ram kang ṭhelh tura Indian Airfore Helicopter rawn thlawk kha Chief Minister Pu Zoramthanga hma­lakna liau liau a nih thu an chhuah kha 100% in a pawm awm ka ti a.

Tun ang hunah hian kan rama Indian Airforce Helicopter ko lut tur hian Congress party chuan theihna an nei lova (Central-ah leh state-ah an sorkar lo), ZPM phei chu an la sorkar ve ngai loh avangin India sorkar ko eih thei tur an ni lo hrim hrim.

April 26 khan MNF Sub Headquarters, Lunglei chuan Press Release chhuahin thil awm dan hi chiang takin an ziak a. "Lunglei khawpui chhehvela kangmei chhuak ṭhelh tura IAF Chopper hial koh chhuah a ngai hi MNF Sub Hqrs, Lunglei chuan pawi a ti takzet a, chutih rual chuan Lunglei leh a chhehvela kang ṭhelh tur, Indian Air Force Chopper chah chhuak nghal thei Chief Minister leh a thawhpui MLA leh Minister ṭha tak tak kan nei hi MNF Sub Hqrs, Lunglei chuan a vanneihthlakin a thlamuanthlak a ti hle a ni," tih a in ziak a ni.

April 26 tho hian Mizo National Front General Hqrs lama Media & Publicity Department chuan Press Release an chhuah leh a. Chutah chuan, "Ni 26.4.2021 (Thawhṭanni)-a Mizorama la thleng ngai lo, a vawikhatna - Indian Airforce Helicopter hmanga Mizoram chhim lama kang ṭhelh a ni thei ta mai chuan Mizoram hmun tinah titi a luah hneh hle a. He thilthleng chungchangah hian sawinawi phet tumna leh a titu-ah midang tute emaw tih ni anga thu lo thehdarha thangṭhat lak lo tumte pawh an awm niawma hriat a ni. Mahse a ni lo, hei hi kan Chief Minister chak tak leh thiltithei tak Pu Zoramthanga hmalakna avang liau liaua tihhlawhtlin a ni tih hi mipui hriatah MNF-in kan puang a ni," an ti a ni.

MNF thuchhuah tawp lamah phei chuan, "Hetiang hi thil nih dan dik tak chu a ni. Inhnial buai nana lo hman vakna turah MNF chuan a ngai lo. Chief Minister Pu Zoramthanga'n thangṭhat a khum tur lo sawinawi a, sawi pelh talh lo tumtute hian sawi zui tawh lo se kan ti. Rikrum thil thleng leh buaina kan tawh chungchangah thuneitute ngaih pawi­mawh CM chak tak leh thiltithei Pu Zoram­thanga kan nei hi MNF chuan chhuanawm kan tiin innghahna tlakah kan ngai a ni," an ti zui a ni.

CM-in Helicopter pahnih kha a chah chhuak ngei tih hi a rintlak a. MNF party hian tute thu sawi nge a chhân/ sawi fiah tak tih hi chu Facebook lam leh Whatsapp lam titi a um zui na zawk em ni? tihte rilruah a lo lut a ni.

David Lalremruata